Suplemen PJJ 01 – 07 Jan 2015. Mat 18 : 15 – 20. “Perkunjungen Rumah Tangga”

Suplemen PJJ 01 – 07 Feb 2015

Ogen : Matius 18 : 15 – 20
Tema : “Perkunjungen Rumah Tangga”

Shalom.

Kegeluhen sada gereja tentu iarapken erkwalitas ibas kerina pelayanenna, salah sada kwalitas si ateta tercapai ibas bahan PJJ-nta sekali enda eme gereja si aktif ngelakoken “Perkunjungan Rumah Tangga” si sekaligus jadi pengembalan umum (Perkunjungan Pastoral) si ilakoken kalak si terteki (anggota pepulungen secara individual ntah komunal), gelah alu bage ulih Perkunjungen e banci mereken hasil siniarapken. Lit pe tujun perkunjungen Rumah Tangga sinilakon, gelah perpulungen nggejapken dukungen ibas kegeluhen rohani ras sekaligus memberdayaken, labo mengambil alih persoalen, kewajipen ntah tanggungjawab jemaat si ikunjungi nggeluh sue tugas ras panggilenna ibas Kristus (Bd. Tata Gereja GBKP XII, PENGEMBALAAN, PENILIKAN DAN DISIPLIN. Psl. 76).

Persoalen – perssoalen siturah ibas kegeluhen kegeluhen perpulungen secara umum biasana eme :

• Lit rasa dendam, sakit hati, nembeh, menek – menek, sulit memaafken kesalahen si pernah ialokenna ibas sekalak anggota perpulungen ntah si erdahin gereja, erkiteken sie muncul reaksi perasaan tidak senang sierbahanca ia (bc.perpulungen) lanai aktif ibas kegiaten gereja.

• Ibas kegeluhen ekonomi turah perasaan sebagai orang kerdil simengakibatken turahna perbandingen – perbandingen antara dirina ras kalak sideban si mpeturah rasa rendah diri (Minder), perasaan rendah diri e ertambah – tambah ibas paksa piga – piga ngawan perpulungen merasa diri paling exis ibas gereja, si erbahanca piga – piga kalak menarik diri ibas gereja nari.

• Litna persaaan la ipeduliken padahal ia sangat mengharapken perhatian ras keleng ate.

• Sekalak jemaat si lanai ngasup membangun hubungen sosial alu mehuli, hal sienda banci jadi erkiteken litna perasan bersalah akibat ngelakoken sada tindaken si man kemelanken ntah lit ceda ate s jadi erkiteken sada pristiwa si sangat mengganggu perasaan/jiwa, rsd.

Langkah – langkah si banci silakoken tupung ngelakoken Perkunjungen Rumah Tangga eme : jadi pendengar, sebab biasana kalak si lit ibas masalah, umumna atena ibegiken tupung nuriken masalahna, cidahken rasa empati, menumbuhken semangat, ncidahken kekuaten ntah talenta si lit ibas dirina, mpegegehisa alu kata Dibata dingen notokenca, bagepe siarus siperdiateken, di kune lit rahasia si ituriken perpulungen arus kel ijaga kerahasianna, sebab e me maka sekalak serayaan/perpulungen singelakoken perkunjungen arus kalak si terteki, di kune la bage banci jadi ulih perkunjungen e hasilna la maksimal.

Ngidah jumlah kehadiren anggota perpulungen ibas setiap kegiaten gereja lenga maksimal (40 – 50 %) emaka pelayanen ibas bentuk Perkunjungen Rumah Tangga enda perlu sitingkatken, gelah alu bage perpulungen si kote ibas kegeluhen/kiniteken nggejabken lit dukungen ras kalak simperdiateken kgeluhenna, sierbahanca ia megegeh jenari ngasup ndalanken tanggungjawabna selaku warga gereja ibas persadanna ras Tuhan Yesus.

Matius 18 : 15 – 20 sijadi oraten PJJ-nta sekali enda nuriken pengajaren Yesus kerna “Ngajarken Senina”. La banci sipungkiri ngajarken sekalak teman ntah senina seh kel sulitna ras banci jadi kita la berhasil, erkiteken memang enterem nge kalak si la nggit megiken pengajaren/tegoren erkiteken setiap pribadi memang memiliki prinsip sendiri nandangi kegeluhenna ras terlebih – lebih adi cara ngajar (menegor) e la bijaksana, umpamana ilakoken ilebe – lebe jelma sienterem, ibas situasi panas ntah make kata – kata si kurang bijaksana (kasar), menggurui, rsd. Ibas oratenta enda lit cara/tips si isehken Yesus ibas ngajarken senina/teman/perpulungen, lit pe cara e eme :

• Ngelakoken pengajaren alu dua – dua (empat mata), terlebih – lebih ibas sura – suara gelah ndatken mulihi kalak si enggo ngelakoken sila mehuli, ertina pengajaren/percakapen e sifatna pribadi (ay.15).

• Langkah berikutna, adi secara pribadi la membuahken hasil maka, maba teman dua ntah telu kalak, memungkinken pe ibaba teman si lebih berpengaruh ntah memiliki hubungen emosi, sisekaligus jadi saksi ibas kita nehken pengajaren e, ertina kehadiren saksi banci lebih mpegegehi pengajaren dingen mpegegehi kerina percakapen (ay. 16. Bd. Ul 19 : 17).

• Ibas dua langkah si isingetken idatas di kune la erdalan ntah membuahken hasil simehuli, tanggungjawab “pengajar” situhuna enggo isehkenna alu mehuli jenari banci ibaba ku tengah – tengah perpulungen (ibas pelayanen resmi gerejanta eme ibaba kubas Sidang BP. Runggun/Sidang Runggun) guna muat keputusen silebih bijaksana. Ibas langkah sienda Yesus ngerana lebih extrem erkiteken Yesus nuriken maka kalak sila megiken pengajaren ibas kerina teman/perpulungen bali ras sekalak perbegu ntah pemungut cuke. Banci i ertiken langkah sipeteluken enda eme muat sada kesimpulen ntah keputusen kalak siajarken i pedauh ntah lang/pengucilen/pedauh la ersibar (ay.17. bd Ul 19 : 15).

• Mpedauh la ersibar (pengucilan) biasa kel terjadi ibas tradisi kalak Jahudi, mungkin e me si imaksudken Yesus alu ngataken ibas ay. 18 nina “Emaka kukataken man bandu : kai si irakutindu i doni endaenggo kap i rakuti i surga, kai si osarindu i doni enda enggo kap mosar i surga” (bd. Mat 16 : 19). Ibas ayat enda Yesus mereken wewenang “disiplin gerejawi” si iberlakuken man kerina simegelanggar kata ras perentah Dibata alu kebebalen si lanai mungkin bertobat. (ibas gerejanta cara enda ikenaken man kalak si memang tuhu – tuhu enggo ngelaggar aturen – atruen si lit ibas gerejanta (bd. Tata Gereja GBKP kerna tujuan Pengembalan, Penilikan dan Disiplin. Psl 77, 78, 79, 80).

• Tapi tentu malem ate adi sekalak ngaloken persinget/pengajaren, mengalami pertobaten, ras guna banci hal sie tercapai Yesus nuriken maka kerina si ilakoken e isehken ibas pertoton man Tuhan Dibata, erkiteken kerina si ilakoken eerpalasken pertoton man Tuhan Yesus i pasu – pasu Dibata kap, ertina kerina keputusen si erpalasken pemindon hikmat Dibata pasti ipeteguhi Yesus erkiteken Yesus hadir ibas dua ntah telu kalak siatena ngerunggui kerna dahin simulia simpemuliaken Dibata (ay. 19 – 20).

