“Ersada Arih Guna Muat Si Mehuli” Gal 2 : 1 – 10

Suplemen PJJ 06 -12 Maret 2016.

“Ersada Arih Guna Muat Si Mehuli”
Gal 2 : 1 – 10

Pokok Pikiren :

  • Enggo semal kel si iendeken lagu Kitab Ende – enden No 209 si erjudul “Perpulungen Ersadalah” ras banci jadi lagu enda enggo i hafal. Isi jiwa lagu enda eme gelah perpulungen ersada ibas kerina simehuli alu makeken kerina pemere si ibereken Dibata bagi siniarapken Tuhan simada gereja.
  • Tapi mekatep ibas kinatana la bage siniarapken sijadi ras banci jadi enggo mamang ateta erkiteken lit denga rusur turah persoalen – persoalen ibas kegeluhen gereja subuk e persoalen si kitik ntah mbelin ras enggo ka hal sibiasa siakap. Jawapen klasik umumna menjawab persoalen e ninta rusur ; “bage kin nge adi enggo enterem, labo banci bagi ukur kel kerina, emaka adi sitik – sitik nge turah persoalen, la siangkan biasa nge e”, janah sada nari jawapen si lebih pepalem pusuh (menenangken jiwa), ninta rusur ; “doni enda ingan rubat kin, i jah (surga) nge pagi maka enggo dame situhu – tuhu”. Tapi ibas kinatana jawapen klasik ras pepapelm pusuh (simenenangken jiwa) ndai menjawab persoalen – persoalen si lit ibas pelayanen gereja, janah mekatep er aruna ateta erkiteken persoalen e pe situhuna labo persoalen si man persoalenken tapi dungna jadi persoalen si mbelin si arus icakapken enterem jelma ntah seh ku tingkat pengadilen pemerintah. Budaya runggu sebage salah sada dalan si itempuh ibas gereja pe lanai berhasil ndungi persoalen si lit, padahal budaya runggu e sendiri situhuna dalan guna mpersada arih guna muat simehuli. Alu bage, maka adi lit kin persoalen silanai terdungi alu runggu ibas gereja, maka situhuna kita sekaligus melanggar dua hal si mbelin eme kata Dibata siman patuhenta ras budayanta sebage kalak Karo si itandai alu keramahenna (Filosfi 3 M ibas kita kalak Karo : Medes, Metami ras Mehamat). Tapi amin bage gia, kita la banci apatis, sebab tek kita ibas penemani ras pengajaren Kesah Si Badia, ibas sada paksa kerina pagi banci mehuli, sebab ertambah – tambah me kepentaren ras kebijaksananta erkiteken kata Dibata tetap sijadi bahan penggurunta bagi nina Paulus ibas Ef 4 : 13 “alu bage dungna ersada kinitekennta ras penandaita kerina nandangi anak Dibata ; kita dewasa, janah dungna seh kita ku tingkat kedewasaan Kristus si serta e”.
  • Ngorati bahan PJJ-nta sekali enda, tuhu sada hal sipenting man banta alu mbages, gelah alu bage tambah pengertinta kerna kegeluhen ibas persadanta ras Kristus, janah erpengarapen kita maka tema PJJ-nta sekali enda “Ersada Arih Guna Muat Si Mehuli” banci terjawab ras terealisasi ibas kerina dampar kegeluhenta. Guna banci lebih tangkas man banta, kerna oraten ras tema PJJ-nta sekali enda, piga – piga hal si banci isingetken kami ijenda eme :
  1. Bagi enggo sieteh ras – ras surat Galatia enda surat tertua Paulus erkiteken surat enda surat si itulisken ope denga kitab injil ras kitab PB itulis. Surat enda eme surat persinget ras pengajaren Paulus man kalak Galatia kerna uga arsuna nggeluh erkiniteken ibas percampuren latar belakang si lit ibas perpulungen e, sebab ibas perpulungen Galatia memang lit percampuren antara kalak Jahudi bagepe non Jahudi, ibas litna percampuren e mekatep pe turah persoalen – persoalen kerna pemahamen hukum – hukum ntah aturen keagaman si arus i idalanken perpulungen.
