“Tutus, Bujur Ras Itemani Tuhan” I Samuel 3 : 15 – 21

Suplemen PJJ RG. GBKP Pekanbaru. Tgl 31 Agust – 06 sept 2014

Tema : “Tutus, Bujur Ras Itemani Tuhan”
Ogen : I Samuel 3 : 15 – 21

Syalom.

I. Kata Perlebe .
Ibas sada dahin ntah profesi kalak si terteki biasana igelari “tangan kanan” ntah pe “orang kepercayaan” guna ndatken gelar/jabaten si bage labo menukah ertina guna ndatkenca sekalak arus tuhu – tuhu enggo teruji ibas kebujurenna, ketutusenna, kesetianna ras tanggung jawabna ibas ndahiken – dahinna. Bahan PJJ-nta sekali enda kerna Samuel selaku “tangan kanan Dibata/orang kepercayaan Dibata” erkiteken man bana i endesken Dibata dahin si cukup penting eme :

• Guna memulihken kegeluhen kerohanian kalak Israel si enggo meriah iakapna nggeluh ibas dosa alu terang – terangen.
• Mpengadi kerina praktek sinkretisme (penembahen man dewa Baal).
• Mpekena mulihi fungsi rumah pertoton gelah i fungsiken alu benar, erkiteken ibas paksa sie imam – imam rumah pertoton lanai jadi teladan ibas kerohanian ras praktek kegeluhen ija sie teridah ibas kegeluhen keluarga Iman Eli ras anakna Opni ras Pinehas si terang – terangen mengkorupsi kerina bentuk persembahen si isehken man Dibata ras ngelakoken perzinahen ibas rumah pertoton Dibata janah sanagt isayangken maka Eli sebage imam utama pe ikut ngenanami ulih perbahanen anak – anakna (I Sam 2 : 12 – 17 ; 3 : 15 – 21).

II. Samuel
Adi kita ngerana kerna Samuel, memang lanai asing man banta ise kin Samuel, sekedar ngingetken ngulihi, piga – piga hal sibanci isingetken eme :

• Anak dilaki Elkana ras Hana i pegunungen Efraim nari (I Sam 1)
• Erti gelarna  : Allah mendengar, Nama Allah itu besar.
• Ndatken pendilo khusus ibas Tuhan nari, erdahin jadi Nabi ibas paksa umur si nguda denga ras langsung nggantiken Imam Eli ( I Sam 7 : 15).
• Terus menerus nggit erlajar kerna kata Dibata ras patuh man Dibata ibas segedang geluhna seh maka kerina kegeluhenna tetap i temani Dibata.
• Sikapna selaku anak singuda pe patut man contohen erkiteken ia tuhu – tuhu enghormati Eli selaku orang tua aminna gia imam Eli ras anak – anakna ngelakoken kesalahen si mbelin man Dibata.
• Kelebihenna sideban pe teridah ibas kebujurenna ras ketutusenna selaku nabi, emaka ibas tep – tep kali ia ngerana, maka kerina kalak Israel megiken rananna (I Sam 3 : 21).
• Ia me si merombak sosial politik bangsa Israel ibas ia masu – masu Saul ras Daud jadi raja kalak Isarel (I Sam 15 – 16).
• Ibas sepanjang sejarah kegeluhen bangsa Isarel, Samuel tetap i inget sebage sekalak tokoh si mbelin ras eme maka ibas kematenna kerina kalak Israel ngandungisa (I Sam 25 : 1).

