“Dame Man Bangku, Meriah Man Bandu” Mat 10 : 5 – 14

Suplemen PA Moria 14 – 20 Sept 2014

Tema : “Dame Man Bangku, Meriah Man Bandu”
Ogen : Mat 10 : 5 – 14

Ibas Matius pasal 10 : 5 – 14 enda Yesus nuriken uga seharusna sekalak ajar – ajar Yesus si sejati ras tujun pendahin rasul – rasul ibas meritaken berita si meriah eme :

1. Litna pembatasen man rasul – rasul ibas meritaken berita si meriah ija rasul – rasul la banci menyimpang ku daerah i luar kalak Jahudi ntah bengket ku daerah Samaria. Aturen ras pembatasen si ilakoken Yesus, gelah ajar – ajar memprioritasken kalak Israel sebage biri – biri si enggo bene alu fokus berita “kinirajan surga enggo ndeher”, alu tujun lit pertobaten ibas kalak Israel, sebab banci jadi kalak si iluar Israel lenga ngasup ngaloken berita si meriah si ipeseh ajar – ajar (ay.5 – 7).
2. Rasul si 12 kalak sekaligus i suruh la hanya meritaken berita si meriah tapi sekaligus ndahiken – dahin pelayanen si bersifat fhisik eme alu mpepalem kalak sakit, pegeluh kalak si enggo mate, mpepalem kalak si gadamen, dingen mpelawes setan – setan, alu la ngarapken upah (ay.8).
3. Ajar – ajar pe i perintahken Yesus alu la maba perbekalen, emas, pirak ntah tembaga, bekal baju ose, sepatu ras ciken. Kerina perintah Yesus ngajarken rasul – rasul gelah tetap tek nandangi kuasa pemeliharan Tuhan (ay. 9 – 14).
4. Alu bage cara strategi pelayanen si isingetken Yesus arah Mat 10 : 5 – 14 enda eme naksiken berita si meriah arah meproklamasikenca, arah kegeluhen alu prinsip melayani ras memberi si icidahken ibas tindaken keleng ate ras kepedulian terhadap sesama.

Kata “dame” i ertiken suatu keadaan yang tidak bermusuhan, tidak ada perang, tidak ada perselisihan, berbaik kembali, adanya suasana tentram. Tentu ibas pengertin kata dame enda ateta kita nggeluh ras jadi sada sada perayakenta. Yesus sendiri pe enggo mperdameken dirinta ras Dibata alu mereken kesahNa i kayu persilang, emaka ibas sie kerina kita ngataken bujur man Dibata, dage guna merespon perbahenen keleng ate Dibata simperdameken diriNa ras kita emaka la banci lang kita pe maba perdamen ibas kegeluhenta dingen jadi tugas panggilenta bagi isingetken Yesus ibas khotbah i Bukit Matius 5 : 9, nina : “Ketuahen me kalak si erbahan perdamen, sebab iakui Dibata me ia anakNa”.

Temanta “Dame Man Bangku, Meriah Man Bandu”, ningetken man banta “hasil’ ibas kita erdame entah “sebab – akibat” ibas kebersamanta nggeluh ibas perdamen, dage mari erlumbalah kita erbahan perdamen gelah kerina kita ermeriah ukur ibas kegeluhen jabu, gereja ras masyarakat, uga carana eme si isingetken ibas oratenta senda enda ula si langgar aturen si lit, siberitaken berita si meriah gelah kerina kalak nggeluh ibas kata Dibata, jenari Berita si Meriah e si aplikasiken ibas tindakenta ibas kepedulian sosialta nandangi kerina jelma ras tetap tek nandangi pemeliharan Tuhan, sebab kalak si alu ate tutus erbahan perdamen tentu i kawali ras i kelengi Dibata (Bd. Penjelasen Mat 10 : 5 – 14).

Amin.
Pekanbaru 12 Sep 2014.

“Ula Erpekat Erbahan Pertakin” Nehemia 6 : 1 – 13

Suplemen PJJ Pekan Baru 14 – 20 Sept 2014

Tema : “Ula Erpekat Erbahan Pertakin”
Ogen : Nehemia 6 : 1 – 13

Pokok Pikiren :

Ope denga Nehemia menduduki jabaten Pemangku raja (bupati/gubernur) i Yerusalem kidekah 12 thn, ia sekalak kepercayaan jadi juru minum raja Persia si tergelar Artahsasta. Jabaten e cukup terhormat erkiteken i percayai sebage penjaga makan – minum raja (Neh 1 : 1 – 3 : 10 – 17). Ibas kepercayaan raja Artahsasta man bana emaka Nehemia makeken kesempaten mindo man raja gelah banci min ibabana kalak Israel mulih ku Jerusalem guna mulihi mbangun tembok Jerusalem ras membangkitken kegeluhen keagamaan kalak Israel (Neh 2 : 1 – 6 : 15). Rencana Nehemia e i pasu – pasu Tuhan emaka kedungenna kalak Israel Israel i izinken raja Persia mulih ku Jerusalem. Ibas pelaksanan pembangunen tembok e Nehemia me si ngelakokenca erkiteken Nehemia sendiri memang memiliki karakter pemimpin si berkualitas, lit pe kualitas Nehemia eme :

