Suplemen Pekan Doa 15 Mei 2016 (Wari I). “Aron Dibata Si Ertoto, I Pegegehi Kesah Si Badia Guna Ertoto” Perb 4 : 23 – 31

Suplemen Pekan Doa 15 Mei 2016 (Wari I).

“Aron Dibata Si Ertoto, I Pegegehi Kesah Si Badia Guna Ertoto”

Perb 4 : 23 – 31

La sigejap dingen enggo ka seh paksana kita ngelakoken Pekan Doa i tengah – tengah kegeluhen gerejanta si ilakoken kita sada minggu dekahna tep – tep wari menaken ibas tgl 15 – 21 Mei 2106. Mari si respon Pekan Doa enda alu sikap positif ras mbelin pengarapen gerejanta maka asa bancina kerina kita ngawan itengah – tengah gerejanta banci min ngikuti Pekan Doa enda alu mehuli. La menukah memang ngaturken waktu guna banci tetap setia guna ngikuti Pekan Doa sinilakoken ibas waktu si lit seminggu dekahna, terlebih – lebih ibas buena kesibuken – kesibukenta ibas  jaman enda. Tapi amin bage gia marilah si usahaken guna banci ngikuti Pekan Doa si niaturken gerejanta ibas tahun enda alu mehuli, erkiteken arah Pekan Doa sekali enda kita iajuk guna banci ras – ras ertoto nandangi kiniulin kegeluhenta secara pribadi, kegeluhen jabunta, kegeluhen gereja dingen kegeluhen kerina kalak singgeluh i tengah – tengah doni enda.

La menukah menentuken wari  – wari guna banci erbahanca kita radu ras ertoto ibas persadanta kidekah sada minggu dekahna guna banci ertoto radu ras temanta si sada kiniteken ras sada penggejapen. Sieteh maka waktu guna sie genduari enggo semakin sempit erkiteken kesibukenta masing – masing si tep – tep wari, emaka sekali nari sebage persinget man banta marilah sipergunaken waktu Pekan Doa enda alu mehuli, sebab arah Pekan Doa enda pe ateta tole gelah kita mulih ku gegehta si tuhu – tuhu selaku kalak si erkiniteken eme ertoto, sebab man banta ertoto emekap kegeluhen (Doa Adalah Nafas Kehidupan Kalak Si Tek). Alu bage dage mari ertoto, ertoto alu ras – ras ibas persadanta selaku anak – anak Tuhan, khususna ibas sada minggu enda kita ngelakoken Pekan Doanta.

Tema Pekan Doanta ibas wari si Pemena enda “Aron Dibata Si Ertoto, I Pegegehi Kesah Si Badia Guna Ertoto”, erpalasken oratenta Perb 4 : 23 – 31. Guna banci lebih seh tujun temata ibas berngi si pemena enda mari si gar – gari lebe kai si tersirat ibas bahan renungenta enda :

• Secara keseluruhen Perb 4 enda nuriken kerna semangat rasul – rasul ibas mbritaken Berita Si Meriah kenca nusurna Kesah Sibadia bagepe litna semangat penolaken nandangi Berita Si Meriah. Emaka ibas semangat penolaken e kegeluhen ajar – ajar pe tentu terancam ibas mbritaken Berita Si meriah. Tapi amin bage gia khusus ibas Perb 4 enda ituriken maka semangat ajar – ajar khususna Petrus ras Johannes la pernah surut ibas mbritaken Berita Si Meriah. Tempa ietehna maka ibas mbritaken Berita Si Meriah e labo mulus saja – mulus saja dingen tempa enggo ietehna erbage – bage me reh tantangen ras kiniseran sibahak reh man bana, tapi tetap saja amin bage gia maka semangat ajar – ajar e surut.

