Suplemen PJJ GBKP 22 – 28 Feb 2015 Mat 24 : 45 – 51 “Nggeluh Bujur Maba Kemalemen Ate”

Suplemen PJJ GBKP 22 – – 28 Feb 2015

Ogen : Mat 24 : 45 – 51
Tema : “Nggeluh Bujur Maba Kemalemen Ate”

Shalom.

Jadi kalak bujur eme keinginan, harapen ras perayaken sebab ise pe labo nggit ikataken dirina kalak sila bujur, erkiteken sie enterem kalak berusaha ndatken status/sebutan kalak bujur. Tapi apakah kita ndarami status jadi kalak bujur ? tentu lang ! erkiteken kita memang kalak sibujur, sebab biakta kap kalak bujur sue ras tempas Dibata, emaka nggeluh bujur labo hal si asing man banta dingen enggo me sieteh ngelakokenca ras adi lit kalak kristen si la nggeluh ibas bujur, permasalahenna eme ibas kinilanggitenna ngelakokenca :

• ibas kinata kegeluhenta memang sulit ndarami ndarami kalak situhu – tuhu bujur, erkiteken enggo teremen kalak terkontaminasi cara – cara kegeluhen doni janah kejahaten pe tempa enggo sebage “wabah” si lanai tertanggulangi.

• Tuhan pe mekatep isuruh ‘harap maklum’ adi lit sekalak ngelakoken kinilabujuren alu ngataken, adi sekali – sekali nge erbahan jahat Tuhan ah pe maklum nge nina, tempa – tempa Tuhan banci iajak berkompromi guna mentolerir sada kejahaten.

• Perkatan singataken “mesera kin genduari ndarami kalak sibujur dingen Dibata nari ngenca sibujur” pe mekatep ijadiken jadi sada alibi (pembelaan) man kalak siatena ngelakoken kinilabujuren alu mengutip ayat pustaka si badia bagi sitertulis ibas Roma 3 : 10 – 18 “Lanai lit si bujur sada pe lang …” sebage alat pembelaan ibas sekalak si enggo ngelakoken kesalahen ntah kejahaten.

• Pengaruh kebutuhen ekonomi biasana simekatepna jadi alasen utama sesekalak guna ngelakoken kinilabujuren, janah praktek kinilabujuren e teridah ibas sekalak ngelitken keperlun geluhna, ndalanken usaha perdagangen, ibas perkantoren, rsd, dingen cara – cara sila bujur e enggo semal.

• Lit ka pe pembelaan simekatep ibelasken adi lit sekalak la nggeluh ibas kebujuren, eme alu ngateken ‘kurang nge persadanna ras Dibata ntah ngoge kata Dibata seh maka la ietehna kai si ilakokenna e salah’ bageme ninta. Payo tuhu persekutuan ras Tuhan e mpegegehi kinitekenta dingen ningeti dirinta kerna kata Dibata, tapi adi nulih kita ku sejarah kegeluhen kalak Israel, ituriken, bangsa e meteh kerna kata Dibata (Taurat), rajin ertoto ibas sinagoge, ngelakoken puasa, tapi kalak Israel tetap erbahan dosa dingen ngelakoken kejahaten, engkai ? erkiteken meriah kin iakapna nggeluh alu cara – cara doni alu ngikutken peraten daging dingen la mbiar nandanngi Dibata, emaka kita pe, adi labo kin erkemalangen (bc, mbiar) man Dibata, maka kata ajar ras kerina persekutuan si ilakoken sia – sia nge kerina.

Tema PJJ-nta “Nggeluh Bujur Maba Kemalemen Ate” erpalasken Mat 24 : 45 – 51 nuriken man banta kerna keuntungen nggeluh ibas bujur ermalem ate bagepe nuriken perulihen nggeluh ibas kinilabujuren eme ngenanami simesui rasa lalap. Dua perulihen enda me i perhadapken man banta ibas perenungen PJJ-nta alu perumpamaan Tuhan Yesus kerna juak – juak situtus ras juak – juak si la tutus, lit pe pengertin si imaksudken Yesus ibas perumpamaan enda eme :

• Perumpamaan enda nuriken kerna wari penghakimen (eskatologi) simekatep sibelasken alu pengertin wari kiamat. Ndigan kiamat e terjadi labo man ukurenta erkiteken Yesus memang la nuriken ndigan paksa kiamat e jadi, tapi Yesus lebih nuriken kai si arus ilakoken ntah i persiapken kalak si tek ibas nimai wari kiamat e (Mat 24 : 42 – 4. Luk 12 : 40. bd.1 Tes 2: 12; 2 Tim 4: 1).