Sue ras tema PJJ-nta sekali enda “Perkunjungen Rumah Tangga”. Sieteh maka perlu denga kel kita ngelakokenca terlebih ibas mereken pengajaren, terlebih nandangi turang/seninanta si enggo lepak perdalanna, janah tentu pe siarapken simereken pengajaren pe memiliki nilai lebih ibas dirina, nggeluh ibas kemualian Dibata erhikmat ras dem alu kebijaksanaan. Sebab salah pengajaren maka hasilna pe banci la mehuli terlebih e ibas ngiahken, mereken dukungen, membangkitken semangat ras memberdayaken kegeluhen perpulungen. Janah man banta sebage “pengajar” maka ula kitik ukurta adi lit kalak si la megiken pengajarenta, erkiteken sifat pengajarenta hanya persinget ntah evaluasi man kalak sindatken pengajaren.

Dage mari si emban tugas enda gelah banci reh teremna kalak singenanami nikmat kegeluhen ibas persadaan ras Tuhan Yesus dingen sekalak singelakokenca alu tutus maka ia pe pasti ndatken hikmat ras kebijaksanaan ibas Dibata nari. Sekali nari “mari berkunjung ras terus berkunjung”.

Amin.
Pekanbaru 30 Jan 2015

Suplemen Pekan Penatalayanen wari VII. Luk 22 : 14 – 20. “Persadanta Ras Jesus Erbahan Kita Megegeh”

Suplemen Pekan Penatalayanen wari VII. 24 Jan 2015

Khotbah : Luk 22 : 14 – 20
Tema : “Persadanta Ras Jesus Erbahan Kita Megegeh”

Shalom.

La tergejap dingen banci denga kurang siakap wari – wari ibas kita muji Dibata dingen nggari – gari kataNa, sebab ibas persadannta ras Tuhan tentu sidat me kemalemen ate. Wari enda wari si pepituken kita ngelakoken Pekan Penatalayanenta dingen itutup pagi alu Lakon Persadaan Si Badia. Persadaan Si Badia si ikuti kita ibas wari pepagi sifatna “Sakral” emaka labo sembarangen kalak guna ngikutisa erkiteken Yesus sendiri jine netapken dingen merentahkenca guna ilakoken alu tujun gelah si inget tetap kerna keleng ate Yesus si isehkenNa man banta ibas kematenNa i kayu persilang bagepe ngingetken man banta pentingna persadaanta ras Ia simpetetap kinitekenta maka keselamaten enggo bagin sikerajangenta erkiteken pengorbanen Yesus i kayu persilang sebab kuasa dosa labo tertaluken alu kesalehan, akal budi, pengertin ras kebijaksanaan dirinta sendiri kecuali Yesus sendiri sinalukenca. Tapi ibas kinatana mekatep mekarus denga kita ngikuti Lakon Persadaan Si Badia sinilakoken gerejanta. Ibas Lakon e isingetken “maka sekalak – sekalak kita arus nguji bana” (Pemeriksaan ntah Pengujian diri) erpalasken I Kor 11 : 28 – 29 ”dage tep – tep kalak nguji banalah, jenari ipannalah roti e dingen minem tare calung e, sebab kalak siman ras minem alu la nandai badan Tuhan i je, ia jine maba ukumen man bana, asum ia man ras minem e”, kata enda me ningetken kerna kesakralen Lakon Persadaan Si Badia dingen eme sebabna ibas gerejanta kalak si kena siasat la banci ngikuti Lakon Persadaan Si Badia erkiteken kegeluhenna tetap denga ikuasai dosa. Kata enda pe sekaligus jadi persinget banta ibas paksa mengketi Lakon Persadaan Sibadia, ija kita arus mpebadiaken kegeluhenta alu nadingken kerina biak dosa, Ibas sada minggu enda kita ngelakoken Pekan Penatalayanenta tentu enda pe jadi modal man banta mengketi Lakon Persadaan Si Badia e, ija kita nggo mbue rukur kerna kata Dibata ras nggejapken kelenga ate Tuhan ras penjemba man banta guna ngelakoken kai simehuli singena ate Tuhan ku lebe enda.

Oratenta ibas wari enda Luk 22 : 14 – 20 nuriken kerna perayaan Paskah si ilakoken Yesus ras ajar – ajarNa ope denga Ia itangkap ras isalibken. Perayaan Paskah e biasana ilakoken kalak Israel tiap tahun guna ngingetken kalak Israel tupung ndarat i Mesir nari (Ul 16 : 1). Paskah e sendiri ertina “lewat ntah berlalu” siterjadi ibas berngi ope denga kalak Israel ndarat i Mesir nari, ija malekat Dibata ngelewati kerina rumah – rumah kalak Israel si enggo itandai alu dareh biri – biri ibas pintu rumahna. Dareh e me sebage tanda maka ukumen Dibata la berlaku nandangi kerina isi rumah e. Janah ibas berngi e kerina kalak Israel i perentahken man daging panggang biri – biri si enggo ibuat darehna e ras man roti si la itama ragi si ikuahi alu kuah si pagit. Kerina e ilakoken alu tedis, make benting, make sepatu ras ncikep tongkat sebage tanda siap – siap guna berangkat nadingken Mesir taneh perbudaken. Ibas kecibal sibage me kalak Israel memaknai Paskah eme sebage perayan kebangikten ras pembebasen i Mesir nari, erkiteken Mesir memang imaknai sebage lambang penindasen ras Laut Merah sebage lambang kematen.

Perayan Paskah si enda me irayaken Yesus ras ajar – ajarNa, tapi ibas paksa Yesus ngelakoken perayan Paskah e Yesus lebih memaknaisa kubas diriNa sebage tebusen si tuhu – tuhu sinasapken kerina dosa manusia. Ibas perjamuan e Yesus nuriken kerna kiniseran sibakal ialamiNa dingen perjamuan si ilakokenna ras ajar – ajarNa e me sebage tanda peringet – ingeten kerna kiniersadanNa ras ajar – ajarNa ras sekaligus ningetken kerna karya penebusen Yesus man manusia perdosa. Tanda persadaan si ilakoken Yesus eme alu muat roti jenari icepik – cepiksa ras Anggur si iberekenNa man ajar – ajar niNa : “Enda me dagingKu si Kubereken man gunandu bahanlah bagenda guna peringet – ingeten man bangKu. Jenari iterusken Yesus alu muat calung, janah nina man ajar – ajarNa : arah calung enda Dibata erbahan padan si mbaru si isehken alu darehku simambur gunandu”. Pengertin kerna roti sicepik-cepik ras anggur e si bereken Yesus man ajar – ajarNa e me : roti e merupaken simbol daging kula Kristus si ngenanami kiniseran si isalibken, mate ras si keke ibas si mate nari, jenari Anggur si inem ajar – ajar merupaken simbol dareh Yesus si mambur guna ngalemi dosa-dosa manusia. Ibas pengertin sienda me tep – tep kali kita ngelakoken Persadaan Si Badia maka kita arus nggejapken kerina kiniseran Tuhan Yesus ras kematenNa. Erpalasken sie kerina mari dage simaknai alu mehuli tep – tep kali kita ersada ibas Lakon Persadan Si Badia, silakokenlah alu tuhu – tuhu ngataken bujur man Dibata erkiteken Kristus Yesus enggo nggancihken kita ibas kematen dingen simereken keselamaten ibas kegeluhen si mbaru.