• Ibas Perb 4 enda ituriken Petrus ras Johanes enggo i tangkap ras ibaba ku pengadilen agama erkiteken nembeh ate kalak si enterem nandangi kesetian ras semangatna ibas nuriken Yesus Kristus me Tuhan si enggo keke ibas simate nari dingen Yesus me ngenca dalan keselamaten. Petrus ras Johannes i tangkap jenari i baba ku pengadilen agama guna i adili, alu sura – sura gelah ula nari reh mbarna Berita si Meriah si iberitaken ajar – ajar e. Ibas Pengadilen e ituriken pe hadir kalak si erate nembeh man Yesus ras ajar – ajar eme imam si mbelin Annas ras Kayapas, Johannes, Alexander dingen piga – piga kalak ibas kesusuren imam si mbelin nari, guna mereken pengadilen ras memutusken maka ajar – ajar lanai banci erberita kerna kerna Yesus me Tuhan si enggo keke ibas si mate nari dingen Yesus me ngenca Tuhan dalan kempak kinirajan surga.

• Bageme ituriken Petrus rs Johannes ndatken tantangen si mberat ibas mbritaken Berita Si Meriah, tapi amin bage gia rasul  e  duana la pernah gentar dingen mbiar, tempa lit motto ibas kalak e “Setia Sampai Mati” bagi kesetian si icidahken Sadarakh, Mesakh, Abbednego ibas menolak ersembah nandangi patung si ibahan raja Nebukadnezer, bageme Petrus ras Johannes la nggit sinik ibas mbritaken Berita Si Meriah gia sekali lit ancamen nyawa sebage taruhenna.

• Umumna kalak si kebiaren pasti panik dingen ndarami perlindungen adi melala reh tekanen ras ancamen. Tapi ibas kesaksin Perb 4 enda ituriken Petrus ras Yohenes la melariken diri dingen ndarami perlindungen tapi tetap yakin maka kai si ilakokenna e, e me bekas persuruhen Dibata, emaka ibas penggejapen si bage rupana duana rasul e la sitik pe gentar ibas mbritaken Berita Si meriah sebab duana rasul labo mengandalken gegehna tapi tetap mengandalken gegeh si rehna ibas Dibata sebage gegeh situhu – tuhu ibas ndahiken – dahin Tuhan.

• Lebih asangken kiniteken rasul rasul e duana, maka kepeken perpulungen si enggo tek nandangi Berita Si meriah pe tetap mendukung rasul – rasul ibas pertotonna. Dukungen e teridah ibas kenca Petrus ras Yohanes mereken kesaksinna tupung i tangkap ras kenca  ibebasken maka kerina teman – teman Petrus ras Johannes ertoto ras – ras mindo man Dibata gelah Dibata tetap simereken gegeh man kerinana ibas meritaken Berita Si Meriah (Perb 4 : 23 – 31).

Temata “Aron Dibata Si Ertoto, I Pegegehi Kesah Si Badia Guna Ertoto” ncidahken maka kita sebage sada aron (Hidup Di Dalam Persekutuan) erkiteken sie maka la banci lang kita ngelakoken bagi kai si jadi ibas perpulungen si pemena. Telu hal sibanci isehken kami ijenda guna banci si prakteken ibas kegeluhen persadaanta eme :

1. Pertoton si ilakoken radu ras teman si sada kiniteken tuhu penting sebab si ibelasken ras – ras e erbahanca gegeh toto e lebih megegeh, sebab pertoton e sendiri sifatna ibas kinitekenta eme sebage salah sada gegeh ras senjata rohani man kalak si tek guna melawan musuh – musuhna (Ef 6 : 10 – 18).

2. Pertoton si ilakoken perpulungen si pemena alu ertoto ras – ras merupaken sada bentuk rasa tanggungjawab bersama bagepe sekaligus mereken dukungen nandangi teman – temanna erkiteken ieteh perpulungen maka perlawanen si ialami Petrus ras Johanes labo perlawanen pribadi. Tentu hal sie pe banci silakoken ibas kegeluhenta sigenduari. Si eteh maka erbage – bage denga nge tantangen sir eh nandangi dirinta ras gereja ibas mbritaken Berita Si Meriah emaka tentu maka la banci lang pe ertoto me kita ras – ras guna mereken semangat ras dukungen man temanta si ngenanami erbage – bage tantangen ibas mbritaken Berita Si Meriah (Bd. Perb 1 14 ; 2 : 46 ; Rom 15 : 6).

