Suplemen Khotbah Minggu GBKP 31 Mei 2015 “I jenda aku suruhlah Tuhan” Yes 6 : 1 – 8

Invocatio : Jeremia 1 : 5
Ogen : Ket 4 : 1 – 11
Khotbah : Yes 6 : 1 – 8
Tema : I jenda aku suruhlah Tuhan

Shalom.

Ope menaken khotbah ibas minggu enda, ateku maka ras kita ngendeken lagu si lit ibas KEE 102 : 4 “O Tuhan bre man kami krina KesahNdu si Badia simpar min. Ijenda kami sikap krina. Endalanisa nge si man dahin. Tah katawari pe erkata kam Tuhan, i jenda kami suruhlah Tuhan”. Lagu enda cukup populer ibas gerejanta dingen rusur pe iendeken sebage pengajuk man banta guna mertitaken berita si meriah ras tentu seh ngayak genduari pendilo lagu enda nggeluh ibas dirinta, emaka nintalah dage lebe ras – ras melaskenca kerina kita, ninta dage ras – ras : “TAH KATAWRI PE TUHAN. ERKATA KAM I JENDA KAMI SURUHLAH TUHAN”. Sibelasken kita e me komitmenta ras Tuhan dingen katawari pe kita siap sedia i pake Tuhan. Amin …. ? sebab pendilo guna meritaken berita si meriah, lanai bo hanya terbatas man pejabat gereja saja tapi pendilo e seh man banta kerina kalak kristen si enggo ndatken penebusen Kristus dingen pendilo e si jabab ibas kerina aspek kita nggeluhken kegeluhenta.

Minggu enda isingetken me man banta kerna pendilo nabi Yesaya si encidahken man banta maka nabi Yesaya tuhu – tuhu encidahken ketutusenna ibas ngaloi pendilo Tuhan dingen ndahiken dahin si isuruh Tuhan, alu nina ngaloi Tuhan “I jenda aku Tuhan suruhlah aku” padahal ibas paksa sie dahin e tuhu – tuhu memiliki tantangen si mberat erkiteken ibas masa e, kegeluhen bangsa Yehuda lit ibas keadaan krisis secara Spiritual, Sosial ras Politik. Lit pe tujun pendilo Tuhan si isehkenNa man Yesaya eme guna mengubahken situasi kegeluhen bangsa Tuhan, gelah bangsa e tetap nggeluh ibas teruh undang – undang Tuhan. Guna lebih jelasna mari sinen pendilo si isehken Tuhan man Yesaya e erpalsaken bahan khotbahta ndai Yesaya 6 : 1 – 8 sinuriken :

• Pendilo e bermula kenca kematen raja Uzia, sekalak raja simehuli sierbahanca kegeluhen kalak Yehuda nggeluh ibas kemakmuren, tapi kenca kematen raja Uzia, kalak Yehuda nggeluh nggeluh erbana – bana, erkiteken lanai lit pemimpin bagi raja Uzia ulina. Ibas masa kegeluhen sibage me Yesaya ndatken pengenehenen dingen ngidah kemulian Tuhan i rumah pertoton si ikelilingi malekat Serafim alu muji – muji Dibata alu ngataken “Badia, badia, badia ! Tuhan simada kuasa badia kap ! doni enda dem salu kemulianNa” (Yes 6 : 1 – 3).

• Ibas pengenehenen e Yesaya ngerasaken ras mengakui keberadan dirina sebage kalak perdosa, dingen la iakapna ia metunggung ngidah kemulian Dibata dingen sitik pe lalit pembenaren diri si isehkenna man Dibata, tapi nina “Cilaka aku, lanai lit arapen man bangku. Sebab alu matangku enggo kuidah Raja, Tuhan simada kuasa, adi tep –tep ranan simentas arah biberku dosa kerina, janah aku pe ringan i tengah bangsa ija tep – tep kata si ibelaskenna dem alu dosa” (Yes 6 : 5). Ibas pengakun Yesaya nandangi dirina sebage kalak perdosa, Dibata ncidahken kuasa ras keleng ateNa alu mbersihken Yesaya ibas kerina kesalahen ras dosa – dosana nari ija malekat Serafim muat rara si lit ibas batar – batar persembahen jenari ngkuitkenca ku biber Yesaya. Sie me jandi tanda maka Yesaya enggo bersih ibas dosa – dosana nari. Ertina rara api e me jadi lambang pembersihen dosa – dosa Yesaya (Yes 6 : 6 – 7). Ertina ibas ayat enda Yesaya pe sekaligus mengakui dirina sebage kalak perdosa ras memerluken pengampunen ibas Dibata nari. Kuakap ntah kita pe perlu nge mengaku dosa man Dibata bagi Yesaya enda, adi lit kin dosa si ibahan ningku sendah siakukenlah gelah sidat pengalemi dosa, gelah kita pagi bagi iblis si la pernah ndatken pengampunen ibas Dibata nari. Ilustrasi : Sekali jadi Iblis protes man Tuhan, nina ; O Tuhan kam pe labo Dibata si adil, kerina manusia si ngelakoken kejahaten ras tuhu – tuhu erdosa tetap ialemiNdu ras ialokenNdu jadi anakNdu. Aku iblis, engkai maka la pernah ialemiNdu kesalahenku ? kenca Iblis dung nehken protesna man Dibata. Emaka nina Dibata man iblis alu sederhana, nina : Pernah kin kam mindo ampun ras mindo pengalemi dosa man bangku ? la kap kam pernah mindo ampun ras pengalemi dosa, maka Aku pe la pernah ngaloken kam nari jadi warga kinirajan surga …. hehehehe.. kepeken payo tuhu, sejarah Alkitab memang nuriken iblis memang la pernah nuriken mindo ampun ras pengalemi dosa man Dibata. Arah ilustrasi enda ateku motong bahan khotahta, ateku ngatakenca man banta maka Dibatanta e memang tuhu maha pengampun, emaka adi lit kin kesalahen akukenlah man Dibata gelah ialemiNa bagi Ia ngalemi dosa Yesaya erkiteken pengakunna, maka bage ka me Dibata minter mbersihken kerina dosa si lit ibas dirinta adi lit kin dosa ras kesalahenta, jadi labo man timanken ula keras kepala bage iblis … akukenlah, sebab Dibata memang tuhu erkeleng ate man kalak si nggit ngakui kerina kesalahenna.