• Perumpamaan enda pe ningetken kerna hubungen ras sikap antara juak – juak ras tuanNa. Ibas hubungen e iarapken gelah juak – juak tetap setia nandangi tuanna ras ndahiken kerina dahin si endeken tuan e alu tutus, sebab kalak sindahiken – dahin alu tutus malem me atena erkiteken Dibata mereken upah man bana jadi pengawas kerina erta – ertana (ay. 47 – 48) dingen juak – juak sila tutus singgeluh alu erbana – bana mesui me pagi atena rasa lalap (ay. 51). Cataten : Juak – juak ibas perumpamaan enda iertiken ‘budak/pelayan’ (ibr : eved, Jun : doulos) eme sekalak sierdahin guna kepentingen kalak sideban/sierdahin si jadi sikerajangen ras si teriket nandangi tuanna emaka tuan berhak penuh nandangi dirina, tapi ibas pengertin perumpamaan enda juak – juak lebih iertiken kubas pengertin keagamaan eme sikap si ncidahken kiniteruken ukur i lebe – lebe Dibata, kepatuhen nandangi Dibata (bd. Kel 4 : 10. Mzm 119 : 17).

• Kerehen Yesus ibas peduakaliken eme akhir ibas kerina jaman ija Ia jadi hakim ras menghakimi krina kalak sitek ras sila tek, si setia ras sila setia, singgeluh ibas kebenaren ras kejahaten (bd. I Tes 2 : 12. II Tim 4 : 1). Alu bage perumpamaan enda ningetken man banta maka kalak singgeluh ersada ras Tuhan arus tetap setia man Tuhan, ngikutken kerina peratenNa ras arus memiliki sifat fanatisme ibas nggeluhken kegeluhen alu mperbudak diri ibas kebenaren, keadilen ras nehken kekelengen.

Arah pengertin si isingetken kerna perumpamaan ibas Mat 24 : 45 – 51 enda, tuhu malem me dage ate kalak si nggeluh ibas bujur sebab perulihenna la terjeng tupung nggeluh i doni tapi tapi pe ndatken kegeluhen ibas kinirajaan surga. Memang la menukah nggeluh ibas bujur ras banci jadi melala kel tantangenna terlebih ibas jamanta si genduari, tapi si ingetlah maka kegeluhenta labo terjeng doni enda ngenca, lit denga pagi kegeluhen kenca kita nadingken doni enda ras kerina sie pasti, emaka marilah sigeluhken kegeluhen ibas bujur sebage responta nandangi keselamaten si ibereken Dibata man banta, ibas sie dage, silawanlah ungakapen – ungkapen si melemahken dirinta guna nggeluh ibas bujur bagi isingetken arah lebe ; sulit ndarami kalak sibujur, harap maklum, enggo kin jamanna kejahaten meraja lela ras sebage wabah si lanai terbasmi, bagepe labo perlu erbahan pembelaan diri si labo membangun diri alu alasen kai pe, erkiteken kita memang kalak bujur singgeluh ibas panggilen selaku sira ras terang doni.

Amin.
Pekanbaru 23 Feb 2015.

Suplemen PJJ 15 – 21 Feb 2015. I Timotius 4 : 13 – 16. “Ngiah – Ngiahi Alu Tutus”

Suplemen PJJ 15 – 21 Feb 2015

Ogen : 1 Timotius 4 : 13 – 16.
Tema : “Ngiah – Ngiahi Alu Tutus”

Shalom.

