Suplemen Bahan PJJ GBKP (Tanggal 22-28 Maret 2015) “KESELAMATEN SI TUHU-TUHU” Epesus 2 : 1 – 10

Suplemen Bahan PJJ GBKP
(Tanggal 22-28 Maret 2015)

“KESELAMATEN SI TUHU-TUHU”
Ogen : Epesus 2 : 1 – 10

A. LATAR BELAKANG
Surat Epesus enda isuratken rasul Paulus man anak-anak Dibata i Epesus, kalak si tutus i bas kegeluhenna i bas persadan ras Kristus Jesus (1:1). Surat enda isuratken Paulus i Roma (+ tahun 60-62 M), asum ia i bas penjara nimai ukumen idabuhken (3:1; 4:1; 6:20). Paulus nandai mehuli perpulungen i Epesus, pemena asum ia reh ku je (Perb. 18:19-21), ras asum ia tading i Epesus sekitar 2 tahun dekahna meritaken Berita Si Meriah ras erbahan tanda-tanda sengget (Perb.19:1-10). Epesus e me kota perdagangen si cukup mbelin i Asia Kitik, seh maka semangat materialisme merajalela luar biasa, janah kota e pe termurmur erkiteken jadi pusat penembahen man dewi Artemis ras dewi Diana, i ja pelacuren isahken ras ianggap badia erkiteken si e ilakoken asum ersembah man dewi-dewi itu. Alu latar belakang si e me Paulus nuratken surat enda, guna petangkas uga arusna posisi ras ras tanggung-jawab ajar-ajar Kristus.

B. I S I
Bahan PJJ-nta perikop Ep. 2:1-10 enda ngerana kerna keadan pertendin i bas Kristus. Ay. 1-3 nuriken uga kondisi manusia ope denga iselamatken. Si jadi subjek ras kata kunci i jenda e me ‘Dibata’ ras ‘Kristus’, alu 3 kata kerja utama e me ‘ipegeluh’ (ay. 5), ‘ipekeke’ (ay. 6) ras ‘ipekundul’ (ay. 6); alu obyek ‘kam’ (ay. 1-3) ras ‘kita’ (ay. 4-7). I jenda siidah Paulus make perbandingen si bertentangen kerna keadaan ope ras kenca enggo jadi ajar-ajar Kristus, e me maka Dibata mpekeke kita mulihi ibas kematen erkiteken dosa ras mereken ingan man banta ras Jesus Kristus i bas ingan si meganjang i Surga. Janah banci siidah tangkas kai si ituriken Paulus kerna keadan i bas paksa si enggo lewat (ay. 1-3), genduari (ay 4-6) ras pagin (ay 7) i bas kegeluhen ajar-ajar Kristus.
Ay. 1-3 > Berita si la meriah: mate i adep-adepen Dibata!

Cara Paulus nggambarken keadan ope jadi kalak Kristen, tuhu-tuhu ngeri. Penekanen nandangi kata ‘mate’ (secara pertendin), erkiteken salah ras dosa (ay. 1), la nggit erkemalangen man Dibata tapi ngikutken kuasa-kuasa si jahat (ay. 2) ras nggeluh rikutken sura-sura kula ras ukur (ay. 3). Si enda erbahanca maka arusna kita ngenanami pernembeh ate Dibata (ay. 3b). Arah gambaren enda, Paulus mpersingeti uga erdosana manusia e i adep-adepen Dibata alu cara geluhna seh maka manusia perlu Juruselamat i bas la litna dalanna pulah ibas pernembeh ate Dibata nari e.

Ay. 4-7 > Berita si meriah: ipekeke Dibata!
Cara Paulus nggambarken keadan kenca jadi ajar-ajar Kristus, tuhu-tuhu maba keriahen. Telu pemere si mbelin si banci sialoken e me: kita ipegeluh mulihi (ay. 5), kita enggo ipekeke ras ipekundul i bas ingan si meganjang i Surga (ay. 6). Si jadi kunci utama ibas tep-tep pemere si mbelin si ipetangkas Paulus i jenda e me Jesus Kristus – “ipegeluNa kita mulihi radu ras Kristus”, “ibas persadanta ras Kristus Jesus, ipekeke Dibata kita ras Kristus Jesus”, “janah ipekundulNa kita ras IA i bas ingan si meganjang”. Si enda itutup Paulus alu ngataken maka “Si enda ibahan Dibata gelah seh rasa lalap icidahkenNa kiniulinNa si lanai kal lang-lang belinna, e me lias ateNa man banta i bas Kristus Jesus” (ay. 7).

Alu ngenen ras ngidah perbandingen antara berita si meriah ras berita si la meriah si tersena i jenda ndai, banci siangka maka peran utama kerna keselamaten e, labo bekas perbahanen manusia, tapi Dibata nge si bertindak mereken keselamaten e. Kerna si enda tegas ipersingeti Paulus ibas Ep. 2:8-10, “Sabab erkiteken lias ate Dibata nge maka kam enggo terkelin, erkiteken tek kam man Kristus. Labo bekas perbahanenndu, tapi pemere Dibata kap e. Labo ulih pendahinndu e, e maka labo lit dalanna ise pe muji bana. Tinepa Dibata kap kita; i bas persadanta ras Kristus Jesus, ijadikenNa kita guna ndahiken dahin-dahin si mehuli si enggo leben irencanakenNa, gelah sidahiken e.”