III. Aplikasi
Tema PJJ-nta ibas minggu enda “Tutus, Bujur Ras Itemani Tuhan” kerina si enda teridah ibas diri Samuel ras bageme enggo seharusna kita nggeluhken nggeluhta selaku kalak si nggeluh ibas persadaan Dibata janah lit nge perulihen man kalak  situtus, bujur, ibas persadanna ras Dibata, eme :

• Tetap ikawali Dibata (Job 36 : 7)
• Pertotonna i dengkehken Dibata (Mzm 34 : 18)
• I pulahi Dibata ibas kerina kiniseran nari (Mzm 34 : 20 ; 37 : 39)
• Nggeluh ibas dame (Kuan – kuan 10 : 9)
• Nggelu cawir metua (Kuan – kuan 16 : 31)
• Tetap inget kalak  (Kuan – kuanen 10 : 7 ; Mzm112 : 6).
• Rsd

Oraten PJJ-nta sekali enda berhubungen ras HUT PERMATA si pe 66 ken, tentu ibas ertambahna umur PERMATA maka ertambahna me ateta si kualitas anak Permata ibas ia nandai dirina ras ncidahken identitasna guna kemulian Dibata, sebab man bana me pagi i warisken kerina beban ras tanggungjawab penginjilen lako pembarken berita si meriah, alu bage Permata gelah mpersiapken dirina (bangun dari tidurnya) bagi Samuel si encidahken keteladanen ibas kegeluhenna ibas masa ngudana ras jadi pemimpin i tengah – tengah bangsa si mbelin, si erbahan perubahen ibas bangsa si perdosa.

Man banta selaku orang tua, tentu pe labo hanya ateta menuntut kegeluhen si mehuli man Permata (anak – anakta i tengah jabu), tapi kita sendiri pe arus nge ncidahken kualitas kegeluhen si mehuli ras jadi teladan siman usihen, kegagalen imam Eli eme ibas ia la ngasup ngajarken anak – anakna tentu la ateta terulang ibas jabunta, dage gelah ula jadi, mari dage silumbaken nggeluh erkemalangen man Dibata alu tutus, bujur ras terteki ibas kai – kai pe sebab adi sekalak (Mamre/Moria) si labo erkemalangen alu tutus man Dibata, nggeluh bujur ras la terteki ibas kai pe, uga nina banci jadi teladan man anak – anakna ?

Dage, nggeluh tutus, bujur ras terteki ibas kai pe, eme kap salah sada tolak ukur maka kita lit ibas pertumbuhen rohani si mehuli. Emaka mari dage erlumba – lumba kita ncidahken kualitas kegeluhen sibage rupana segelah ermulia Tuhan ibas kegeluhenta terlebih – lebih kita kerina warga GBKP.

Amin
Pekanbaru 29 Agust 2014.

Salam

Tulisen enda sifatna Suplemen, bimbingen baku tetap si ipedarat Moderamen GBKP si isikapken PPWG. Bjr

Suplemen PJJ “Kataken Si Tuhu” Rg. GBKP. Pekanbaru.

Suplemen PJJ Rg. GBKP. Pekanbaru.

Tema : “Kataken Si Tuhu”
Ogen : Jeremia 28 : 1 – 17

Penjelasen Nats :
Guna ngantusi prikope oraten PJJ-nta enda lit ulina adi sioge menaken ibas pasal 27 – 29 erkiteken sada alur cerita, alu bage banci lebih jelas man banta ibas ngertiken oraten PJJ-nta sekali enda. Piga – cataten man banta ibas oraten PJJ-nta si banci isehken man banta eme :

• Oraten PJJ-nta Jeremia 28 : 1 – 17 nuriken kerna munculna nabi palsu si tergelar Hanaya si ersura – sura mengambil alih fungsi nabi Jeremia, simemainken peranna sebagai nabi palsu alu nubuat palsu man kalak Israel si enggo ertedeh ate nandangi pembebasen ibas perbudaken Babel nari ras memprovokasi kalak Israel gelah erbahan pembrontaken man pemerintahen Nebukadnezer.

• Jeremia eme sekalak nabi si jadi mediator Dibata ras kalak Israel si tumbuh berkembang ibas kota para imam i Anatot nari daerah utara Yerusalem (650 SM), anak Hilkiah, sijadi nabi ibas umur 20-an. Posisina selaku nabi tentu menarik man kalak si deban sebab ibas paksa sie sekalak nabi cukup i ergai ibas kerina hal. Emaka la jarang sekalak atena ndatken posisi nabi ras eme sebabna ibas zaman PL enterem muncul nabi – nabi Palsu si ersura – sura ndarami keuntungen pribadi ntah guna kepentingen kelompok tertentu.