3. Perpulungen si pemena itandai alu ciri khas sebage perpulungen si tutus (tekun) ibas ertoto, tentu bage ka me ateta kita nggeluh ras itandai sebage perpulungen/gereja si mengandaken gegeh ertoto sebage tanda kita tetap erpengendes kempak Dibata, dingen gereja/perpulungen si nggeluh eme di kune perpulungenna tutus ertoto ras mengerahken kegeluhen perpulungenna kubas missi Kristus.

Dage, jadilah kita perpulungen si ertoto ras mengandalken gegeh pertoton nandangi Dibata simada kuasa. Dingen tetap malem ateta  ertoto ibas kerina persadanta erkiteken kita sada penggejapen (Kam Kap Aku Ras Aku Kap Kam), dingen sieteh maka tanggungjawabta kap selaku kalak si tek notoken kerina kegeluhen si lit ibas doni enda.

Amin. PKU 14 Mei 2016.

Pdt. Israel HS Milala.

Suplemen Pekan Penatalayanan GBKP Wari Si Pe VI ken. 22 jan 2016. Lukas 8 : 1 – 3.“Ngelai Yesus Alu Kiniliten”

Khotbah : Lukas 8 : 1 – 3
Tema : “Ngelai Yesus Alu Kiniliten” (Persembahen Ras Keuangen Gereja)

Pokok Pikiran :

• Puji Tuhan ras wari enda tuhu malem ateta khususna man kam kerina diberu (Moria) erkiteken ibas wari enda me peduakaliken kita ngerana kerna peran Diberu ibas meritaken Berita Si Meriah. Ibas wari si erbih kita enggo ngerana kerna Janda i Sarfat ras Tabita (Dorkas) si muat peranna ibas ngelai arah kerina kinilitenna ras wari enda pe kita ngerana kerna peran diberu ibas ngelai (muat bagin ibas pelayanen).

• Bahan Pekan Penatalayenenta ibas wari si pe VI ken enda Luk 8 : 1 – 3 secara khusus ka isingetken kerna diberu – diberu singelai Yesus kidekah pelayanenna, eme :

1. Maria magdalena si ertutus ate ngelai Yesus, kenca ngenanami keleng ate Tuhan, ija Yesus mpelawes 7 setan ibas dirina nari, ras ia sendiri memiliki peran penting ibas peristiwa penyalipen ras kekeken Yesus.
2. Yohana ndehara Kusa Menteri Herodes, sierdahin sebage bendahara Herodes.
3. Susana si tetap setia ngikutken Yesus ibas nehken Berita Si meriah, alu makeken kebayaken si lit ibas ia.
4. Ras enterem denga diberu – diberu singikutken Yesus ras megiken pengajaren Yesus kidekah Yesus nggeluh antara lain eme Maria nande Yakobus, Yoses ras Salome (Markus 15 : 40 – 41).

• Temata ibas wari si pe VI ken enda, “Ngelai Yesus Alu Kiniliten” (Persembahen Ras Keuangen Gereja). Seh kel ulina tema enda man banta, erkiteken tema enda ningetken ras menghantam sikap – sikap, Individualis – Matrealis – Hedonis, si sangat mempengaruhi kegeluhen manusia ibas masa genduari, janah khususna man banta selaku warga GBKP tema enda ningetken :

1. Kita i tepa ras ipilih guna jadi suruh – suruhenNa kap ibas ndahiken – dahin simehuli, emaka kegeluhen si ibereken Dibata man banta labo ateNa guna sinikmati sisada, tapi gelah kerina pemere Dibata e si pakeken guna nehken keleng ate man kerina manusia (bd. Ef 2 : 10).
2. Kita iajuk ngelai alu kinilitenta si enggo ibereken Tuhan banta, muat bagin ibas tanggung jawab guna nampati dana pelayanen gerejanta, sebab melala bentuk – bentuk pelayanen si lit ibas gerejanta si membutuhken dukungen dana.
3. Ibas kedewasaan kinitekenta sebage kalak kristen tentu kita pe enggo memahami maka nehken persembahen pe enggo jadi sada tanggungjawabta man Dibata ras sebage refresentasi persekutuannta ras Dibata.

