“Labo Lit Si Metahat Ibas Tuhan” Lukas 1 : 26 – 38

Introitus : “Lit Kin Si Metahat Ibas Tuhan” (Kej 18 : 14a)
Ogen : 2 Sam 7 : 1, 11 – 16
Khotbah : Lukas 1 : 26 – 38
Tema : “Labo Lit Si Metahat Ibas Tuhan”

Syalom.
Selamat Minggu Advent.

Ibas kegeluhenta sitep-tep wari, enggo me semal silakoken ngalo-ngalo, terlebih – lebih ibas kerja-kerja, maka sukut si mada kerja enggo me nge ngaturken gelah sikap ia ngalo-ngalo temue janah biasana pe ibahan tanda-tandana subuk e ibas acara meriah ukur ntahpe sanga erceda ate. Alu litna singalo – naglo maka sikap kel iakap temue ibas kerehenna dingen i hagaken kel me iakapna ia.

Minggu enda enggo kita seh kubas minggu Adven si peempatken. Janah ibas setiap minggu Adven i singetken man banta gelah kita lebih mempersiapken hati, pikiren ras kinitekenta nandangi kuasa Dibata ibas diri kristus dingen mempersiapken diri nandangi kerehen Kristus si peduakaliken “sebagai Hakim Agung“, emaka perlu kel sirenungken uga sikapta ibas ngalo-ngalo kerehen Tuhan Yesus enda. Sebage persinget man banta ; maka ibas kita ersikap ngalo – ngalo, e perentahNa kap, janah ibas klimaks kerehenNa pagi merupaken kesimpulen terakhir kerna keberadanta ilebe-lebe Dibata, apakah kita ngaloken keselamaten ntah lang. Alu bage maka ibas minggu – minggu advent enda tetaplah si persiapken dirinta ngalo – ngalo Kristus, dingen megah kel me min pagi iakap Tuhan ibas sikapna dirinta ngalo – naglo kerehenNa, erkiteken memang kita enggo ersikap ndauh – ndauh wari ope Ia reh.

Kai kin si man dahinta ibas ngalo-ngalo/nimai kerehen Tuhan? Tentu labo hanya sekedar menghadiri pertemuan-pertemuan ibadah (er-Natal), rsd, tapi si isi waktu-waktu nimai kerehen Tuhan e, alu tetap nggit ngalemi kalak si ersalah man banta, nggit rusur ngukuri guna kiniulin kalak sideban, encidahken kesetian ibas jabunta, ncidahken keleng ate nandangi orangtua,erkeleng ate nandangi kalak sideban, ernalem man Dibata ibas kerina kiniseran, perbeben bagepe ibas keriahen-keriahen si lit, termasuk ibas ngerencanaken dahin-dahinta, rsd. Alu bage maka ibas kerehenNa pagi, kita la ketunduken sanga ngadi-ngadi ntah sanga la ngelakoken kai si ngena ate Tuhan.

Minggu enda kita  pegegehi alu kata Dibata si seh man erpalasken Lukas 1 : 26 – 38. Mari dage si uri kai si ituriken arah bahan khotbahta enda guna banci jadi penjemba man banta gelah tetap nggeluh setia ibas Tuhan ras ngidah belinna keleng ate Tuhan nandangi kegeluhenta :

• Kisah si terjadi si ituriken ibas kitab Lukas enda kenyataan, ertina labo terjadi secara “kebetulan” tapi fakta sejarah si jadi erkiteken kuasa Dibata.

• Kisah e menggemparken seluruh dunia sebab beritana labo berita lokal ntah hanya sebagai fenomena simenggemparken sesaat saja dungna masap.

• Kisah Jusuf ras Maria la banci sinen hanya sepintas saja sebagai cerita natal, sebab ibasa melala hal sibanci jadi perenungen man banta. Jusuf sebagai kalak si bujur (Mat 1 : 19), ngaloken kerina rencana Dibata si jadi man bana, seh maka tetap ibuatna Maria jadi ndeharana sebab ia yakin maka kerina si jadi e rencana Dibata kap. Bagepe Maria si “Mengaminken” kai siterjadi man bana, erkiteken perkataan malekat man bana “Sabab la lit si metahat ibas Tuhan” (Luk 1: 37). Alu bage banci si kataken maka Maria ras Jusup berbangga hati sebab duana ia ntah keluargana i pake Dibata jadi “Perwujudan” keselamaten Dibata nandangi manusia.

• Perkataan malekat “Sabab la lit si metahat ibas Tuhan” (Luk 1: 37) enda pe situhuna sekaligus ngataken “maka la lit ka si metahat (mustahil) man kalak si tek” Maria ibas ngaloken kerina si jadi man bana tentu e i dasari ibas kinitekenna man Dibata, sebab la mungkin ia ngueken kerina perkataan malekat man bana adi la kin ia tek.

• Bageme isingetken kerna kuasa Dibata si jadi man Maria ras Jusuf, janah kerina e jadi i luar dugaan kalak enda entah i luar perencanaan, tapi jadi erkiteken Dibata makeken kuasaNa. Alu bage bage maka arus ka pe si yakini ibas kegeluhenta kai pe banci jadi adi Dibata makeken kuasaNa.