Tenah/undangen/pengiahken, umumna ibas kalak Karo seh kel ergana, lit pe piga – piga sibanci isingetken erga tenah ntah pengiahken eme :

• Ibas undangen kerja biasana lit itulisken kata pertenahen, isi tenah biasana “Ersentabi kami man kerina kam sangkep nggeluh kami, arah undangen enda me itenahken kami kam kerina Sukut, Kalimbubu, Anak Beru ras Teman meriah, lako ras – ras kita ermeriah ukur ndugi kerja erdemu bayu anakta, bebere, permen ntah kempundu dingen mbelin kel pengarapen kami kerehenndu kerina lako petunggungken ras mpehagakenca, dingen ibas kerehenndu kerina leben isehken kami bujur”. Sifat tenah enda meherga erkiteken mekatep nge adi sekalak la ndatken tenah megelut dingen la ndahi lakon si arusna ia ije erkiteken la dat tenah, janah khusus man Kalimbubu simada dareh maka labo tenah undangen si isehken ertina tenah si isehken arus erkesehen alu ndahisa ntah ngiahkensa ku rumah sebage tanda kinihamaten man kalimbubu simada dareh.

• Ibas hal sideban adi siperdiateken, kalak karo pe umumna sangat menjaga gengsi ntah harga diri, emaka adi lit sada acara meriah ukur ras lit ka pangan entabeh, adi sekalak la itenahken/la seh kata labo ia reh, erkiteken mela me iakapna reh adi la bekas tenah. Ibas sienda mekatep pe lit turah sikap negatif nandangi simada lakon, emaka banci jadi nina sekalak si la ndatken tenah “mela nge adi la kita itenahken reh kita ndahi kerja meriah ukur, la nge atena kita je”, tapi adi siperdiateken situhuna ibas kalak si la ndatken tenah e lit nge perasaan kecewa erkiteken la ia itenahken ras arus ia ije.

• Umumna pe lit nge pengertinta, sie teridah adi la pe i iahken/ndatken tenah, maka di kune lit “Tenah kerja la erpudun” (simate – mate), maka umumna hadir nge kita lako mereken dukungen moril (bantuan – bantuan yg berupa sokongan batin, yg bukan berupa uang atau benda) man kade – kade ntah temanta, erkiteken rutang siakap adi la kita reh.

• Ibas dampar sideban labo kel siakap meriah adi lalit temanta berkat ibas ndahi sada lakon ntah kuja gia kita lawes, bagepe adi lit sada dahin, simada kerja/tuan rumah kurang ka me iakapna riahna/mehagana adi la enterem jelma pulung erkiteken sie me maka itenahken/iiahken teman/keluaraga ibas litna acara si ilakoken.

Begenda me sitik isingetken kami kerna kultur kalak Karo ibas memahami tenah ntah pengiahken nandangi sada – sada dahin ntah kerja, adi pas carana ibas pengiahken, maka tenah/pengiahken e iergai, tapi di kune la pas maka kata tenah/pengiahken e banci la iergai.

Tema PJJ-nta sekali enda “Ngiah – Ngiahi Alu Tutus” hal sienda situhuna labo mesera ngelakokenca erkiteken “Ngiah – Ngiahi” enggo jadi sada budaya man banta subuk e ibas praktek kegeluhen tep –tep wari. Sue ras tema PJJ-nta mari dage silumbaken budaya “Ngiah – Ngiahi” enda ibas kegeluhen gerejanta simelebihi erti ibas budayanta ras lebih simaknai kubas tugas panggilenta selaku “Perberita Si Meriah” gelah enterem kalak si ndatken keselamaten, bagi persinget Paulus man Timotius tetap tutus ngelai perpulungen gia melala tantangen, ija litna pengajaren palsu si ncedai kegeluhen perpulungen. Pergegeh si isehken Paulus tuhu – tuhu memotivasi Timotius ibas ngelai perpulungen gia ia nguda denga ras erkiteken pergegeh si isehken Paulus me maka Timotius tetap berprinsip, megegeh ibas kiniteken alu ncidahken keteladanen ras kewibawanna ibas kai pe ras nehken tanggu ngjawabna alu mehuli, makeken kesempaten si lit guna ngiah – ngiahi ras ngajari perpulungen alu tujun gelah perpulungen tetap ndatken pengajaren si benar ras tetap setia nggeluh ibas kata Dibata (I Tim 4 : 13 bd. Ul 6 : 1 – 9).

Paulus ras Timotius tetap alu ate tutus ngiahken ras ngajari kerina perpulungen, tentu pe genduari dahin e iwarisken man banta ras jadi tanggungjawabta guna ngiahken perpulungen aktif ibas kerina kegiaten gerejanta (Kebaktin Minggu, PJJ ras PA – PA). Tentu ibas ndalanken dahin e lit nge tantangen terlebih ibas kemajun zaman ija manusia semakin sibuk, sifat malas, sikap la peduli, la ngergaken keselamaten dingen litna masalah – masalah pribadi/keluarga/gereja.