  2. Paulus memahami alu benar kerna persoalen si turah ibas perpulungen kalak Galatia. Lit pe persoalen si medasar ibas perpulungen e me litna kelompok kalak Jahudi si memegang teguh aturen taurat, alu ngataken maka labo erkiteken tek saja nandangi Yesus saja ngenca dalan keterkelinen tapi pe arah ndalanken undang – undang taurat eme alu ersunat, sebab ibas paksa si kalak Jahudi tetap memahami sunat sebage si harus ilakoken bagi itetapken taurat, sementara kalak non Jahudi mengganggap, maka sunat lanai jadi hal prinsip si arus idalanken, erkiteken pengajaren si isehken Paulus, kerna kebesasen ibas Kristus si enggo mbebasken kerina kalak perdosa alu kematenNa i kayu persilang.
  3. Dua hal penting kerna pengajaren Paulus ibas paksa sie eme , sipemena : Sunat lanai sada hal  si prinsip alu ngataken, perpulungen e arus melepasken dirina ibas aturen undang – undang taurat si erbahanca kalak e la bebas ras teriket. Sipeduaken : Gia sunat lanai jadi sada kearusen tapi ibas kebebasen nandangi taurat e makam labo e nagatkenca perpulungen banci nggeluh rate – ate, tapi arus tetap nggeluh ibas kebebasen si ertanggungjawab ibas kiniteken man Kristus (bd. Gal 5 : 1 – 26).
  4. Tapi ibas kinatana, kedungenna pengajaren Paulus kerna kebebasen e, i salah ertiken perpulungen khususna kalak Kristen Non Jahudi, kalak e dungna nggeluh erbana – bana kenca Paulus lawes nandingken perpulungen guna erberita si meriah ku ingan sideban. Pengajaren si isehken Paulus tempa – tempa bagi angin mentas saja, erkiteken perpulungen e nggeluhken geluhna alu ate – atena saja, uga iakapna cocok bageme ibahanna (ay. 1- 3).
  5. Ibas sisi sideban tambah persoalen si turah ibas perpulungen, eme erkiteken litna kelompok kalak jahudi i luar Galatia nari reh ras bengket ku perpulungen e si ersura – sura mengacauken  kegeluhen perpulungen. Lit taktik kalak e ibas sura – surana ncedai kegeluhen perpulungen eme alu mempertanyaken wibawa rasuli ras nuduh Paulus labo sekalak rasul, alu alasen maka Paulus la pernah jumpa ras berinteraksi ras Yesus secara langsung. Jenari kelompok enda pe memaksaken gelah undang – undang taurat Musa idalanken ibas kerina kegeluhen perpulungen (ay. 4 – 6).
  6. Ibas usaha kelompok e erbahan pelemahen terhadap diri Paulus, maka Paulus pe mereken pembelaan terhadap dirina alu ngataken ; maka ia langsung iangkat Dibata sebage rasul Yesus Kristus (ay. 7 – 8). Jenari alu tegas Paulus pe menolak paham kebebasen sianut perpulungen bagepe legalisme Jahudi kerna taurat. Janah Paulus sendiri nggelari kelompok e sebage kelompok pengacau si beluh ibas memutar baliken fakta kerna berita si meriah, sierbahanca kalak saling menuduh ras saling mencurigai.
  7. Bage me Paulus ibas masana menghadapi persoalen si lit ibas perpulungen kalak Galati ncidahken man perpulungen kalak Galatia, maka dirina ras rasul – rasul sideban (Jakup, Petrus, Johanes) tetap nge ras tuhu – tuhu ersada arih ibas meritaken berita si meriah gia melala tantangen ibas ndahiken -dahin meritaken berita si meriah (ay. 8 – 10).