• Tutus ibas persadaan ras Dibata iba pertoton, erpuasa ras bermoral tinggi dingen njaga kebenaren erpalasken tuntunen Tuhan (Neh 4 : 4 -5).
• Jujur, bernai ras terpercaya Nulak kerina perbahanen si la benar (Neh 6 : 11, 14).
• Pentar ibas mengatasi konflik (Neh 5 : 8 – 13).
• Dem alu pengarapen man Tuhan ibas ngalaken kerina tantangen (4 : 1 – 3).
• La nggit kompromi emaka keputusen – keputusenna pe tuhu – tuhu bijaksana i barengi visi ras misi si jelas dingen ertanggungjawab ibas setiap dahin si ilakokenna dingen memiliki jiwa pengabdian si tinggi ibas mbangun Yerusalem sebage keinginen suci ibas pusuhna ibas pengajari Tuhan (4 – 6 : 11 – 14).
• Mengorganisasi kerina kalak Israel rikutken fungsi utama guna ndatken hasil simehuli emaka ia memanfaatken team arah setiap suku kalak Israel (4 : 16 – 23, 5 : 8 – 11).

Kenca Nehemia maba mulih kalak Israel ku Jerusalem dingen ersura – sura mbangun tembok Jerusalem sebage benteng pertahanen ibas musuh nari maka Nehemia ndatken erbage – bage tantangen, lit pe tantangen e eme : ndatken penghinaan (4 : 1 – 6), tindaken kekerasan (4 : 7 – 23), intimidasi (4 : 11 – 14 ; 6 : 9 ; 6 : 5 – 9), tipu muslihat arah pertakin si ilakoken Sanbalat, Tobia ras Gesem, gelah kerina rencana Nehemia gagal ibas mbagun tembok Jerusalem (5 : 3 – 4 ; 6 : 1 – 19). Lit pe pertakin si ilakoken Sanbalat, Tobia ras Gesem eme munuh Nehemia gelah di kune Nehemia mate, maka pembangunen tembok e pasti gagal sebab Nehemia me pemimpin si i patuhi kalak Israel ibas mbagun tembok e, tapi 3 kali usaha si ilakoken Sanbalat ras Tobia e gagal eme :

1. Nehemia itenahken ku Kefirim, i lembah Ono. Daerah enda letakna i dataren pantai sebelah tenggara kota Yafo. Daerah enda la daerah Yehuda gelah ije ia i bunuh, tapi Nehemia la nggit reh ku ingan e sebab enggo ietehna kerna rencana pertakin si jahat si rencanaken Sanbalat, Tobia ras Gesem.
2. Sanbalat, Tobia ras Gesem erbahan isu man raja Persia, maka Nehemia ersura – sura jadi raja nandangi kalak Israel. Alu tujun raja Artahsasta ngukum Nehemia ibas penghianaten si ilakokenna.
3. Sanbalat,Tobia ras Gesem, nyogok nabi Semaya erbahan pertakin alu nuruh Nehemia bengket kubas ingan si Badia rumah pertoton kalak Israel, tapi Nehemia la nggit bengket kubas ingan si ikataken nabi Semaya erkiteken Nehemia sendiri meteh maka imam si mbelin ngenca banci bengket kubas ingan si badia e.

Persinget man banta ibas bahan PJJ-nta sekali enda bagi pengarapen temanta“Ula Erpekat Erbahan Pertakin” eme :

• Erbahan “Pertakin” eme sada kejahaten si terencana ras biak si iblis. Biak si bage tentu la mehuli emaka selaku anak-anak Tuhan ula nai min kita erbahan pertakin ibas bentuk kai pe sebab ibas paksana kerina rencana si jahat pasti terbuka seh maka kita sendiri pagi kemalun.
• Ibas kegeluhenta si genduari enda pe tentu tetap lit nge kalak si bage Sanbalat, Tobia, si erbahan pertakin guna meneken kita ibas keriahen kegeluhen si dame, emaka ibas sie, perlu kel kita metenget gelah banci kita pulah ibas rencana kalak si jahat man banta.
• Ukurkenlah kai si mehuli si ngena ate Tuhan sebab guna sie kap kita i pilih Tuhan jadi anak – anakNa, dingen ise si la ngukuri si mehuli situhuna perdosa kap ras kernep nge pagi erkiteken hukumen Tuhan.
• Gerejanta GBKP enggo maju ibas kerina program pelayanenna tapi amin bage gia tentu kita la banci lolah erkiteken banci jadi lit si la senang nandangi keberadanta si enggo mehuli ras ersura – sura gerejanta sontar. Ibas sie Pdt/Pt/Dk/Pengurus ras perpulungen Tuhan arus megermet gelah ula kena siding pertakin si jahat.

Pekanbaru 11 Sept 2014.