AKU PAGI NAIK BUS WAY SAJA KU SURGA

AKU PAGI NAIK BUS WAY SAJA KU SURGA

(Humor ka lebe ….. enggo elah man ciger …)

Sekali jadi cakap – cakap kenca dung kenca perpulungen, janah man snack plus minem kopi. Lit percakapen simenarik si kubegiken, isi percakapenna aminna gia cakap lepas, la perlu pemahamen pengertin teologi si mbages, nina ibas percakapen e :

Bapa 1 : Uga maka galang nari kel nge bandu tulisen si ibas ding – ding kedendua ah ndai senina, kubaca je ndai nina “LABO PAGI SI BONCENGEN KU SURGA”, janah man ise nge katakenndu kata ah ndai senina, man kami si reh man ku rumah makandu ntah man orang rumahndu ?

Bapa 2 : Hahaha …. ise ngogesa ialah si erpengagak ras ngangkasa senina, kuja arah tulisen ah ndai ?

Bapa 1: Kwkwkw … Payo senina, iangka kami nge maksudndu e, saja lanai bo bagena cara nginjili orang rumahta senina, adi ateta gelah ras kita ia berkat ku gereja. Adi nindu “LABO PAGI SI BONCENGEN KU SURGA” jawabna kam pagi lalap senina.

Bapa 1 : Uga ka nina njawabsa senina, me pas kel kataku ah ndai : “LABO KITA PAGI SI BONCENGEN KU SURGA ?”

Bapa 2 : Payo senina, “LABO KITA PAGI SI BONCENGEN KU SURGA” tapi mbiar kap aku nina orang rumahndu ngaloi kam, nina man bandu senina ; la pe aku pagi aku boncengndu ku surga la bo dalih pak, naik “BUS WAY” pagi aku nina, uga me kapndu e senina …. wkwkwk ?

Bapa 2 : ….. wkwkwkwk … payo ka me senina, enggo melala siat das BUS WAY … hahaha, pagi nta ku sambari tulisan ah ndai senina !

Bapa 1 : Kai pagi banndu gantina senina ?

Bapa 2 : Ku ganti pagi alu tulisen “RADU KITA PAGI MAK, NAIK BUS WAY KU SURGA NDAI LABO DALIH” gelah ras kami pagi lalap … hehehe.

BAPA     :  …… wkkw3wkw2kkwk5kwk4wkw.

Selamat ciger kade2 ras selamat menginjili orang rumah … si lenga berkat ku Gereja tupung wari minggu, ula nai lah ningen ngiahkenca “LABO PAGI SI BONCENGEN KU SURGA”, Saja adi aku ka pe sungkunndu, labo kel kueteh ngatakenca, sebab orang rumahndu kap kade – kade … Huhahah.

Pekanbaru 10 Maret 2016.

Humor Kalak Karo : “CIAK NAIK SINABUNG JAYA”

“CIAK NAIK SINABUNG JAYA”

CIAK sekalak mahasiswa ibas salah sada STT (Sekolah Tinggi Teologi) i kota Medan, ersura-sura ia mulih ku kutana i sekitar kota Kabanjahe. Inangkihina SINABUNG JAYA i Simpang Kuala Medan. Ntah kai nipina erbinai???

CIAK kundul i samping sekalak singuda-nguda si seh kal mberuna rupana, sekalak mahasiswi ibas salah sada Perguruan Tinggi Swasta i kota Medan. Ngidah gelagak CIAK si sederhana, aneh ras unik erbahanca mahasiswi si mberu rupana e tertarik ras merincuh sitandan rassa.

Amin gia CIAK labo mejin tapi mesera ka nge ngatakenca ia ganteng. Idudurken mahasiswi si mberu rupana e tanna nalami janahna menai cakap…

AMEI : “Gelarku Amei, salam sitandan Bang!”

CIAK : “Sory ya Dek, gelarku CIAK, aku la banci sisalamen ras kam Dek!!”

AMEI : “Engkai maka bage Bang, pantangenndu ya? “

CIAK : “Labo bagena Dek, aku desken sekalak ‘tukang kebun’ janah kam e me sekalak ‘ratu’, i ja nge aku pantas sisalamen ras kam Dek? “

AMEI : “E labo bagena Bang!” (jabab mahasiswi si mberu e alu tegas)

CIAK : “Sisalamen ras singuda-nguda bagi kam kal mberuna Dek, ola mekarus…, bage nina Nande!”

Arah percakapen si kentisik e mahasiswi si tergelar AMEI e reh penasarenna, tapi reh ‘tertarikna’ ia nandangi si CIAK.

Itatapna si CIAK. Iidahna isi tas (CIAK) si rembang talang, i bas lit piga-piga buku ras Pustaka Si Badia (Alkitab), isadarina maka anak perana temanna ngerana e sekalak Pandita.

AMEI : “Pandita CIAK, banci aku nungkun, engkai maka ndai la kam nggit sisalamen ras aku – asum ndai kududurken tanku? “

CIAK : “Ach, ola lebuhndu aku Pandita, aku kuliah denga, erlajar denga man Pandita i Sekolah Tinggi Teologi.”

La minter ijabab CIAK penungkunen AMEI, ia justru kuskas nalangi kantong kresek plastik mbiring janah ibuatna 2 buah lekang (‘rambutan’) si ndai itukurna i stasiun SINABUNG JAYA i Simpang Kuala…

Sada ‘lekang’ italangina, janah sada nari ipediatna erkulit, si enggo italangi itamana ibas tanna si kemuhen, tanna si kawes nggelem ‘lekang’ si erkulit denga, janahna ndudurkenca man si AMEI, nina …

CIAK : “Umpamana kam Dek milih sada ibas dua buah lekang enda, apai nge ipilihndu?”

La iangka AMEI kai maksud CIAK tapi minter ijababna, nina…

AMEI : “Tentu saja si ibas tanndu si kawes ena Bang, si erkulit denga!”

CIAK : “Di bage, buah ‘lekang’ si erkulit denga pasti lebih meherga asangken si enggo ikuliti, janah adi e kudayaken…, kujamin buah ‘lekang’ si enggo ikuliti enda pasti labo lako.”

AMEI : ” Maksudndu Bang?” (la iatunsi AMEI arah percakapen CIAK).

CIAK : ” Sekalak diberu si mehuli peruisna (itamburina si biak man kemelanken) ndauh ergan asangken diberu si ncidah-cidahken kai si biakna man kemelanken ku jah ku je, sentabi ya Dek…, labo ateku njuruken kam…”

AMEI : ” Ehmmm,,,,,”

AMEI sependapat ras CIAK, mela ia erkiteken idapetina dirina ruisken uis kurang bahan kainna…, rokna…, bajuna…, pokokna “MINI…” ‘lah… Tapi i bas pusuhna erbunga-bunga, megiken dua penjelasen CIAK si teraloken ras sederhana, menurut AMEI, CIAK labo anak perana ganteng sembarangen, janah i bas ukurna tek ia, MARIO TEGUH si mekatep teridah i bas TV labo lebih pentar asangken CIAK enda.

AMEI : “Bang CIAK, enggo lit rondongndu? “ (nungkun ia alu sora teneng…!!!)

Sengget kal CIAK megiken penungkunen si AMEI e – minter ibuatna sada batang isap ibas koncang bajuna nari jenari igaraina make santik alu nggirgir tanna, CIAK sinik ‘tersipu malu’ janahna kem nggelem isapna, i bas pusuhna erbelas ia: “AMIN, TERPUJI TUHAN…”

Selamat Erjabu Ciak.