  8. Ibas sie kerina si idah me dage maka lit sikap si tegas ibas diri Paulus ras pang mandang si salah. Tapi amin bage gia, ibas ketegasen dingen kinipangenna mandang si salah, Paulus pe tetap erusaha njagai kiniersadaan kegeluhen perpulungen ras kerina teman sepelayanenna. Janah kerina kunci keberhasilen Paulus e kerina tentu erkiteken kepatuhenna nandangi Kristus ras ncidahken sikap nggeluh sebage sekalak si enggo dewasa ras sekaligus nggeluh alu meteruk rukur.  Janah patut memang kita mengacungken jempol nandangi Paulus ibas pribadina si luar biasa, erkiteken Paulus memang Paulus la pernah peganjangken bana gia ia sekalak si cukup berhasil ibas meritaken berita si meriah, erkiteken ia memang kin sekalak si tulus ibas meritaken berita si meriah, Paulus la pernah ndarami keuntungen guna dirina, sebab sura – surana memang hanya guna mpemuliaken Kristus ibas kegeluhenna ras eme maka Paulus pe ersura – sura ras erpengarapen kel nandangi kerina perpulungen si enggo i pantekina lako tetap ersada ukur, sada pikiren ras sada prarih ibas majekken kula ni Kristus (Bd. Flp 4 : 2, Rom 12 : 16).
  • Tema PJJ-nta “Ersada Arih Guna Muat Si Mehuli”. Tema memang cukup penting si realisasiken ibas kegeluhenta subuk e ibas kegeluhen jabu bagepe ibas kegeluhen ergereja. Mungkin kah e banci jadi jadi ? tentu banci, ras adi ateta sie jadi ibas kegeluhenta secara pribadi bagepe ibas kegeluhen gereja bahanlah palasna nteguh eme kiniteken man Kristus dingen nggeluh alu ersada arih, ertina setiap pribadi arus nggejapken maka ia ersada kap ras Kristus ras alu persadanta ras Kristus e, tentu pikiren ras perbahanenta pe bali ras Kristus. Nggit kin Kristus peganjangken bana ? nggit kin Kristus ndarami keuntungen guna diriNa ? nggit kin Kristus nembeh ntah ermenek – menek ? nggit kin Kristus peturahken perubaten ? nggit kin Kristus asal ngeranai ? nggit kin Kristus pegabuken ? nggit kin Kristus  ngadu – ngadu ? nggit kin Kristus erbahan perpecahen ?    Tentu lang. Kristus tetap ncidahken biak simehuli ibas kerina dampar kegeluhenNa ras sie kerina i lakokenNa guna kemulian Dibata Bapa i surga. Paulus enggo ngusih biak Kristus e ibas kegeluhenna, adi Paulus ngasup ngusih biak – biak Kristus ibas kerina kegeluhenna maka tentu pe kita ngasup ngusih biak – biak Kristus bas kerina kegeluhenta.
  • Malem kel memang ate adi tercipta kiniersadan ibas kegeluhen perpulungen alu arih – arih siersada ibas si mehuli, terlebih ibas jabu bagepe ibas gereja. Dingen sie situhuna perayakenta kap, emaka marilah silumbaken nggeluh ibas sada perarih guna muat simehuli, si persilahang kerina biak – biak sila mehuli sibanci ncedai kiniersadanta. Kai kin gunana ntah untungna adi ersoal kita, si banci ncedai kiniersadanta subuk e ibas jabu ntah ibas gereja ? me pangen nge si persada arihta guna muat simehuli ? sebab untung kel nge ngenca si dat ibas kerina persadanta adi kita ersada arih dingen ibas kiniersadaan e tentu reh buena me banci silakoken terlebih ibas majekken kula ni Kristus.
  • I kota kaban jahe lit mobil angkuten umum merekna “Arih Ersada” ras merek kilang padi “Sada Arih”, bageme ulina kata enda seh maka kata “Arih Ersada” e pe i pake jadi sada merek guna erusaha. Janah ibas kegeluhen gerejanta kata “Arih Ersada” e  pe tole ituangken ibas lagu Ende – endenta PEE No 43 : 3 nina “Ersadalah min arihta kerina, make kata ras pedahNa. Gelar ni Tuhan ‘lah tetap mulia, ije me tridah ibas lagu langkahta.  Kalak si malang nandangi Tuhan, la kap nggit nimbak, labo nggit nogan, maka dahiken ‘lah alu tutus. Ola lakoken alu mekarus”.
  • Uga dage ninta ? me si persada dage dage arihta muat si mehuli, sue ras tema PJJ-nta sekali enda ? adi ue ninta, maka nitalah dage ras – ras melaseken tekadta “Ersadalah Min Arihta Dingen Sada Min Arihta”.

Amin. Pekanbaru 07 Maret 2016. Pdt. Israel H S Milala.

Tinggalkan komentar