• Hanaya ertina Tuhan menganugrahi, anak Azur i Gibeon nari ibas masa e jadi nabi palsu meramalken maka kalak Israel lanai perlu tunduk man raja Babel, alu meritaken man kalak Isarel maka enggo seh paksana Tuhan mbebasken kalak Israel ibas tabanen raja Nebukadnezer nari bagepe nuriken maka kerina barang rampasen peralaten rumah pertoton si irampok kalak Babel banci ibaba mulih ku Yerusalem. Cataten : Kalak Israel tek kel nandangi si ikataken Hanaya erkiteken Hanaya make kata si rusur ibelasken nabi ibas paksa sie eme : “Beginilah Firman Tuhan” sebab adi kata e ibelasken maka kalak Israel memahamisa kata sierkuasa si rehna ibas Tuhan nari, tapi la ieteh kalak Israel maka Hanaya memanfaatken kata e guna kepentingen dirina sendiri.

• Nubuat Hanaya ndatken pertentangen ibas Jeremia nari erkiteken nubuat e palsu. Perlu pe sieteh maka ibas paksa e kalak Israel riahen iakapna megiken ajaren nabi palsu asangken kata si tuhu – tuhu si ipeseh nabi Tuhan erkiteken ketedehenna mulih ku negerina. Erkiteken sie me maka perkataan Jeremia lanai begikenna sinuriken maka kalak Israel jadi tababen i Babel erkiteken keleng ate Tuhan kap ras labo ngatakenca maka Dibata kalak Israel la erkuasa nandangi dewa – dewa kalak Babel. Adi bangsa e itaban erkiteken sura – sura Dibata kap alu tujun gelah bangsa Isarel menyadari kesalahen si enggo ibahanna ras gelah kalak Israel mengalami pembaharuan iman.

• Kedungenna Jeremia pe menyadari maka perdebatenna ibas menentang nubuat Hanaya hanya sebage “debat kusir”. Jenari nuriken si tuhu man kalak Israel maka kai pe si inubuatkenna pasti jadi, erkiteken Tuhan pasti nggenepi nubuat si isehken nabiNa. Tapi amin bage gia, perkataan Jeremia tetap la ibegiken kalak Israel dingen ianggapna Jeremia sebage “pendusta” emaka Jeremia nadingken perdebaten e ras menyerahken sepenuhna persoalenna ras Hanaya bagepe ras kalak Israel man Dibata, tapi fungsina sebage nabi tetap idalankenna ibas nuriken kebenaren kata Dibata si tuhu – tuhu.

• Erkiteken nubuat Hananya palsu, maka kedungenna Hanya i hukum Tuhan sebab ia nggo ngelawan Tuhan alu erbahan nubuat palsu (mempermainken perkataan Tuhan) lit pe hukuman siibereken Tuhan man Hananya eme kematen.

Ibas pemahamen si singkat kerna oraten PJJ-nta sekali enda maka lit dua hal si idah si sue ras temanta ibas minggu enda eme :

1. Hanaya enggo ngelakoken kesalahen man Dibata alu ernubuat palsu (pemberitaan Firman palsu) ras mendorong kalak Israel gelah ngelawan Babel alu perkataan palsu si ipesehna man kalak Israel.
2. Jeremia tetap encidahken kualitasna sebage nabi si mengkritik nabi – nabi palsu alu la mbiar, ertina Jeremia tetap melasken kata tuhu gia katana e menyakitken man kalak Israel ras siap menanggung resiko ibas setiap perkataan kebenaren si iturikenna.