Tema Pekan Penatalayanenta ibas wari enda “Persadanta Ras Jesus Erbahan Kita Megegeh”. Tema tentu njemba kita lebih memaknai persadan e sebagai persadaan anak – anak Dibata dingen mpraktekken persadan e ibas kegeluhenta si irakut ibas keleng ate Tuhan Yesus. Tentu pe tema ibas wari enda tetap si kaitken kubas program tahun gerejanta eme “Peningkaten Sosial, Ekonomi ras Budaya” sinjemba kita banci nggeluh ersada ibas hubungen sosial simehuli, ersada arih meningkatken kegeluhen ekonomi jemaat ras kalak sideban dingen ersada ibas membudayaken budaya sisampat sampaten. Man banta warga GBKP situhuna hal sienda labo kap mesera guna ndalankenca, erkiteken nai nari kita memang enggo i iket ibas persadaan iketen kekeluargaan ras kekerabaten si saling terkait sada ras sidebanna alu iketeken tutur siwaluh rakut sitelu janah iketen e situhuna kita enggo encidahken maka kita saling membutuhken kap sada ras sidebanna, persadan e banci i ibaratken bagi “Persadan Kopi ras susu”, ersada ia duana alu la situalen, la ngataken aku si entabehna nina sapih – sapih ia, tapi ipersadana bana duana seh maka iberena rasa si entabeh siakap nginemsa.

Ibas doni enda pe melala bentuk – bentuk “Persadan” umpamana : Persadan Merga silima, Persadan Sembiring ras anak beruna, Persadan Singalor Lau, Persadan lau Simalem, Persadan Keleng ate, Persadan Gereja Indonesia, Oikumene, rsd. Persadan enda ibahan alu erbage – bage tujun umpamana : nehken keleng ate ras si sisampat – sampaten (STS), gelah tetap lit iketen si mengikat ras erbage – bege tujun simehuli sidebanna. Tapi engkai ka maka mekatep lanai siakap malem ibas kerina persadaanta ? tentu sienda pe jadi pergumulenta ras – ras erkiteken mekatep memang persadaan e dungna pecah ras lanai siangkan, memang perpecahen ibas persadaan banci saja terjadi erkiteken piga – piga hal, umpamana :

• Kita la ateta mereken ” rasa “ ibas keanggotanta tapi mekatep encidahken “tualta” (inget persadaan Kopi ras susu ndai).

• Sifat Individulis simegegeh pe mekatep jadi penyebab sebab kalak si individualis memamng bana ngenca ukurina (Partikularis).

• Sifat Komersialistis ertina adi lit iakapna ombangna bana maka sikap iakapna persadaan e ras adi labo iakapna lit ombangna maka labo diatena.

• Sifat rayo – ayo. Lit kuan – kuanta sicocok kel ibas sienda eme “Seri nge ate kelengna / pengidah mata tapi la seri ibas perbahanen” entah pe kuan – kuanta “Situngkat – tungkat galuhna “, bage – bage denga kin simekatep jadi, janah hal sienda pe merambat kubas pelayanen Gereja, umpamana : mengayak kel kita kubas sada ingan entah e mungkin erkiteken hubungen emotionalna ntah kalak si idahi kita kalak erpangkat, bayak ras mehaga tapi kubas sada ingan mekatep ka kita la mengayak erkiteken la siakap lit ngaruhna banta bicara sidahi. La kita sadar maka cara sibage meruntuhken kerina persadan si lit.

Melala denga kel sibanci sidaftarken adi ateta kita ngerana kai nge si menghambat kiniersadannta seh maka banci pecah ras adi sidaftarken banci jadi ribuan hasilna dingen sie kerina terjadi erkiteken gegehna biak dosa singerajai ija biak iblis gegehen asangken biak – biak anak – anak Tuhan. Tapi kenca Penata layanenta ibas ari si pe 7 ken enda tentu terjadi me perubahen man banta ras tek kita maka turah dingen erbuah me me biak – biak anak Tuhan ibas persadaanta si teraplikasiken ibas kita radu menerima, menghargai, engkelengi amin lit perbedaan tapi perbedaan e la jadi penghalang erkiteken kita enggo ipersadaken ibas keleng ate Kristus dingen enda me siarapken Tuhan jadi ibas kerina kiniersadanta. “Selamat memberikan rasa simehuli si erpalasken keleng ate Tuhan ibas kerina persadaanta”.

Amin.
Pekanbaru 24 Jan 2015.

Suplemen Pekan Penatalayanen Wari Pe VI. Imamat 25 : 8 – 17. “Ermeriah Ukurlah Ibas Tahun Jobel”

Suplemen Pekan Penatalayanen Wari Pe VI. 23 Jan 2015
Khotbah : Imamat 25 : 8 – 17
Tema : “Ermeriah Ukurlah Ibas Tahun Jobel”

Shalom.
Adi si perdiateken kitab – kitab Injil maka Yesus ikataken “Penganjur ntah Praktisi tahun Jobel” si teridah ibas keseluruhen pengajarenNa simenentang kemiskinen, ketidakadilen, penindasen, kesewenang – wenangen, ras mengkritik sistem kegeluhen masyarakat, kegeluhen kalak Jahudi ibas paksa sie, subuk e ibas kemewahen bangsawan – bangsawan Jahudi bagepe imam – imam ras ahli taurat si memanfaatken sinagoge guna memperkaya diri dingen singelakoken tahun Jobel hanya sebage ritus agamawi (bdk. Luk 4 : 18 – 19, Luk 7 : 22, Luk 14 : 13, 21).

Imamat 25 : 8 – 17 si jadi bahan oratenta berngi enda nuriken man banta kerna pengertin ras pelaksanan tahun Jobel, si arus ilaksanaken kalak Jahudi sebage tahun si Dibata sendiri netapkenca sebage tahun pembebasen (Im 25 : 10), si ilakoken setiap 50 tahun sekali, kenca ngelawti 49 tahun, ertina 7 kali tahun sabat si masing – masing 7 tahun dekahna emaka ilakoken tahun Jobel, dingen ibas setiap tahun Sabat si igelari pe tahun “Pendamaian” (Im 25 : 9) ija kerina budak – budak ibebasken, taneh i pengadi isuani dingen batang anggur si la irantingi lanai ibuat hasilna (Bd. Kel 21 : 2. Kel 23 : 10 – 11. Im 25 : 2 – 7. UL 15 : 1 – 8). Sienda me kerina ilakoken kalak Jahudi sebage kalak si nggeluh i teruh undang – undang Tuhan, erkiteken hukum – hukum si lit ibas tahun Jobel e seh kel pentingna emaka adi la idalanken kalak e biasana ndatken hukumen sebab ianggap sebage pelanggar hukum taurat.

Enggo isingetken, Yesus kap “Penganjur ras Praktisi Tahun Jobel” janah orentasi Yesus ibas ngelakoken tahun Jobel e teridah ibas usahaNa membangun mulihi sistem sosial ekonomis, restrukturisasi sosial secara radikal ibas kerina tingkaten kegeluhen mulai arah kegeluhen rumah tangga seh ku perpolitiken (Mrk 3 : 31 – 35, Mrk 10 : 35 – 45), alu bage maka banci si kataken, Yesus sangat peka nandangi kegeluhen sosial masyarakat ras akibat kepekanna nandangi kegeluhen sosial masyarakat e, emaka kerina i tanggapiNa alu erbahan tindaken secara holistik alu memperbaharui kondisi spiritualitas, kepribadian, sosial ras ekonomi, alu kata sideban Yesus nuriken keleng ate labo terjang kata – kata saja, tapi pe sekaligus ngelakokenca jadi misi penggenapen janji Dibata terutama ibas pembebasen kerina kalak si tek ibas dosa nari.