Uga dage ninta ngiah – ngiahi temanta ? melala cara sibaci silakoken genduari, ibas kata perlebe enggo isingetken, kita kalak Karo umumna meherga kel siakap tenah ras meriah nge siakap adi sialoken tenah ntah iahken kita kubas sada kegiaten. Tentu enda jadi modal utama man banta, emaka adi lit denga kin perpulungenta si lenga aktif ibas kegiaten gereja kekurangenta ibas ngiahken nge ntah cara ngiahken si lenga tepat. Temanta ibas minggu enda me aplikasi bahan PJJ-nta ibas dua minggu silewat “Perkunjungen Rumah Tangga” ija ibas kita ngelakoken perkunjungen rumah tangga sekaligus kita ngiahkenca di kune siman kunjungen e lenga tutus ngikuti kegiaten gerejanta. Dage sipakekenlah kesempaten silit guna ngiah – ngiahi temanta terlebih ibas genduari, alu litna alat komunikasi si cukup mendukung guna ngelakokenca gelah reh teremna kita ngenanami kegeluhen ibas persadaan ras Dibata.

Amin
Pekanbaru 13 Feb 2015

Suplemen PJJ Tgl 8 – 14 Feb 205. Kej 5 : 21 – 24. Heb 11 : 5 – 8 “Nggeluh Ersada Ras Dibata”

Suplemen PJJ Tgl 8 – 14 Feb 205

Ogen : Kej 5 : 21 – 24. Heb 11 : 5 – 8
Tema : “Nggeluh Ersada Ras Dibata”

Shalom.
Tema PJJ-nta sekali enda nuriken kerna pentingna “Nggeluh Ersada Ras Dibata” ras sebage sada keharusen terlebih ibas perkembangen zaman sigenduari. Kegeluhen manusia ibas zaman Enoh ituriken jahat labo erkiteken penyembahen berhala tapi erkiteken manusia ngelupaken Tuhan sebage pencipta manusia dingen si arus nggeluh sue ras keinginen pencipta. Enoh i tengah kegeluhen sijahat e berbeda ras kerina kalak si isekitarna, ia tetap erdalan sue ras peraten Tuhan Dibata kidekah 300 thn (ay. 22) dingen erkiteken persadanna ras Dibata me erbahanca ia iangkat Dibata ku surga. Alu bage Dibata pe mereken upah man kalak singgeluh ibas persadaan ras Ia (Ibr 11 : 5 – 6).

Kegeluhen Enoh encidahken man banta cara kegeluhen siberbeda ras kegeluhen manusia ibas zamanna dingen tentu ibas kegeluhenta sigenduari pe ateta tetap encidahken kegeluhen si sejati bagi kegeluhen si icidahken Enoh, seh maka kerina manusia singgeluh i doni enda ngidah, i tengah – tengah kemajuan zaman ija manusia ngelupaken Tuhan sebage pencipta, maka lit denga kalak kristen si sejati si encidahken cara kegeluhen si ersada ras Dibata. Lit pe gambaren kegeluhen si ersada ras Dibata sibanci si praktekken ibas kegeluhenta eme :