Ibas bahasa kinitekenta rusur kel ibelasken maka “La lit si metahat ibas Dibata (Tiada yang mustahil Bagi Allah)”, tentu kata e siyakini kel sebage kalak si tek, erkiteken memang “kuasa Dibata la terbatas erkiteken situasi ntah keadaan”. Tapi amin bage gia maka mekatep ibas kegeluhenta enda erkiteken kurangna kinitekenta, lanai kita erpengarapen man Tuhan, mungkin e erkiteken :

• Penakit si la malem – malem gia enggo latih siakap ertambar.

• Usaha ntah bisnis si mengalami kerugian si mbelin si erbahanca kita gulung tikar.

• Lalap lenga lit anak i pupus i tengah jabu.

• Perbulangen si lenga merubah sikap burukna, erjudi, minem – minem, rsd.

• Anak – anak si la megiken ajar orang tua, rsd.

Siakap tempa kai si jadi bagi si enggo isingetken i datas ndai, lanai banci berubah, seh maka kita pe pasrah ras berusaha menerima situasi sijadi, padahal ibas Tuhan la lit si metahat. Ertina ibas waktu sekejap persoalen kegeluhenta e banci min kita berubah. Ibas Pustaka si Badia pe melala ituriken kerna kuasa mujizat Tuhan siterjadi man kalak si erkemalangen man baNa, umpamana :

• Abraham ras ndeharana Sarai si ndatken anak ibas umurna si enggo metua.

• Zakaria pe ermeriah ukur dingen mujiken Tuhan erkiteken ibas umurna si enggo metua, maka ndeharana Elisabet, mehuli kulana janah melahirken sekalak si meblin eme Yohanes Peridiken.

• Hana si melahirken nabi si mbelin eme Samuel.

• Bagepe mujizat – mujizat Tuhan nandangi kalak si sakit si menahun, si setanen, kerina i pepalem Tuhan Yesus.

Dage, adi “ibas Tuhan la lit si metahat” uga nge dage ninta ndatken kerina kuasa ras keleng ate Tuhan e, tentu e jadi pergumulenta ? lit pe piga – piga si arus silakoken ras siyakini sebage kalak si tek eme :

• Nggeluhlah alu tuhu – tuhu erkemalangen man Tuhan, erkiteken kerina persoalen kegeluhenta e kitik kel kap adi ibas Dibata, sebab Dibata memiliki 1001 satu jalan guna nampati kita.

• Ula kel sekali – kali kita membatasi kuasa Dibata. Ibas sienda ateku ngatakenca maka kita manusia memang hanya memiliki kemampuan menyelesaiken persoalen/perbeben kegeluhenta kidekah persoalen e banci si logikaken tapi arus ka pe sisadari maka kita enda secara manusia terbatas kel kap baik e secara fhisik, jiwani ntah pikirenta ras erkiteken sie maka kita tetap membutuhken pertolongen janah pertolongen si tepat kel eme si rehna ibas Tuhan simada kuasa. Sebge contoh ibas pengalamen kegeluhenta, perdiatekenlah maka ibas kegeluhenta mekatep denga kel jadi hal – hal si iluar kemampuanta, la terduga, mustahil tempa siakap tapi si mustahil e me jadi, alu bage jelas dage man banta maka manusia memiliki kelemahenna tapi Dibata tuhu – tuhu erkuasa.

• Kita pe arus tek Tuhan tetap nge mperdiateken krina kegeluhen anak – anakNa terlebih – lebih si ernalem tuhu – tuhu man baNa saja. La pernah menduaken Tuhan Dibata.  (Kel 20 : 3 bd, Jakup 4 : 5).

Alu bage, endeskenlah dage kerina perbebenta man Dibata saja arah pertotonta, sebab ietehNa kel nge kerina kelemahen ras keterbatasenta, la lit Dibata lebihen asangken kuasaNa, la lit Dibata erkeleng ate bagi keleng ateNa, dingen kerina padanNa man banta pasti i genepiNa bagepe labo pernah ipediatNa si ikelengiNa erdalan si sada, emaka si perlu man banta eme tetap tek, ernalem nandangi kuasa ras keleng ate Tuhan, erkiteken kuasa ras keleng ate Tuhan e nge ngenca simampu menjawab “kemustahilan/simetahat” ibas pengakap manusia.

Minggu enda minggu Adven si peempatken, tentu enggo pe sipersiapken kerina dirinta guna ngalo – ngalo kerehen Tuhan, bagepe tentu enggo ersikap kita, guna natal si iperingeti sebage perayaan grejawi, ibas sie kerina meriahlah siakap ibas perayaan natal e, sebab Tuhan pe pasti mereken keriahen man kalak si kelsehen, kesusahen, kesehaten man kalak si sakit, mujizat man kalak si ngarapken tuah ibas jabuna, keriahen man kalak si sulit secara ekonomi erkiteken “ibas Tuhan memang la lit si metahat”.

Amin.