Suplemen PJJ Tgl 27 – 03 Sept 2015. “Erberita Dingen Ersaksilah” Perb 26 : 16 – 18

Suplemen PJJ Tgl 27 – 03 Sept 2015.

Tema : “Erberita Dingen Ersaksilah”
Ogen : Perb 26 : 16 – 18

Shalom.

Paulus sebage perberita simeriah naksiken man banta nina “Situhuna labo lit hakku ermegah ibas meritaken berita si meriah e, sabab terpaksa kap aku. Janah cilaka kel aku adi la kin kuberitaken berita si meriah e” ras malem kel min ate adi bagi pengakuan Paulus enda jadi pengakunta ibas paksa genduari enda sebage pengikut Kristus, ninta ka pe min arusna “… cilaka kel aku adi la kin kuberitaken berita si meriah e dingen rutang siakap dirinta adi la siberitaken berita si meriah e” (I Kor 9 : 17 ; 11 : 16).

Paulus memang cukup terkenal sebage rasul perberita si meriah dingen naksiken kerina kegeluhenna guna berita si meriah. Perlu pe iakap situriken sitik singkat kerna sejarah Paulus, gelah alu bage banci pe si ertiken tema ras oraten PJJ – nta sekali enda :

• Paulus tubuh itengah – tengah keluarga Yahudi si tubuh i Tarsus propinsi Kilikia (Perb 21 : 39) jenari nggeluh ibas pengajaren agama Yahusi si cukup ketat ndalanken peraturen agama (Flp 3 : 4 – 6), keluargana pe cukup berada, ia sendiri pe ndatken hak sebage waraga kenegaran Romawi (Rom 22 : 28) ras memang kepatuhenna nandangi hukum agama Yahudi la i sangsiken, erkiteken Paulus sendiri mbelin iteruh pengaruh Gamaliel pemimpin sekolah guru “rabbinic” kalak Yahudi.

• Ope denga mengalami pertobaten paulus memang terang – terangen menentang ras menganiaya kegeluhen kalak kristen (Perb 9 : 2, Gal 1 : 13), tapi kenca pertobatenna Paulus jadi sekalak si semangat kel ibas ersaksi kerna berita si meriah dingen jadi pembela nandangi berita si meriah e sendiri (I Kor 2 : 7 ; 4 : 1, Rom 16 : 2, Perb 9 : 1 – 20 ; 22 : 1 – 21 ; 26 : 2 – 23).

• Kidekah kegeluhenna ibas meritaken berita si meriah, Paulus la pernah pilih bulu, iberitakenna berita si meriah man kerina jelma, suku bangsa, kalak terpelajar ntah kalak si la terpelajar (Perb 9 : 20 ; 13 : 5), man kalak secara perorangen ntah pe man kalak si enterem (Perb 17 : 22 – 34), man kalak si terpenjara ntah pe kalangen istana (Flp 1 : 12 – 13), lawes niari taneh Siria seh ku benua Eropa (I Kor 9 : 23), bahken pernah i turiken maka Paulus pe pang meritaken berita si meriah man raja Herodes Agripa II (Perb 26).

• Alu bage banci si simpulken maka ibas diri Paulus erberita ras ersaksi kerna berita si meriah iakapna merupaken sada tanggung jawab kegeluhenna (I Kor 9 : 17) ras tetap nggejapken sebage utang ibas kegeluhenna guna nehkenca man kerina manusia (I Kor 9 : 17).

Tema PJJ – nta ibas minggu enda “Erberita Dingen Ersaksilah”. Penungkunenna relevan denga nge tema enda man banta ntah hanya sekedar teori nari nge ngnca ? sebab adi si perdiateken ibas kegeluhen gereja ras jemaat, geraken pebelangken berita si meriah e tempa – tempa enggo jalan di tempat ntah pe banci ikataken semangat pebelangken berita si meriah e lanai semarak bagi jaman kekristenen mula – mula. Erberita ras Ersaksi enggo tempa – tempa tergantiken alu kemeriahen – kemeriahen pesta gerejawi, ras banci jadi pe kata Dibata enggo enggo hanya semacam pemuas nafsu manusia ras lebih ngeri kata Dibata enggo ijadiken semacam alat guna mpebayak diri kalak si beluh memanfaatkenca. Gereja (kita) banci jadi lupa nandangi “amanat agung” si isehken Yesus, ija kita arus meritaken berita si meriah : “Laweslah ku kerina bangsa manusia, bahanlah ia jadi ajar – ajarKu, peridiken ia ibas gelkar Bapa, Anak ras Kesah si Badia. Jenari ajari ia ngikutken kerina si enggo kupedahken man bandu. Janah ingetlah Aku tetap ras Kam seh ku kedungen jaman (bd. Mat 28 : 19 – 20). Ibas sienda sitik cataten saja, menurutku enggo kalak cepat kita meritaken berita si meriah asangken berita ntah gosip, umpamana, scandal, kriminal, politik, rsd. Engkai, ntah kin e enggo rincuhen kita meritaken dingen naksiken berita si bage rupana asangken kerna berita si meriah ? cuba sirenungken tabiat sie pe secara pribadi ibas kegeluhenta ras kenca lit perenungen pribadi e, lit min perubahen ibas dirinta dingen minter cuba si hubungi keluraga, temanta ntah ise gia alu HP – nta masing – masing, alu naksiken maka kita enggo nggeluh ibas kegeluhen si mbaru dingen nuriken kerna Yesus, sebage tindaken si nyata ibas kita “Eberita ras Ersaksi”.

Dage alu tema ras oraten PJJ – nta sekali enda, isingetken me mulihi gelah si sehi tugas ras panggilenta sebage pengikut Kristus dingen ngenehen kubas kegeluhen Paulus kenca pertobatenna, ija Paulus tuhu – tuhu nggeluh ibas kata Dibata ras naksiken berita si meriah man kerina jelma alu perasan er – utang nandangi berita si meriah e. Genduari enda enterem denga nge kalak si lenga ngaloken berita keselamaten, emaka perlu dage ngulihi si gerakken semngat penginjilen si enggo mulai surut e, gelah alu bage reh teremna kalak si banci iselamatken erkiteken Yesus. Alu bage ka dage ibas PJJ – nta sekali enda cuba dage si ukuri mulihi, kuja kita “Erberita ras Ersaksi” ras bahanlah rencana (program) si tepat rikut ras sasarenna, apakah e nandangi keluarganta silenga nandai Yesus ntah pe nandangi kalak sideban, Selamat “Erberita ras Ersaksi”.

Amin.
Pekanbaru 28 Sept 2015.