• Megiken Dibata ngerana man banta, eme alu cara ngoge ras ngerenungken kata Dibata ibas saat teduhta, hal sienda memang sulit ngelakokenca erkiteken kita enggo terlalu sibuk ras memang enggo jarang kel kita “berdiam diri” merenungken kata Dibata ras banci jadi seni sienda enggo bene ibas kekristenenta, padahal cara sie ndube ipraktekken Enoh ibas kegeluhenna. Kulebe enda cara sienda mari sicubaken cara enda mulihi. Piga – piga agama mpraktekken metode enda ibas carana berkonunikasi ras dibatana, Hindu/Budha ngelakokenca alu cara ermeditasi, kalak Jepang ibas waktu – waktu tertentu ngadi ibas kerina aktifitasna jenari menghadap Matahari guna nginget kehadiren simahakuasa ibas geluhna, kalak Jahudi si ertoto 3 kali secara khusus ibas tep – tep wari, rsd. Lit metode si enggo si praktekken i RC Suka Makmur, si ikembangken Pdt. Chrismas Imanta Barus MTh. ija ibas waktu tertentu ibas lokasi RC adi si begi lonceng erkata i Capel, maka kerina aktifitas i pengadi, alu tujun kita melupaken entisik kerina kesibukenta (aktifitas) ras ngataken bujur man Dibata sitetap mereken kegeluhen si sangana sidalani. Enda salah sada cara sibanci sikembangken ibas diri pribadinta ras tentu lit denga cara sibanci silakoken sue ras situasi ras kondisi kegeluhenta, alu tujun ibas paksa kai pe tetap si inget Dibata. Alu bage situhuna nggeluh ibas persadaan ras Dibata labo hal sulit, sipenting lit kesedianta ibas makeken waktu guna ngerenungken ras megiken Dibata ngerana man banta.

• Nggeluh ibas persadaan ras Dibata, tentu pe iertiken nggeluh ibas terang kata Dibata. Enoh ikataken erdalan ibas dalan Dibata (ay.24) ertina kai pe si ilakokenna sue ras peraten Dibata. Kai si ilakoken Enoh situhuna banci siperaktekken ibas kegeluhenta dingen kalak singgeluh ermalangen man Dibata memang arus ngelakoken sie. Lit sada persinget sederhana tapi mbages pengertinna, si isehken sekalak teman FB, Pt. Robert N Tarigan, nina ibas statusna FB-na : “Kalak malas erdahin, kita ula merawa Tuhan Yesus”, “Kalak erlumba ndatken jabaten ibas pendahin alu nyogok, kita ula merawa Tuhan Yesus”, rsd. Kata enda memang sederhana tapi mbages kel pengertinna “merawa Tuhan Yesus” adi siperdiateken pengajaren Pustaka si Badia maka kata enda me sirusur isingetken man banta, saja mekatep la kita mediate nandangi persinget Dibata e, tempa lanai kita mbiar nandangi rawa Dibata, ija kita erate – ate kita ndalani kegeluhen enda. Oraten PJJ-nta enda adi siterusken sioge kubas pasal 6 i turiken Dibata encidahken “rawaNa” nandangi kalak sila ndalanken kataNa.

• Ibas praktek kegeluhen kai dage tanda – tanda sikataken dirinta nggeluh ersada ras Dibata ? secara sederhana banci sikataken gia e labo jadi ukuren tapi ibas praktekna banci si idah ibas kegeluhen tutus ergereja, ngikuti PA, ngoge Pustaka si Badia ras ngertikenca, tutus ertoto, nehken kekelengen, rsd, ertina labo banci sekalak ngatakenca dirina lit ibas persadaan ras Dibata adi labo kin teridah ibas praktek kegeluhen si icidahken arah persekutuan ras Dibata.

Dage nggeluhlah ibas persadaan ras Dibata dingen tetaplah erdalan ibas dalan Dibata, kalak perdosa nge meriah iakapna erdalan ibas dalan doni ras reh dauhna me ia papak, tapi kalak si erdalan ras Dibata malem me atena sebab Dibata nuduhken dalan siarus ibentasina. Tek kita dalan situduhken Dibata mereken keriahen gia ibas praktekna banci jadi la mulus, melala tantangen, tapi adi tetap ukurta Dibata ka me sinemani, simereken gegeh man banta guna ndalanisa, Daud ibas perdalanen kegeluhenna meyakini penegu – negu Dibata emaka ibelaskenna ungkapen kinitekenna “KataNdu kap tendang man naheku, nerangi dalan sikudalani” (Mzm 119 : 105).

Enoh ndatken hasil si melebihi kerina hasil si idarami manusia ras la terjeng kubas dirina tapi kerina kesusurenna pe ipasu – pasu Dibata alu ndatken keselamaten tupung Dibata engkernepken kerina kalak jahat (bd. Kej 6. Jud 1 : 14 – 15). Alu bage ibas hasil akhir, Enoh lebih berbahagia asangken kerina manusia si ndube ndatken kesenangen sementara i doni. Dage tetaplah kesetianta nggeluh ibas persadanta ras Dibata dingen tek kita seh asa genduari Dibata memelihara ras nikapken simehuli man kalak situhu – tuhu erkemalangen man baNa (Mzm 104 : 10 – 32. Kol 1 : 17) ras menjajiken kegeluhen sirasa lalap si nggeluh ibas persadaaan ras Ia (Yoh 3 : 15 – 16).