Tahun Jobel sekali ibas 50 tahun, ibas kegeluhenta si peringeti tahun 50 ken sebage tahun emas umur enggo setengah abad, sada priode si cukup panjang, ibas perjabun pe banci jadi sekali nge ngenca sirayaken “Pesta Emas” janah jarang kel nge banci ngerayakenca dua kali. “Pesta Emas” ntah umur si enggo seh 50 eme sada gambaren suasana kebahagian, sebab waktu si itempuh guna mencapaisa . Ibas kegeluhen kalak Israel tahun pe 50 ken e pe tahun keriahen kap, erkiteken melala kalak si tertindih, si erutang, si lanai lit tanehna, ndatken pembebasen ras ndatken kegeluhen asalina.

Wari enda kita ngelakoken Pekan Penatalayanen si pe VI ken alu tema “Ermeriah Ukurlah Ibas Tahun Jobel” tentu tema la hanya nuriken kerna erti tahun Jobel ntah sicakapken hanya sebage ritus agamawi saja, tapi mbera kenca Pekan Penatalayanen enda kita semakin imampuken menjadi “Penganjur ras Praktisi Tahun Jobel” ibas kerina tingakaten kegeluhenta, simereken keriahen nandangi kegeluhen man kalak sideban ibas katawari paksa pe, sue ras tahun pencanangen gerejanta tahun peningkaten Sosial, Ekonomi ras Budaya, erkiteken “Lanai aku si nggeluh, tapi kristus kap si nggeluh ibas aku” (Gal 2 : 20a).

Amin.
Pekanbaru 23 Jan 2015.

Suplemen Pekan Penatalayanen Wari V. Kej 1 : 26 – 28. “Nggeluh Ibas Tempas Dibata” (Berbudaya)

Suplemen Pekan Penatalayanen Wari V. 22 Jan 2015

Ogen : Kej 1 : 26 – 28
Tema : “Nggeluh Ibas Tempas Dibata” (Berbudaya)

Shalom
Kebudayan merupaken “ekspresi pola hidup” ibas sada suku ntah sada bangsa, bageme pe gerejanta GBKP ibas meritaken berita si meriah berhadapen ras budaya simenyangkut pola pikir, kebiasan ras karakter si lit ibas budaya kalak Karo. Ibas kintana mekatep nge terjadi benturen antara budaya ras berita si meriah si mengakibatken berita si meriah itulak ntah ndatken antipati ibas masyarakat Karo (Jemaat GBKP). Tapi malem ateta belakangen enda gerejanta GBKP lanai anti terhadap “Kebudayaan” Janah gerejanta GBKP berusaha menemukan Kristus ibas kebudayaan, labo memaksaken Kristus kubas kebudayaan, tapi amin bage gia, gereja pe tetap arus berhati – hati gelah la terjadi sinkritisme ertina gereja pe arus tetap membangun Teologi sipaguh ibas ia meritaken berita si meriah i tengah – tengah kebudayaan si lit, sebab berita si meriah pe labo hanya sebage berita kesaksian tapi pe merupaken kesaksian kegeluhenta si enggo itebus Dibata ibas karya Yesus Kristus, jadi ibas meritaken berita si meriah sifatna arus tetap doktriner ras ideologis, erkiteken berita si meriah eme “expresi kesaksian kegeluhen kalak si erkiniteken man Tuhan” (Bd. II Kor 4 : 10).

Oraten Pekan Penatalayanenta wari si pe V, Kej 1 : 26 – 28 enda nuriken man banta kerna “Penciptaan Manusia” si nuduhken nilai kegeluhen manusia sebage tinepa Dibata si ibereken kengasupen guna ngkuasai, ngusahai ras njagai kerina tinepa Dibata, janah pemasu – masun si isehkenNa sebagai bukti pemeliharanNa nandangi manusia. Bageme Kej 1 : 26 – 28 enda nuriken man banta kerna keleng ate Dibata man manusia. Ibas pemahamen sienda tentu kita pe la banci lang encidahken kegeluhen si sue gambaren Dibata kidekah kita nggeluh i doni.

Tema Pekan Penatalayanenta wari enda eme “Nggeluh Ibas Tempas Dibata” (Berbudaya), pengajuk tema enda man banta eme uga kita banci nggeluh secara bersama alu gaya kegeluhen sue ras tempas Dibata eme berpikir ras berperilaku bagi si isuraken Dibata ertina nggeluh selaras ras Dibata, alu pengertin, kita enda me satu – satunya tinepa sisentudu ras tempasNa, simemiliki relasi khusus ras Dibata, emaka la banci lang, kita arus patuh kubas tujuan ras desain si pencipta. Kita memang nggeluh ibas doni si melahirken berbagai budaya, sistem si mehuli ras benar tapi arus tetap si inget manusia nge simelahirken budaya, emaka nilai kegeluhen manusia labo itentuken lingkungenna entah budaya si lit ibas dirina, labo ibas pengertin penulis menentang budaya, tapi mari si pahami budaya e hanya sebage aturen (nilai, norma) simengatur kegeluhen sosisal masyarakat, sebab mekatep kel ibas kinatana kegeluhenta lebih teriket kubas budaya asangken pemahamenta sebagai makhluk rohani si sue ras tempas Dibata. Sekalak kalak kristren si nggeluh ibas kerina aturen Dibata maka ia pe pasti melahirken budaya si melebihi kerina budaya si lit, sebab Kristus kap kerina ulu budaya si lit, emaka marilah kita lebih memahami Kristus si nggeluh ibas dirinta gelah alu bage kegeluhenta tuhu – tuhu berbudaya.

Amin.
Pekanbaru 22 Jan 2015.
Persentabin : Tulisen enda lebih mengarahken kubas prinsip kegeluhen kristen simengarahken kita ku tingkat kerohanian si tuhu – tuhu si la hanya terjeng mabai kita memahami erti budaya ntah kebudayan, tapi lebih kubas bentuk perenungenta sebage kalak kristen si enggo lahir baru. “Lanai Kap aku Si Nggeluh, Tapi Kristus Kap Si Nggeluh Ibas Aku” (Gal 2 : 20a).

Pekan Penatalayen wari IV. Kuan – Kuanen 23 : 17 – 23. “Megermetlah Ngaturken Perdalinen Nggeluh”

Suplemen Pekan Penatalayen wari IV. 21 Jan 2015

Tema : “Megermetlah Ngaturken Perdalinen Nggeluh”
Ogen : Kuan – Kuanen 23 : 17 – 23

Shalom.

Gerejanta GBKP la terpesirang ras budaya Karo, erkiteken gerejanta memang erlatar belakang kesukuan, suku Karo. Tahun enda si canangken tahun “Peningkatan Sosial, Ekonomi ras Budaya” tentu ibas pencanangan tahun e ersura – sura kita gelah banci tole kita melestariken budayanta. Ibas paksa enda pe la terpungkiri gerejanta pe paksa enda ngalaken budaya siberkembang si mekatep lanai sesuai ras budaya ras kiniteken dingen sulit kita mempertahanken nilai – nilai budaya si enggo lit si enggo mehuli ibas ngaturken perdalanen kegeluhenta, alu bage maka banci sikataken pengaruh budaya modernisasi cukup berkembang mempengaruhi kegeluhen manusia umumna ibas zamanta si genduari.