• Dage sebage ngawan GBKP, kerina Kita idilo Tuhan guna ngelai ibas kerina kecibal kegeluhenta, janah sieteh pe pelayanen ibas gereja banci terlaksana alu mehuli ras tentuna alu litna dukungen dana si mencukupi. Ise dage si ngelitken dana e tentu kita sebage ngawan ni perpulungen emaka mari sibuat baginta ibas mendukung dana pelayanen si lit ibas gerejanta bagi diberu – diberu si ituriken ibas oratenta sendah enda si enggo muat baginna guna nehken pelayanenna kidekah ras Yesus, janah la tanggung – tanggung kerina kebayakenna i pakena guna melayani Tuhan.

Pekanbaru 22 Jan 2016.
Pdt. Israel HS Milala.
(Sentabi Tulisen enda ibuat ibas buru – buru erkiteken pelayanen si lit ibas gerejanta, emaka banci jadi kurang kel bagi si iarapaken kita guna banci jadi refrensita ibas Pekan Penatalayanenta)

Suplemen Pekan Penatalayanan GBKP Wari Si Pe V Ken. Kamis 21 Jan 2016. Perb 9 : 36 – 43.“Ngelai Segedang Geluh”

Renungan : Perbahanen Rasul-Rasul 9 : 36 – 43
Tema : “Ngelai Segedang Geluh”

Pokok Pikiren :

• DR. Andar Ismail ngatakenca ibas bukuna “Selamat melayani” Penyebab dasar kita ijemba guna ngelai eme erkiteken Yesus sendiri enggo leben ngelai kita. Alu nggambarken, kidekah kegeluhen Yesus si 33 thn, jiwa kegeluhenna memang ngelai, aminna gia Ia erkuasa, tapi amin bage gia tetap ipeterukna baNa alu cara nggeluh menghambaken diri ibas Ia ngelai (diakonos = pelayan/doulus = budak).

• Jiwa Yesus si ngelai (menghamba) e me jadi jiwa kegeluhen kalak kristen sebage pengikutNa, eme alu nggeluh ngelai (diakonos/menghamba). Ibas praktekna memang dahin ngelai memang labo menukah, erkiteken pengertin ngelai memang labo terjeng menyibukken diri ibas pelayanen gereja, tetapi lebih asangken sie eme, mengosongken diri ras menempatken kepentingen diri sendiri iteruh kepentingen Tuhan ras kepentingen kalak sideban.

• Tema Pekan Penatalayanenta ibas wari pe V ken enda “Ngelai Segedang Nggeluh”. Tema enda memang pas kel seh man banta, erkiteken Yesus memang Tuhan si ngelai ras kita selaku pengikutNa pe tentu la banci lang nggeluh ras ngusih bagi si enggo cidahken Yesus ibas kegeluhenNa. Guna banci reh ulina pengertinta kerna dahin ngelai e, erpalasken Perb 9 : 36 – 43 sijadi bahan oratenta ibas Pekan Penatalayenen ibas wari si Pe V ken enda, piga – piga hal sibanci si idah arah oratenta enda eme :