Amin.
Pekanbaru 06 Feb 2015

Cataten :
Lit empat si isaksiken Pustaka si Badia kerna kenangkihen ku surga janah kerina kesaksin e jadi penjemba man banta gelah kita pe banci lebih ngerembakken dirinta ras Dibata, erkiteken tujun akhir kelegeluhen kalak si erkiniteken eme nggeluh ibas kinirajan surga, lit pe empat kesaksin Pustaka si Badia e eme :

1. Enoh, la mbue ituriken kerna kegeluhenna ibas Pustaka si Badia, ia erumur 365 thn dinbgen ia me sipemenana ituriken nagkih ku surga. Enoh si iangkat ku Surga erkiteken ia nggeluh ersada ras Dibata ija kerina perilaku kegeluhenna ngena ate Dibata, ertina Enoh labo sekalak matrealistis si berorentasi kubas erta doni, menikmati kenikmaten nafsu kedagingen ras melupaken Tuhan, tapi ia hanya erorentasi kubas kegeluhen singena ate Dibata (Kej 5 : 22 – 24. Ibr 11: 5).
2. Musa, pemimpin si mbelin si mabai bangsa Israel ndarat i Mesir nari, simenuntun bangsa Israel kidekah 40 thn ibas perdalen i padang gurun, sebage sekalak si meteruk ukurna dingen ukurna simeterukna ibas kerina manusia ibas doni enda (Bil 12 : 3), ayona sincidahken sinalsal Dibata (II Kor 3 : 7), erkuasa ibas kata ras perbahanen (Perb 7 : 22), erkiteken keleng ate Dibata maka Musa pe iangkat ku Surga (Bd. Ul 34 : 5 – 6. Mat 17 : 1 – 13).
3. Elia, sekalak nabi si ipake Dibata alu luar biasa ibas masa kenabianna si teridah ibas kuasa si ibereken Dibata man bana guna pegeluhken kalak si enggo mate tupung Elia pegeluhken mulihi anak janda miskin i Sarfat (I Raj 17 : 7 – 16), naluken 450 nabi – nabi Baal i gunung Karmel (I Raj 18 : 22 – 40), rsd. Tapi si pasti Elia pe ituriken nangkih ku surga (II Raj 2 : 11).
4. Yesus, eme kap Tuhan (Flp 2 : 6 – 9), nusur i surga nari (Ef 4 : 10), nangkih ku surga kenca ndungi kerina pendahinNa i doni ras nikapken ingan man si enggo i tebusNa i kayu persilang (Yoh 14 : 1 – 3). Yesus nge erkuasa nandangi kerina sinasa lit, neraka i teruh tapak – tapak nahenNa dingen Ia nge ngenca si pernah nurur ku neraka ibas kematenNa i kayu persilang (I Ptr 3 : 18 – 20, bdk. Pengakun kinitekenta), ertina kerina nabi – nabi ras rasul – rasul la pernah nusur ku neraka. Nginget sienda ateku nuriken salah sada kesaksin KKR siberkembang genduari eme “A Trip To Hell” si ipinpin Pdt.P.M (gereja MS) sebagai sada kesaksin palsu ras pengajaren palsu. Pustaka si Badia nuriken Yohanes ajar – ajar si ikelengi Yesus pe la pernah nusur ku neraka, tapi hanya ngidah pengenehenen kerna kinirajan surga alu tujun peneguhen pengajaren kerna kinirajan surga (Ket 1 : 10 – 11), bagepe Paulus sekalak si tuhu – tuhu erspiritualitas si tinggi la pernah nuriken dirina i utus Dibata ku neraka, kemegahen si ibereken Dibata man bana eme ngidah pengenehenen (II Kor 12 : 1 – 10) alu tujun peneguhen kerina pengajarenNa. Alu bage perlu ka nge kita hati – hati ibas megiken pengajaren – pengajaren siberkembang genduari enda, gelah alu bage pemahamenta kerna Pustaka si Badia la salah (bd. Ket 22 : 18 – 19).