Ibas kegeluhen budaya kalak Karo, mereken pedah – pedah e pe merupaken sada budaya kap, janah mereken pedah – pedah e lazim kel man banta subuk e isehken ibas bentuk formal ntah in formal janah umumna pedah – pedah ntah pengajaren e ertujun gelah si ngaloken pedah nggeluh alu mehuli. Ibas zaman si nuria biasana singaloken pedah erpengue ia nandangi pedah sialokenna, sebab ietehna maka kerina pedah ntah pengajaren e ertujun guna pehuliken dirina, emaka ndube melala kel pedah si isehken orang tua, alu sura – sura gelah anggota keluarga, kade – kade ntah kalak sideban geluhna la jadi kemalun nandangi keluarga ras ndatken kesangapen (kesukesen) kidekah ia nggeluh i doni.

Kitab kuan – kuanen bahan oratenta berngi Pekan Penatalayanenta wari si pe IV kenda enda mereken man banta pedah – pedah (Petuah – petuah) gelah kalak si megikenca banci ndalani kegeluhen alu pentar ras bijaksana. Wari enda erpalasken Kuan – kuan 23 : 17 – 23 isingetken man banta uga pentingna pedah/pengajaren/petuah si isehken man banta gelah ibas ndalani kegeluhen kita tetap ibas dalan Tuhan, piga – piga pedah si isingetken man banta rikutken temata wari enda “Megermet Ngaturken Perdalinen Nggeluh” eme :

• “Ula morahi (indo : iri hati) kalak perdosa, patuhlah man Tuhan, gelah terang wari – warindu si pepagi, dingen pengarapenndu pe la bene” (ay. 17 – 18), kata enda ningetken pengajaren gelah ula ermorah ate nandangi keberhasilen kegeluhen kalak sideban si ndatken keberhasilenna erkiteken dosa sifat percian ntah morah ate (indo : iri hati) erbahanca sekalak banci ndabuh kubas dosa dingen bicara idatna pe keriahen kegeluhen doni tapi adi e idat erkiteken dosa kerina e situhuna labo mereken kegeluhen kemalemen ate situhu – tuhu (bd. Rom 6 : 23). Ibas pengajaren si enda penulis kitab Kuan – Kuanen enda gelah kita “menyadari diri” gia la bagi kalak sideban suksesna kegeluhenta labo man morahen, sebab ibas kinibayeken pe lit pengujin Dibata apakah kita nggeluh alu mpergunaken kebayaken bagi si ngena ateTuhan ntah lang sebab di kune la i pake bagi singena ate Tuhan, maka kerina pagi si lit e lesap me ibas generasi – generasi berikutna. Dage labo man morahen kalak si sukses erkiteken dosa tapi bersyukurlah ibas kerina kegeluhenta, cukup siakap kai si lit ibas kita dingen adi sikap kegeluhenta pakekenlah bagi si ngena ate Tuhan gelah Tuhan tetap nambahi pasu – pasuNa mna banta (bdk ras tujun tahun gerejanta “Peningkatan Sosial, Ekonomi ras Budaya).

• Arus lit sifat “megermet” eme sikap hati – hati, teliti, tanggap, la menggo/mekarus, waspada dingen bijaksana ibas kerina hal, ertina la bo kai pe asal merincuh minter ilakoken tapi sekalak si megermet pasti ia rukur lebe alu manjar – anjar, kenca dung i ukurina alu mbages me maka ilakokenna kai si akapna perlu ilakokenna. Janah hal si perlu kel ipergermetken, eme gelah kita ula la erteman ras kalak permabuk dingen merangap, sabab kalak si bage pagi jadi musil me dungna ras lanai ergonje (ay. 19 – 20). Payo kel me si iajarken penulis kitab Kuan – kuanen enda sebab sekalak pemabuk uga kel pe labo keleng atena dirina bagepe kalak si merangap biasana labo kalak si bijaksana ibas ngaturken si lit ibas ia, seh maka kai pe atena i konsumsina guna pesenangken dirina dingen salah sada sifat si mekelek kel ibas kalak si merangap maka ia pasti la pernah ngukurken kalak sideban.

• Ibas ayat 21 – 23 penulis kitab Kuan – kuanen enda tole ningetken kerna pentingna megiken ajar kerna kebenaren, pengertin, kepentaren dingen ngergakenca ibas kegeluhen ras la banci lang kita ngergai kerina pengajaren e sebab isehken orang tua dingen lebih asangken sie isiengetken maka kerina orang tua pe arus ikelengi sebab erkiteken ia me maka kita lit ras dingen jadi bagi sigenduari e, orang tuanta me si ngasuhi kita, ia me sinatah – natah kita guna banci kita cinder, erdalan, meteh huruf, mpetandaken kerina si lit i doni enda, nekolahken dirinta, mengarahken perdalinen geluhta, seh maka perjabunta pe iaturkenna ras lebih asangken sie di kune lit denga orang tuanta maka kempuna pe iajarkenna denga, rsd. Luar biasa memang penulis Kuan – kuanen enda ngergai kegeluhen ras ngertikenca ras seh asa genduari pengajarenna/pedahna e payo kel, sebab adi bagi pedah senda me sidalanken maka la lit dalanna kita la ndatken kemalemen ate, ertina adi manusia pe ngena atena perbahanenta maka Dibata pasti lebih erngena ate man banta.

• Dage mehergalah iakap kerina pengajaren/pedah si isehken man banta terlebih e si isehken orang tuanta dingen ola ndigan kel pe dayaken (ay. 22 – 23) sebab ise pe si mengabaiken/la mediate nandangi kata ajar geluhna pasti ndatken kesusahen, ertina kerina pedah e, la bo gelah enggo isehken si ndarat arah babah nari alu la lit ertina tapi merupaken pedah – pedah bijaksana. Adi kita sebage orang tua, kita pe perlu sadar, dirinta kap perwakilen Dibata nandangi anak – anakta, emaka kita pe arus lebih ngerembakken diri kempak Dibata gelah kerina kepentaren Dibata isehkenNa man banta guna banci kita mereken ajar/pedah bagi si ngena ate Tuhan ras lebih megermet kita mereken pengajaren man anak – anakta erkiteken kata – kata si enggo ndarat ibas babahta nari enggo jadi sikerajangen si megikenca kap, emaka ola kel sembarangen kita melasken kata ntah mereken ajar ntah pedah – pedah gelah alu bage la lepak pendalanken singaloken pedah.

• Meherga kel kerina pengajaren ntah pedah – pedah si erguna membangun dirinta bage pe man kalak sideban, ibas ergana pedah pengajaren e penulis Kuan – kuanen enda ngatakenca ibas ayat 23 “kepentaren, pengajaren, dingen pengertin kerina perlu i tukur, tapi ola kel dayaken” ibas kata si deban penulis ngataken adi la idat i tukur me kepentaren, pengajaren dingen pengertin adi perlu gelah alu bage ibas ndalani kegeluhen enda lit senjata si ampuh guna ngelawan kai si la mehuli gelah ola ndabuh kubas kubang dosa si perehken pernembeh Dibata.

Bageme Kuan – kuanen 23 : 17 – 23 renungen Pekan Penatalayanenta ibas wari si pe IV ken enda ningeti kerna diri ras tanggungjawabta, uga dage ninta, me lanai bo dage ateta morah nandangi kalak si perdosa ? me sibuat me tanggung jawabta selaku pengajar si bijaksana ? me sisehken me dage tanggungjawabta alu mehuli selaku orang tua si mehuli man anak – anakta ibas mereken pengajaren gelah anak – anakta pe lebih megermet ndalani kegeluhenna ? adi AMIN ninta terpuji kel Tuhan sebab la kel si – sia kita i pilihNa jadi sikerajangenNa si isuruhNa guna mperakteken, encidahken ras ndalanken, kerina cara – cara kegeluhen si mulia i doni enda, sebab sada paksa pagi enterem kalak ngidah kemuliaan Dibata ibas dirinta, seh maka asa kai kalak si la ngidah kemuliaan Kristus, si menolak Kristus jadi Tuhanna denggo mengalami pertobaten ras ngakuken Tuhanta jadi Tuhanna. Sekalai isingetken man banta tanggung jawabta kap sie kerina, dage marilah sidalanken gelah ertambah – tambah ter-realisasi makna kegeluhen si tuhu – tuhu ibas persadannta ras Yesus erkiteken ninta “Lanai Aku Si Nggeluh, Tapi Kristus Kap Singgeluh Ibas Aku”.