• Kenca pembersihen e, Dibata nungkun ras sekaligus menantang Yesaya alu ngataken “Ise ndia Kusuruh ? ise ndia nggit maba berita ibas Aku nari ?” kalimat enda labo saja kalimat perintah tapi sekaligus kalimat si menantang Yesaya, nggit ntah lang Yesaya ndahiken dahin si endesken Dibata man bana. Malem ate Dibata sebab Yesaya ngaloi pendilo ras tantangen Tuhan e alu ngaloi “Aku, sueruhlah aku” (Yes 6 : 8).

Ibas awal ndai menaken khotbah enda enggo ndai kuajak kita ngendeken KEE 102 : 4 “ … Tah katawari pe Tuhan, erkata Kam i jenda kami suruhlah Tuhan” ras enggo si belasken pe “TAH KATAWRI PE TUHAN. ERKATA KAM I JENDA KAMI SURUHLAH TUHAN” emaka isungkun denga me kita kerina si pulung ibas wari sendah enda, Uga dage ninta …. ?

Dage arah nats enda ras tema enda melala kel siman dahinta, ibas sie piga – piga sibanci isingetken man banta ibas paksa enda eme :

• Ibas kinata kegeluhenta uga dage ninta ? adi si idah kegeluhen kalak si tuhu – tuhu memprihatinken, sitading ibas rumah – rumah sila layak huni, itepi kali, iteruh kolong jembatan, daerah pinggiren rel, tunduh hanya beralasken koran, lit ka pe kalak si lanai tersekolahkenna anakna erkiteken biaya pendidiken si mahal, pengemis ras gelandangen, ibas kecibal sideban lit ka pe sipinakiten silanai tertambari erkiteken enggo keri sinasa lit, seh maka guna encukupi kegeluhenna pe enggo gali lobang tutup lobang, seh dungna maka lobangna me igali. Ninta kap rusur “Saya di berkati untuk memberkati“, me si praktekken dage gaya kegeluhen “saya di berkati untuk memmberkati e ? sebab guna sie me kita idilo, emaka perlu kuakap kita mengambil sikap ngelakoken tindakan sinyata, alu nungkun kempak dirinta kai dage si banci kubahan. Kristus reh ku doni enda guna krina manusia dingen kita me siterpilih guna ndahiken dahin sie, emaka mari si pakeken kerina kengasupenta guna ngelakoken perbahanen simehuli man kalak situhu – tuhu membutuhken kehadirenta sebage orang kristen yang peduli sebage gereja yang peduli.

• Ibas sisi sideban secara pribadi pe sendah isingetken pe man banta kubas kai si isingetken Yesaya sebage dosa inti ibas nats khotbah enda eme “Cilaka aku, lanai lit arapen man bangku. Sebab alu matangku enggo kuidah Raja, Tuhan simada kuasa, adi tep –tep ranan simentas arah bibeiku dosa kerina, janah aku pe ringan i tengah bangsa ija tep –tep kata si ibelaskenna dem alu dosa”, ayat 5 enda ngerana kerna “Kenajisan Bibir” ertina Yesaya menyadari kel maka biber pe sebagai salah satu sumber dosa simengeriken erkiteken memang ibas paksa sie mbue kel “basa – basi” sindarat ibas babah kalak Yehuda nari sierbahanca nembeh ate Dibata. Alu bage kepeken maka situhuna lanai bo perlu kel mbuesa ngerana tapi marilah si pebue tindaken – tindaken sinyata sebab memang adi cakap saja labo lako (bd. Yes 1 : 1 – 29).

Dage, selamat ngaloken pendilo ibas Tuhan nari, mari sidahiken dahin meritaken berita si meriah ibas tindaken – tindaken sinyata. Gerejanta GBKP jelas kel ngueken pendilo Dibata e alu nulisken Yes 6 : 8 ibas logo GBKP ras memang la banci si pungkiri, maka enggo me melala si lakoken ibas menjawab pendilo e ibas sie tentu pe iarapken tuhu – tuhu dukungenta sebage warga GBKP guna mensuksesken kerina program gerejanta alu si tatang – tatangen ras saling mendukung gelah alu bage arah gerejanta pe tetap ermulia Dibata.

Amin.
Pekanbaru 27 Mei 2015.