Suplemen PJJ GBKP. 12 – 19 Juli 2015
Ogen : Kuan-kuanen 6 : 6 – 11
Tema : “Peningkatan Ekonomi Jemaat”
Isi kitab Kuan-Kuanen e me pedah-pedah guna kiniulin manusia i bas ndalani geluhena. Ngajari kalak jadi pentar ras erguna, mpersingeti kalak si nggeluh i bas kegeluhen si la payo. Salah sada e me kerna kalak si perkisat, si jadi bahan PJJ-nta paksa enda. Kalak perkisat ipersingeti ras isuruh erlajar man perkis. Engkai maka erlajar man perkis? Sabab amin pe perkis binatang si kitik tapi melala kal kelebihen-kelebihen si lit ibas ia si banci jadi pelajaren man manusia, antara lain:
- Mejingkat, ngasup minpin diri sendiri (la erkomando).
- Tertib, ratur, la ia rubat (sada lintasen si seri ia/erbaris)
- Ngukurken masa depan, lit perencanaan si mehuli. (keperlun wari si pagi, erdahin guna paksa perudan).
- Mejingkat, lit kerja-sama si mehuli i bas dahin, iraskenna maba baban si berat.
- Sihamaten ia asal jumpa.
Arah piga-piga biak perkis si mehuli enda, banci jadi curmin man kalak perkisat, engkai maka manusia si itepa Dibata alu lebih serta, justru santai la erdahin, la ngukurken masa depanna. Sada perbandingen si cukup menarik antara perkis si mejingkat erdahin ras sekalak jelma si nggeluh i bas biakna si perkisat. Penulis kitab Kuan-Kuanen mpersingeti kita maka arusna kalak si ikataken pentar ras erkemalangan man Tuhan, lit biak mejingkat ras tutus erdahin ibas ia. Erdahin e me hakekat manusia si itepa Dibata. Manusia itepa labo gelah santai ntah pe ngganggur tapi manusia itepa gelah tutus erdahin gelah menghasilken karya si mehuli i bas doni enda. Dibata ersura-sura gelah manusia nggeluh sejahtera labo gelah suhsah, sabab kesejahteran e me salah sada padan Dibata man kalak si tek man baNa, sebage tanda Dibata mediate nandangi kegeluhen manusia. Erdahin labo sada ukumen si ibereken Dibata tapi sada pendilo bas Dibata nari man manusia. Dibata nuruh manusia lako naluken, ngusahai, njagai ras pekena-kena doni enda, ngelakoken si ngena ateNa, jadi saksiNa, jadi sira ras terang. Uga mungkin manusia jadi saksi Tuhan nehken si ngena ate Dibata adi manusia e jadi kalak pekisat. Jadi biak kisat e me sada dosa i adep-adepen Dibata sebab la ngelakoken kai si jadi tanggung-jawabna si suruh Dibata.
Kalak Karo pe secara umum itandai kalak mejingkat, e maka lit kuan-kuan kalak karo “ Rulih ‘di mejingkat kin, liah ‘di perkisat kin”. Iidah pe i bas kinatana, kalak karo si nuria umumna perjuma, erpagi-pagi si lampas enggo berkat ku juma, maba nakan, ras mulih ku rumah enggo erkata pet-pet. Kuta melungen nupung suari sabab kerina kalak ku juma. Kalak Karo megegeh encari guna masa depanna, emaka lit istilah “ndarami nakan guna dua ntah telu tahun enda”, labo guna nakan sada wari tah sada minggu saja. Bage pe lit ka pengajaren orangtua nai “nggeluh ermalu-malu,” mela adi mindo. Kerina kuan-kuan enda motivasina positip gelah nggeluh kita mejingkat erdahin. Aminna gia maun-maum lit ka nge kecenderungen erkiteken jingkatna lanai iingetna njaga kesehaten, lanai iingetna man ngayak-ngayak dahin, piahna turah pinakit. Pepulung erta tapi kedungenna keri guna pertambar. Bage pe erkiteken mejingkat pepulung erta piah kurang mediate nandangi kiniteken ras dahin-dahin gereja. Enda me si perlu sipelimbarui gelah kita nggeluh mejingkat labo terjeng ndarami erta doni saja tapi termasuk pe erta Surga.
Adi ngerana kita kerna peningkatken ekonomi jabu – anggota ngawan ni perpulungen, enda tentu berhubungen ras melala faktor. Faktor utama si paling penting e me berhubungen ras karakter jelmana, e me: tutus erdahin, nggit erlajar, punya misi masa depan ras la mesukah putus asa. Tep-tep manusia lit tanggung-jawabna i bas jabu, gereja, masyarakat ras man Dibata. Guna nehi tanggung-jawab enda pertama-tama si la banci lang e me arus tutus erdahin. Uga banci kita nehken tanggung-jawabnta enda adi kita kisat erdahin? Arah kata Dibata enda ipersingeti kita mulihi maka guna meningkatken ekonomi jabunta labo cukup ngasup ngidah peluang-peluang usaha, tapi kita arus beluh erbahan rencana ras ndahiken si enggo irencanaken e alu mehuli ras tutus. I bas kita tutus erdahin e tek kita maka Dibata nge ulu pasu-pasu, manusia rusaha tapi Dibata nge si nentukenca. Usaha manusia jadi sea-sea adi la rikutken toto ras nggeluh erkemalangan man Dibata. Emaka perlu sigelem motto ”Ora et Labora” (erdahin ras ertoto), dua hal si la banci ipesirang. Adi erdahin saja mejingkat la ertoto man Dibata e me sada kesombongan, tapi ertoto saja la erdahin e me kebodohen.
Gereja secara organisasi pelayanen, si mersan misi Tuhan guna meritaken keselamaten man doni enda, la saja ngelakoken pelayanen kerohanian saja man jemaat tapi pelayanen si lebih holistik/menyeluruh: ekonomi, kesehaten, pendidiken, ras si debanna. Kehadiren gereja arus ngasup mereken masuken guna peningkaten ekonomi jemaat. Mereken pelatihen ras pembinaan si berkelanjuten nandangi usaha ras pendahin perpulungen. Enda me perlu siusahaken gelah lit, kai si banci sibahan ntah e secara pribadi, keluarga, ntah pe gereja guna peningkaten ekonominta.
Amin!
Pdt. Jepta Pelawi.
Pdt. Israel.HS.Milala 