Amin.
Pekanbaru 21 Jan 2015

Pekan Penatalayanan Wari III.. “Malem Me Ate Kalak Si Ndalanken Kekelengen” Mzm 112 : 1 – 9

Suplemen Pekan Penatalayanan Wari III. 20 Januari 2015

Khotbah : Mazmur 112 : 1 – 9
Thema : “Malem Me Ate Kalak Si Ndalanken Kekelengen”

Shalom.

Kegeluhenta selaku anak – anak Tuhan labo hanya guna memuji Tuhan tapi pe arus memiliki karakter Tuhan Yesus dingen mpraktekkenca ibas kegeluhen si tep – tep wari ras kalak si bage perbahanenna nge maka ia tuhu – tuhu mpemuliaken Tuhan dingen patut i gelari kalak kristen erkiteken kerina kegeluhenna i abdikenna guna perbahanen si mehuli si ngena ate Tuhan.

Mazmur 112 : 1 – 9 bahan perenungen Pekan Penatalayanenta wari si III ken enda ngajak kita gelah “mewujudnyataken” kerina “Karakter” Dibata ibas dirinta, subuk e ibas gereja, keluarga ras i tengah – tengah masyarakat dingen eme pengarapenta jadi ibas kita ngelakoken Pekan Penatalayanenta wari enda, guna sie mari si gar – gari si isingetken ibas Mzm 112 : 1 – 9 si jadi perenungenta :

• Kitab Mzm enda nuriken kerna pasu – pasu Tuhan man kalak singgeluh ngikutken kerina perentah Tuhan, tapi amin bage gia kerina pasu – pasu Tuhan labo idat bage – bage saja, tapi arus memenuhi persyaraten si isehken Tuhan. Lit pe persyaraten si isingetken ibas Mzm enda eme arus ermeriah ukur ibas ngikutken kerina perentah – perentah Tuhan. Kata “meriah” enda ningetken la lit unsur paksaan tapi sesekalak merincuh kel kin megiken kata Tuhan ras ngerenungkenca guna idalankenna ibas kegeluhen si tep – tep wari. Cataten : Ibas Bahasa Indonesia ikataken “Takut” : Takut e iertiken kita tuhu – tuhu erkemalangaen (menghormati) man Tuhan ras la lit sitik pe ukurta guna melanggar perentahNa dingen erusaha kel ngelakokenca alu menyadari maka kita anak Tuhan kap si arus nggeluh ibas terang kemulian Tuhan.

• Mzm enda pe sekaligus membentuk pribadinta si berkwalitas eme jadi kalak bujur, ngasup bersikap adil, perkuah, perkeleng, ngasup pepinjanken, bujur ibas kerina urusen, la perbiar, melumbar seh maka dirinta jadi kalak si berintegritas.

• Mzm enda pe ningetken belinna pasu – pasu si isehken Tuhan man kalak si nggeluh ibas ngikutken perentah Tuhan, lit pe pasu – pasu si isehken Tuhan eme anak – anakna ras kerina kesusurenna jadi kalak si erkuasa, ertina janji Tuhan e la hanya man sada generasi tapi terus man generasi berikutna (ay.2), isi jabuna jadi kalak bayak namura, ertina Dibata mereken kerina keperlun kegeluhen alu simpar (ay.3).

Bageme pe Mzm ningetken man banta kerna kalak si nggeluh ngikutken Tuhan ndatken erbage – bage kesenangen kegeluhen eme ibas ndalanken perentah Tuhan, ulihna dirina selaku pribadi semakin berkualitas janah kegeluhen si berkualitas e perehken si mehuli, subuk ibas jabu, gereja ras masyarakat janah lebih asa sie ndatken pasu – pasu si rehna ibas Tuhan nari si la ngasup manusia merekenca.

Tema Pekan Penatalayenta ibas wari enda “Malem Ate Kalak Si Ndalanken Kekelengen”, tema enda ningetken maka lit me perulihen ntah hasil ibas kita nehken kekelengen eme ngaloken kemalemen ate si rehna ibas Tuhan nari dingen kalak si ngaloken kekelengenta pe tentu malem atena ras lebih asangken sie Dibata terpuji ibas kerina kemulianNa.

Dage enggo seh paksana kita selaku anak – anak Tuhan encidahken kerina biak – biak simehuli ras nehken kekelengen alu tuhu – tuhu “STOP PENCITRAAN DIRI” ras lakokenlah kekelengen labo guna meningkatken citra diri tapi si sehken kerina kekelengen erkiteken bage kin biakta. Ibas Perb 5 : 1 – 11 isingetken kerna Ananias ras Safira si hanya ersura – sura meningkatkan citra diri ibas nehken kekelengen, pencitraan diri si maksudken ijenda eme, erkiteken ananias ras Safira menipu rasul Petrus ibas erga taneh si idayakenna, sementara ibas jemaat Ananias ras Safira ndatken pujin sebab pang ia ndayaken tanehna guna keperlun kalak si deban. Cataten : Rasul Petrus labo ngenehen buena ntah hasil erga taneh si ibereken Anansia ras Safira, tapi rasul Petrus mpersoalken “Niat ras Motivasi” Ananias ras Safira, si atena hanya i idah sebage kalak si dermawan, memiliki jiwa Sosial, rsd. Ananias ras Safira lupa maka i lebe – lebe jelma si entrem “Niat ras Motivasi” e la teridah, tapi ibas Tuhan sie tangkas kap ras adi Tuhan menetapken standar si seri bagi man Ananias ras Safira man banta mungkin saja kita pe enggo mate, tapi bujur ninta man Tuhan sebab ibas keleng ateNa tetap iberekenNa kesempaten man banta guna banci ngelakoken kai si ngena ateNa, nehken kekelengen man kerina manusia labo erkiteken “PENCITRAAN DIRI” tapi erkiteken kita sekalak pribadi si berkwalitas si ngelakoken kekelengen erpalasken pribadi Yesus si nggeluh ibas kita.

Malem dage ateta ibas kita nehken kekelengen erkiteken kita gambaren Kristus kap, enterem denga genduari si membutuhken kehadirenta, emaka ibas setiap profesinta mari si sehken dage kekelengen e, ula tertaren – taren, erkiteken tupung kalak muas nge sekalak membutuhken sentaktak lau guna melepasken dahagana, si pergunakenlah kesempaten si lit ras Tuhan si masu – masu ibas kita ngelakokenca.