1. Dorkas situhuna labo sekalak diberu si luar biasa erkiteken memang labo lit karunia ntah pe pemere sikhusus ibas dirina, ibandingken ras kalak si deban si muat bagin ibas pelayanen Tuhan si ituriken ibas Pustaka Si Badia. Kinibeluhen Dorkas pe memang hal sibiasa saja eme dahin si enggo biasa ilakoken diberu ibas jamanna eme njahit baju.
2. Ituriken ia sekalak si tek man Yesus kenca nusurna Kesah Si Badia, janah kenca ia tek ras erkiniteken man Yesus, kinitekenna e iwujudkenna arah nggit nampati kalak musil ras diberu balu – balu, alu erbahan baju – baju man kalak e janah merekenca secara gratis. I Jope ibas paksa si ndai memang enterem janda erkiteken perbulangenna mate erkiteken bencana sebage nelayan ntah pekerja keras ibas perahu. Erkiteken sie enterem janda – janda si lanai lit uang masukna seh jadi kalak si musil.
3. La jelas memang ituriken ibas Pustaka Si Badia maka Dorkas enggo erjabu ras lit anakna ntah lang. Tapi tupung ituriken ibas sada wari ia sakit janah kedungenna mate  ernterem kel kalak erate ceda. Ceda ate kalak si enterem e tentu erkiteken kalak e enggo ngenanami keleng ate ras kiniulin sialokenna ibas Dorkas nari.
4. Kalak sienterem erate ceda ibas kematen Dorkas, tapi tupung ibegina Petrus ras Yohanes paksa melayani la ndauhsa i kutana nari eme kuta i Lydia. I pindoken kalak gelah Petrus reh kurumah Dorkas, sebab tuhu keleng kel atena Dorkas. Ibas penuri – nurinna kerna kegeluhen Dorkas maka Petrus pe kepate ras erkeleng ate man Dorkas seh maka Petrus pe ertoto guna mpegeluh Dorkas ibas simate nari.
5. Berita kerna kekeken Dorkas ibas simate nari pe mbar kel beritana seh ku kuta Yope. Tapi hal sipenting ijenda sue ras temanta ibas wari enda eme ningetken man banta maka patut kel cara kegeluhen Dorkas e iteladandi ras patut ka pe i pujiken erkiteken kidekah kegeluhenna ibuatna baginna ibas ngelai Tuhan alu kebayaken si lit ibas ia.

• Perb 9 : 36 – 43 bahan oratenta enda encidahken man banta kerna keteladanen Dorkas ibas erkiniteken ras ngelai kalak sienterem kidekah kegeluhenna. Kita uga nge ninta ?

1. Gerejanta secara umum ibas ngelakoken dahin pelayanena enggo mehuli eme arah memahami ras ngelakoken tugas panggilenna ibas er- Diakoni. Hal sie pe tentu la banci lang sidukung gelah alu bage enterem jelma banci nggejapken nanam kehadiren gerejanta GBKP.
2. Ibas panggilennta secara pribadi pe maka tugas guna er-diakoni pe dahinta kap, emaka marilah sipakeken dirinta sebage perkakas Dibata ibas ngelai kerina jelma si membutuhken pelayanen Diakoni.
3. Melala bentuk – bentuk dahin Diakoni sibanci silakoken ibas ngelai. Dorkas ngelakoken dahin ngelai (er-Diakoni ) ibas hal – hal si kitik nari, tapi amin kitik perbahanenna sie tuhu – tuhu tergejap man jelma sienterem.
4. Mbelin kel pasu – pasu Dibata ibas kegeluhenta sigenduari. Tentu sie pe mereken kesadaren man banta maka mbelin kel kepe keleng ate Dibata man banta. Emaka mari si respon keleng ate Tuhan e alu encidahken perbahanen keleng ate man kerina manusia alu ngelakoken tugas panggilenta sebage kalak si ngelai (er-Diakonia).

• Dage siingetlah, Yesus enggo leben ngelai kita, emaka marilah ngelai kita, janah sijadiken dahin ngelai e jadi jiwa kegeluhenta alu menghambaken diri sebage bukti kita ajar – ajar Yesus.

Pekanbaru 21 January 2016.
Pdt. Israel H S Milala. STh.

Suplemen Pekan Penatalayanen Wari Pe IV ken. 20 Jan 2016. II Tim 4 : 1 – 5 “Beritakenlah Kiniulin Tuhan” (Berita Si Meriah)

Khotbah : II Tim 4 : 1 – 5
Tema : “Beritakenlah Kiniulin Tuhan” (Berita Si Meriah)

Pokok Pikiren.