Tema “Kataken Si Tuhu”. Kataken situhuna iertiken nuriken uga litna (sesuai sebagaimana adanya) tapi mekatep ibas kinatana ngataken situhu enggo jadi “barang mahal”, piga – piga penyebab si erbahanca maka sulit ntah lit kalak si la pang ngataken situhuna erkiteken : Sekalak atena tetap berada ibas zona aman, la nggit menanggung resiko ibas ia ngataken si tuhu, umpamana jadi sekalak saksi ntah nuriken kerna kebenaren kegeluhen teman ibas mpersingeti ntah ngajarken ku simehuli. Penyebab sideban mungkin njagai perasaan teman ras banci jadi litna sikap tidak peduli nandangi kai sijadi ras sipaling parah lit ibas sekalak biak perbual.

Lit genduari trend si membenarken maka bicara la kel pe ikataken situhuna (terus terang) tapi adi guna kiniulin labo dalih (bohong demi kebaikan) alu tujun la terjadi terjadi hal – hal si la i inginken. Payo nge ?

Study Kasus :
Si A kiam iayak si B alu maba kelewang, atena nakil si A. Si B kiam jenari jumpa ras kita guna minta tolong, nina man banta tolong lindungi aku i takil si B atena aku, tentu mekuah ateta emaka si buniken si A i rumahta ibas kamar tamu. Jenari lewat si B, isungkunna kita, lit nge idahndu ku jenda kiam si B janahna maba kelewang, uga nge ninta njawabsa ?

Adi sikataken situhuna, maka si B mate i takili si A, tapi adi sikataken lalit maka kita enggo erbual (bohong) padahal jelas maka bual (bohong) emekap dosa ?
Ibas kasus enda uga dage seharusna, ngataken kata tuhu entah erbual ? Aku pribadi lenga pernah mengalami hal sibagenda rupana, kita pe mungkin sulit siakap guna njababsa uga dage seharusna erbual ntah ngataken si tuhuna ?

Kai dage banci siban silakoken ntah cara terbaik ibas mengatasi situasi extrem e ? Mungkin cara terbaik sibanci silakoken eme : mengajak si A guna istirahat, jenari si sungkuni kai masalah si terjadi antara si A ras si B ras mungkin Tuhan makeken dirinta guna mendamaiken kalak e duana (bisa Jadi).

Ibas study kasus enda ateta ngatakenca ibas ngataken si tuhu tetap nge ibutuhken kepentaren (hikmat) ibas Dibata nari sebab kebenaren tetaplah kebenaren. Alu bage dage maka la lit istilah erbual guna kiniulin (bohong demi kebaikan).

Secara prinsip aku setuju kerna temata “Kataken Si Tuhu” hanya perlu kebijaken ibas nuriken si tuhu. Adi si bandingken kubas kuan – kuan karo “belaskenlah kata teng – teng” ibas pengertinku, maka ibas ngatakenca nge perlu kebijaksanaan labo gelah ula rubat tapi uga gelah kata si ibelasken e mereken pengertin man simegikenca. Adi kita erlajar ibas kegeluhen Yesus, Yohanes Pembabtis, Paulus ras nabi – nabi PL maka kerinana labo pernah melasken “kata teng – teng” ibas pengertina “asal tuan senang” tapi tetap tegas ras ertanggung jawab ibas kerina si ibelaskenna dingen kerina si ikatakenna kata tuhu bandingken ka pe ras Jeremia ibas oraten PJJ-nta. Jeremia si tetap nuriken kata tuhu kerna kecibal kalak Israel si itaban kalak Babel ras siap menanggung resiko ras bertanggung jawab ibas setiap kata si ibelaskenna.

Dage tetap memang ibutuhken keberanian ras kebijaksanaan guna nuriken “kata tuhu” (terus terang), Yesus enggo ngajarken teladan e man banta nina “Kataken ue adi ue ras kataken lang adi lang i darat sie kerina bual kap” ertina Yesus sendiri la senang nandangi permainan kata – kata (lip service) dage erlajarlah guna ngataken situhu alu penampat Kesah si Badia.

Amin.
Pekanbaru 22 Agust 2014.

Salam ras sentabi.

Tulisen enda sifatna hanya suplemen, labo bahan baku bahan PJJ – GBKP. Bimbingen baku tetap si i pedarat Moderamen GBKP, si isikapken PPWG GBKP. Bujur.