Amin.
Pekanbaru 16 Januari 2015

Pekan Penatalayen Wari II “Dibata Nehken PadanNa, Tetap Ukurta” Josua 21 : 43 – 45

Suplemen Pekan Penatalayen wari si II ken 19 Jan 2015
Tema : “Dibata Nehken PadanNa, Tetap Ukurta”
Ogen : Josua 21 : 43 – 45

Shalom

Adi kita ngerana kerna perpadanen, maka la banci lang kita arus tuhu – tuhu memuliaken Tuhan sebab Ia ngenca si tetap setia nehken padan si enggo ipadankenNa. Man bangsa Israel Dibata erpadan janah kerina perpadanen e isehkenNa mulai kin Ia erpadan man Abraham, Ishak ras Jakup (Kej 12 : 7). Ibas perpadanen Dibata man bangsa Israel ibassa pe lit tindaken si isehken Dibata eme nemani ras memelihara sebagai tindaken si nyata entah sebage “Perwujudan” padan Dibata man bangsaNa dingen sada pe la lit perpadanenNa e si la isehkenNa (Ay. 45), lit pe perpadanen si isehken Dibata man bangsa Israel si isingetken ibas oraten Pekan Penatalayanenta ibas berngi si peduaken enda eme :

• Dibata mereken taneh Kanaan guna i ingani bangsa e kidekah bangsa e tetap setia nggeluh ngikutken Tuhan (Ay. 43).

• Bangsa e i pulahi ibas kerina kiniseran ras ndatken keamanen ibas ngiani taneh si ibereken Tuhan Ay. 44).

Alu bage Josua 21 : 43 – 45 enda eme penggenapen perpadanen Dibata man bangsaNa ras encidahken pemeliharan ras penemani (Penyertaan) Dibata si serta. “Pemeliharan ras Penyertaan” Dibata man bangsa e tentu labo hanya sepihak ibas Dibata nari tapi pe menuntut gelah bangsa e tetap setia ras ngikutken kerina perentah Dibata ibas ketetapen ukur maka Dibata ngenca si patut i sembah bagi si ilakoken Josua ras keluargana (Bd. Jos 24 : 15).

Kegeluhen ibas zamanta sigenduari pe menuntut kesetianta ersembah man Tuhan ibas kerina ketetapen ukurta maka Dibata ngenca Tuhan si tetap setia nemani ras memelihara kalak si erpengendes man baNa. Amin bage gia banci jadi ibas melala hal si erbahanca bene kiniteken ras pengarapenta man Tuhan, umpamana :

• Reh tutusna ateta ngikutken Tuhan maka reh buena kiniseran ntah perbeben si reh nderpa kegeluhenta ras tempa – tempa kita siakap si liahna.

• Morah ateta nanadangi kegeluhen enda sebab lalap lenga sukses, sementara si idah kalak sideban si labo atena tutus ibas ngikutken Tuhan sukses kegeluhenna secara ekonomi.

• Penakit reh ngerim – rim ras lalap la malem – malem.

• Kita itadingken teman geluhta, sementara paksana kel kita membutuhken teman nggeluh sinampati kita ibas ndalani kegeluhen ras ngaturken kegeluhen jabu.

• Rsd.

Ibas sie kerina ula bene kiniteken ras pengarapenta ras tetapkenlah ukurta, sebab seh ngayak genduari Dibata tetap nge erdahin ras mperdiateken kerina kegeluhen anak – anakNa. Adi nulih kita kubas sejarah perdalanen kegeluhen Bangsa Israel, maka perdalanenna pe labo mulus, bangsa e ngenanami kiniseran si seh kel suina ibas taneh Mesir, ndarat i Mesir nari arus erdalan kidekah 40 thn bangsa erdalan i padang gurun maka seh i Mesir, ibas masa pengembaran e pe melala musuh si man hadapen, melala kesusahen ibas ngelitken kebutuhenna, tapi amin bage gia pengarak – ngarak Tuhan man bangsa e, la ngadi – ngadi seh bangsa Israel ndatken kerina kai si iperlukenna, bangsa Israel la perlu erperang guna ngeruntuhken tembok Jeriko dingen ibas setiap lit pe peperangen si ihadapina Dibata me sinemani bangsa e guna naluken musuhna, ibas keperlun kegeluhen, Dibata nikapkenca alu sampur alu mereken lau man inemen, pangan siman panganen, tiang embun tupung erdalan ibas ciger wari ras tiang api tupung erdalan ibas berngi, ertina bangsa Israel la pernah kemalun ibas bangsa – bangsa sideban nari dingen kerina e isehken Dibata erkiteken kuasa ras keleng man bangsa si ikelengiNa.

Ibas geluhta enda pe jadi me pagi ibas paksana bagi siterjadi man bangsa Israel, tapi guna mencapai sie, penting kel si ingetken mulihi man banta, bagi Josua mindo perpadanen bangsa Israel i dataren Moap sebage peneguhen ras ketetapen ukur gelah ersembah man Dibata si sada saja, tentu kita pe netapken ukurta ersembah man Dibata saja ras nimai kuasaNa seh man banta (Josua 24 : 15 – 16), sebab kita pe bangsa si kerjangen Dibata kap dingen perpadanenNa tetap kap seh ngayak genduari ras man kalak singakuken Ia selaku Tuhan ras pasti isehkenNa kuasa ras keleng ateNa man kalak si erpengendes man baNa alu tutus.

Salah sada lagu ibas Kitab Ende – Endenta No 75 alu judul “Tetapkenlah Ukurta” cukup familiar man banta, emaka mehuli kel adi lagu e si endeken guna mpetetap kinitekenta, Sebab kalak si ngikutken Yesus alu tutus, setia ras ndalanken kerina perentahNa pasti ndatken kemalemen ate si rehna ibas Ia nari si laterukuri kita (Bd. Plp 4 : 1), emaka mari ibas pekan Penatalayenta wari si peduaken enda si pegegehi ulihi kinitekenta ras lebih tetap ukurta ngikutken Tuhan sebab Ia ngenca Tuhan si tuhu – tuhu singasup menjawab kerina persoalen kegeluhenta, tetapkenlah dage ukurta sebab isehkenNa me padanNa.

Amin.
Pekanbaru 15 Jan 2015.

Pekan Penatalayen I. Kej 12 : 1 – 3 “I Dilo Guna Jadi Pasu – Pasu”.

Suplemen Pekan Penatalayanen Wari si I 18 Jan 2015

Ogen : Kej 12 : 1 – 3
Tema : “I Dilo Guna Jadi Pasu – Pasu”

Shalom.

Wari enda berngi si pemena kita ngelakoken erbahan Pekan Penatalayanen ibas gerejanta alu tema umum “Lanai aku si nggeluh, tapi Kristus kap si nggeluh ibas aku” (Gal 2 : 20a), tema enda encidahken dirinta enda tinepa si mbaru kap, alu bage maka kegeluhenta lanai i pengaruhi cara kegeluhen doni, tapi jadi saksi Tuhan, pemancar kemulian surgawi i doni enda ibas kerina persadanta ras Kristus.