C. PENGKENAINA
1. Guna banci nggeluh selaku ajar-ajar Kristus, kita arus nggejapken keadanta ope denga jadi ajar-ajar Kristus, e me mate secara pertendin. Adi enda la sigejapken ras la siidah uga kegeluhenta ope jadi ajar-ajar Kristus bagi siigambarken i bas Ep. 2:1-3, maka labo lit pengataken bujurta nandangi keadanta genduari si enggo nandai Kristus, janah si e ngulihken kita ku bas kematen pertendin alu mulihi nggeluhken kegeluhen si male – nggeluh ndauh ibas Kristus. Arah lias ate ras perkuah ate Dibata ngenca kita ngaloken keselamaten dingen kegeluhen si tuhu-tuhu, ngataken bujurlah katawari pe.
2. Selaku ajar-ajar Kristus, kai si enggo ibereken Dibata man banta, tuhu-tuhu luar biasa janah genduari enda enggo sialoken, e me kegeluhen, kekeken ras ingan i Surga ras Jesus Kristus. Nggejapken lias ate Dibata e, erbahanca kita kita mela mulihi nggeluh i bas kegeluhen si male, erkiteken kita ngaloken pasu-pasuNa si luar biasa. Tapi ola pasu-pasu enda erbahanca kita lupa diri ras hanya ngenanami status enda alu la erbahan kai pe, alu tetap nginget kai si ikataken Jesus Kristus, “Labo kerina kalak si erlebuh man bangKu, ‘O Tuhan, Tuhan!’ bengket ku bas Kinirajan Surga, tapi kalak si ngelakoken rikutken si ngena ate bapangKu i Surga nge bengket ku bas Kinirajan e” (Mat 7:21). Nggeluh rikutken si ngena ate Dibata, e me si arus tetap si-‘amin’-ken i bas geluhta, kita selaku ajar-ajar Kristus!

Amin.

• Tulisen bahan PJJ-nta si kumuat enda eme tulisen kekelengenta Pdt. Jepta Pelawi. Si aktif pe nulis Suplemen guna banci reh buena refrensi man banta.
• Sentabi aku man kerina kekelengen kami, si mengunjungi blog enda guna nambahi bahan refrensinta guna bahan PJJ. Ibas piga minggu enda aku la sempat nulisken Suplemen bahan PJJ-nta erkiteken kesibuken si lit i tengah – tengah pelayanen gerejanta. I usahaken kami nulis bagi biasana. Bujur ras mejuah – juah kita ibas pengertinta. Tuhan simasu – masu

Suplemen PJJ GBKP 08-14 Maret 2015 “KINIERBAGEN KAP KEBAYAKEN” I Korinti 12 :14 – 26

Suplemen Bahan PJJ GBKP Tgl 08-14 Maret 2015

Tema : “KINIERBAGEN KAP KEBAYAKEN”
Ogen : I Korinti 12 :14 – 26

“Gelah kula e la erbelah-belah, tapi sada-sadai ringring e radu seri mperdiateken ringring si deban” (1 Kor. 12:25)

Asum nandangi erkhotbah, ipajang Pandita patung diberu tilanjang. Perpulungen erkusik-kusik. Piga-piga ayona nuduhken protes. Nungkun Pandita e, “Uga penampilen patung enda?” Piga-piga anggota perpulungen ngaloi: la sopan, terlalu vulgar/mereha, la menarik, man lebiarenken, rsd. “Adi iakapndu e la mehuli, pekena dage mari. Keke ras tadingken ingan kundulndu!” tantang Pandita. Ternyata, i samping patung e enggo isikapken Pandita e perlengkapen guna metiksa. Sekalak anggota perpulungen ku lebe ras makeken baju man patung e. Si deban masangken wig. Si deban makeken gendit, makeken gincu, ras mere bedak. “Genduari, uga?,” nina Pandita nungkun. Hampir kerina perpulungen ngatakenca, patung e enggo lebih menarik, reh jilena.

“Bage me Gerejanta!,” nina Pandita e. “Adi nuduhken kekurangenna ngenca kam beluh, labo lit perubahen kai pe. Situasi justru reh mejinna. Si iperluken e me: Kekeken, tadingken inganndu kundul. Bahan kai si banci ilakokenndu guna pekenasa… Adi kerina kita anggota perpulungen muat bagin guna pehulisa, Gerejanta pasti reh ulina!”

Paulus mpersingeti perpulungen Korinti si terancam bahaya perpecahen erkiteken tep-tep anggota mementingken diri ras menyombongken pemere (Ind. ‘karunia’) si lit ibassa. Itegasken Paulus maka Gereja e me kula Kristus, melala ringringna ntah pe anggotana. Tep-tep anggota arus mperdiateken anggota si deban, gelah kerina mehaga, guna kemulian Tuhan. Enggo kin ibuatndu baginndu i bas majekken Gereja Tuhan? Adi iidahndu kekurangen i bas Gerejandu, berarti idilo Tuhan kam guna pekenasa.

• Tulisen bahan PJJ-nta si kumuat enda eme tulisen kekelengenta Pdt. Jepta Pelawi. Si aktif pe nulis Suplemen guna banci reh buena refrensi man banta.

• Sentabi aku man kerina kekelengen kami, si mengunjungi blog enda guna nambahi bahan refrensinta guna bahan PJJ. Ibas piga minggu enda aku la sempat nulisken Suplemen bahan PJJ-nta erkiteken kesibuken si lit i tengah – tengah pelayanen gerejanta. I usahaken kami nulis bagi biasana. Bujur ras mejuah – juah kita ibas pengertinta. Tuhan simasu – masu.