Tahun enda gerejanta GBKP mencanangken tahun “Peningkatan Sosial, Ekonomi Ras Budaya Jemaat”, ibas pemikirenku lit 3 hal si ijembaken man banta arah tema umum Pekan Penatalayenenta tahun enda, eme :

1. Selaku anggota jemaat (baca : GBKP), kehadirenna “ernanam” min man kerina manusia, seh maka “nanamna” e banci erbahanca kegeluhen kalak si deban reh ulina ras berita si meriah e tuhu – tuhu ergema ibas doni enda.
2. Tema enda pe sekaligus Pendilo man banta ibas nehken tanggung jawabta selaku warga gereja si nggeluh ibas persadaaan ras Kristus Yesus. Ibas Lukas 4 : 18 – 19 isingetken maka Yesus mengemban tanggung jawab e (Baca : “Peningkatan Sosial, Ekonomi Ras Budaya Jemaat” alu nina “Kesah Tuhan lit i baboku, sebab enggo ipilihNa Aku guna meritaken berita si meriah man kalak musil. IsuruhNa aku erberita man kalak si tertaban maka i pulahi me Ia, janah kalak si pentang erpengidah me, kalak si itindas i pulahi me. Janah mpebetehken masana Tuhan mulahi bangsaNa”, sebab enterem memang kalak si la ndatken teman ntah penampat ibas paksa ia membutuhken pertolongen, dorongen ras merasa di tinggalkan. Tentu ibas keadaan sibagenda me tahun enda, iarapken lit peningkaten fungsinta selaku terang ras sira doni sebage akibat kegeluhenta si bali ras Yesus dingen panggilen e arus i benaken lebe ibas dirinta sendiri (baca : gereja) sebab la mungkin kita ngelakoken si mehuli, adi ibas dirina sendiri la mehuli ras memang enggo seh paksana kita (gereja) muat bagin ibas kerina dahin si mehuli, menghidupi kegeluhen jemaat ras kalak si deban seh pagi paksa Kristus reh peduakaliken ibas kemulianNa.
3. Alu bage ku lebe enda GBKP (baca : Perpulungen) selaku tubuh Kristus arus memaknai keterpanggilenna i tengah doni si dem alu tantangen ras pergumulen, alu ngelakoken erbage – bage program si terkait kubas isu “Peningkaten Sosial, Ekonomi Ras Budaya Jemaat” sebage bagin si utuh si la terpisahken ibas pendahin tri tugas gereja eme Koinonia, Marturia ras Diakonia.

        Bahan oratenta Kejadin 12 : 1 – 3 nuriken kerna pendilo Tuhan man Abram. Pendilo e bersifat personal janah pendilo e i ueken Abram sebab tek ia man Dibata si ndilo ia guna nandingken kutana. Sebagai cataten man banta maka Abram situhuna ibas kutana i Haran enggo me kalak si bayak. Sejarah nuriken maka bapana eme kalak si bayak seh maka ibas rumahna saja, lit 400 kamarna. Alu gambaren sie maka banci sibayangken, la mungkin sekalak musil lit 400 kamar ibas rumahna. Tapi amin bage gia, kebayaken orang tuana la erbahanca surut ukur Abram megi pendilo Tuhan, iuekenna pendilo Tuhan janah pendilo si secara personal ndai pe langsung ijadikenna jadi pendilo umum ertina la ia saja si atena ngaloken pasu – pasu ibas Tuhan nari, emaka i sehkenna pe pendilo e man ndeharana Sara ras anak senina Lot ikut ras ia. Alu bage banci si kataken maka ibas tahap awal pendilo si seh man Abram maka langsung ijadikenna pasu – pasu man kalak sideban.

       Keberanian Abram ibas nehi pendilo Tuhan e patut si pujiken, sebab ibas pendilo e situhuna Abram nandingken zona nyaman ibas geluhna i Haran ras orang tuana. Tapi erkiteken pendilo e reh ibas Dibata nari Abram pang nadingken zona nyamanna ras menyerahken kegeluhenna ibas erpengarapen ras tek nandangi perpadanen si isehken Tuhan man bana bagi si isingetken ibas Kej 12 : 1 – 3 eme :

• Nggeluh i negeri si ituduhken Tuhan. Padahal ia sendiri la meteh ija negeri si ipadanken Tuhan e man bana. Tapi erkiteken kinitekenna, Abram berkat nandingken kutana, lawes ku negeri si ipadanken Tuhan. Tindaken Abram enda sekaligus jadi penjemba man banta ibas kinitekenta gelah kita pe ngusih kiniteken Abram si tuhu – tuhu mempercayaken masa depanna man Tuhan. Tentu saja kita pe ibas masanta si genduari enda adi kita tuhu – tuhu menyerahken masa depanta man Tuhan maka Ia pasti mereken si mehulina man kalak si tek man baNa saja.
• Lit hal penting si arus si perdiateken ibas perpadanen ibas Tuhan ras Abram ibas ayat enda, Abram sekaligus ndatken dua pemere ibas Tuhan nari si seh kel ergana eme perpadanen ras pasu – pasu Tuhan, janah si penting kel pe maka Tuhan sendiri si melasken perpadananen e man Abram, ibas erti kata Dibata sendiri si mengiket diriNa ras perpadenNa ras Abram. Alu bage maka Dibata bertindak ibas kai si atena ilakokenNa ras perlakuanNa e sue ras kuasa ras keleng ate si lit ibas Ia. Tentu perlakuan Dibata man Abram pe jadi penjemba man banta ibas kegeluhenta sigenduari enda, sebab man banta pe esah kap padan Dibata e sebab kita pe kesusuren Abraham kap si ipeku anak ibas Kristus Yesus Tuhanta, tentu ibas kita lebih erpengendes man baNa, maka Dibata pe mereken erbage – bage pasu – pasuNa si simpar man banta.
• Perpadanen Tuhan ras Abram pe meningkat kubas Abram sendiri, eme si isingetken ibas ayat 3 “Kupasu – pasu kalak simasu – masu kam, tapi kusumpahi kalak si numpahi kam, janah erkiteken kam, kupasu – pasu kerina bangsa – bangsa”. Ibas ayat enda Dibata ningetken man Abram maka Dibata tuhu – tuhu engkelengi Abram, ertina pasu – pasu Tuhan e reh belinna adi kune Abram pe jadi pasu pasu man kalak si deban janah kalak si numpahi Abram i sumpahi Dibata. Alu bage Abram tuhu – tuhu makeken fungsina sebage perpanjangen Dibata.

        Kinitekenta ngakuken maka Dibata me sebage sumber, pemilik ras pemberi pasu – pasu man banta ras kerina pasu – pasu e isehken Dibata man banta erkiteken Dibata enggo erpadan maka Ia tetap engkelengi manusia (kalak si tek). Ibas pemahamen si enda maka kita sebage penerima pasu – pasu pe la hanya banci terjeng “Penikmat Berkat” tapi uga ka kita banci jadi pasu – pasu man kalak sideban (Bd. Kej 12 : 1, 22 : 18. Luk 12 : 13 – 21, Perb 5 : 1 – 11) ertina tupung Dibata mereken pasu – pasuNa man banta maka Dibata pe menuntut dirita jadi pasu – pasu man kalak sideban.

        Kerina kita tentu erpengarapen nandangi pasu – pasu Tuhan seh man banta ras mungkin kalak sila waras ngenca la erpengarapen nandangi pasu – pasu Tuhan. Tapi si ingetlah maka kalak si enggo i pasu – pasu pe ndatken “Perintah” guna jadi pasu – pasu man kalak sideban janah sekaligus jadi nafas kegeluhen man bana selaku pengikut Kristus.

     Tema Pekan Penatalayenena ibas wari enda sekaligu jadi panggilen man banta, emaka mari si respon panggilen e sebab kita pe enggo kap ngaloken pasu – pasu ibas Dibata nari, si aplikasiken ibas geluhta ija kita jadi tuhu – tuhu menjadi pelaku firman, labo hanya pengembira saja tapi jadi si maba shalom man kerina jelma. Temata ”Idilo Guna Jadi Pasu – Pasu” siaplikasiken mulai ibas si kitik nari, sibenaken alu mereken 2 ikan ras 5 roti ras pasti lit mujizaat siterjadi, bagi Yesus mere man 500 kalak 2 ngenca roti ras 5 ngenca roti si lit tapi alu kuasa ibas Dibata jadi mbue seh maka kerina kalak si kelihen ibas paksa sie kerina daten pangan. Alu bage dage sibenaken praktekna ku lebe enda arah kai si lit ibas kita sebage tanda kita enggo nggejapken uga belinna keleng ate Tuhan mna banta.

Amin.
Pekanbaru 14 Jan 2015.