• Ibas Perb 1 : 8 Jesus ngataken man ajar – ajarNa, dingen tentu kata e pe man banta genduari sebage ajar – ajarNa nina “…kam me pagi naksiken kerna Aku man kalak sideban”. Kata “Kam” ibas ayat enda nuduh kempak kerina kalak kristen maka ia enggo ndatken perintah guna meritaken Berita Si Meriah (Mat 20 : 28). Alu bage dage maka la lit alasen kai pe guna la meritaken Berita Si Meriah. Berita Si Meriah e arus i peseh ku kerina manusia, la erpilihen, termasuk man kalak si enggo eragama i luar agama kristen, gelah i etehna maka Yesus kap dalan keselamaten situhu – tuhu (Yoh 14 : 6).

• Bahan khotbah ibas pekan Penatalayanen ibas wari si Pe IV ken enda II Tim 4 : 1 – 5 enda pe nuriken kerna kerna persinget ntah nasehat ulang ibas ndahiken dahin meritaken Berita Si meriah si isehken Paulus man Timotius. Lit pe piga – piga persinget ntah nasehat si isehken Paulus man Timotius sibanci ituriken ijenda eme :

1. Paulus ningetken sada hal si pasti ras si harus i yakini eme kerna kerehen Jesus sipeduakaliken “Kristus reh denga pagi jadi hakim nandangi kalak singgeluh ras si enggo mate. IpantekiNa kinirajanNa” (ay. 1a). Kata enda me si menjadi alasen maka dahin guna meritaken Berita Si meriah arus i terusken dingen si harus i idahiken, erkiteken Kristus pasti reh denga pagi guna jadi hakim nandangi kalak si nggeluh denga ras kalak si enggo mate. Alu bage dage i jenda Paulus menekanken man Timotius maka dahin meritaken Berita Si meriah e seh kel pentingna, alu ngataken “Emaka ku pindoken kel man bandu i lebe – lebe Dibata ras Jesus Kristus” (ay.1). Perdiateken maka kata “Kel” jadi sada penekanen si penting.
2. “Pembarkenlah Berita e subuk teng – teng ras la teng – teng paksana, terusken gelah i beritaken” (ay.2a). Kata Paulus enda sangat bertentangen ras sada lagu si agak familiar ibas kalak karo nina “ula kata – kataken” ntah pe istilah si ipake piga – piga hasil produksi alu nambahken keterangen “untuk kalangan sendiri” ntah pe si hanya bengket kubas sada keanggotaan club, ingan belanja, rsd, alu erbahan “kartu member”. Kata “Pembarkenlah” e nuduh kempak kerina manusia ras sifatna “harus” dingen ibas kerina “waktu” subuk teng – teng ras la teng – teng paksana. Jadi alu bage Paulus sendiri memiliki konsep ibas ndahiken dahin pembarken Berita Si Meriah maka lalit batasen waktu ras tempat. (ay. 2b. Bdk. Ul 6 : 7 – 9).
3. Sifat ibas meritaken Berita Si Meriah si kataken Paulus tuhu – tuhu penting pe siperdiateken ras persinget enda jiwana situhuna sada persinget si keras kel ras arus si perdiateken alu serius, nina Paulus ibas persingetna e “Cidahkenlah salah kalak, persingeti dingen pegegehi ia, sanga ijarkenndu ia alu dem kesabaren” (ay.2b). Sifat pengajaren enda tentu berbeda adi si idah ibas jamanta sigenduari, erkiteken si idah memang genduari kalak si er-Berita Si Meriah enggo mulai mencari zona nyaman, mbiar erbahanca kalak tersinggung, lanai pang terang – terangen nuduhken si salah, malah sedih pe siakap erkiteken enterem per – Berita Si Meriah ibas masa sigenduari enda hanya ngelawaki saja dahinna ibas meritaken Berita Si Meriah, lanai ia pang mandang si salah ras si lepak. Kata Paulus ibas ayat enda situhuna bali kel ras konsep Yesus Rigth is right – Wrong is wrong, sebab memang Berita Si Meriah e bertentangen kel ras si la mehuli (Mat 5 : 37).
4. Persinget Paulus ibas ayat 2 e situhuna sifatna sangat keras sebab Paulus memang menelanjangi ras mereken fakta nandangi kai sijadi ibas paksa – paksa si reh si arus i perdiateken Timotius, alu ngataken ibas ay. 3 – 4 nina “Reh me pagi paksana lanai ibegiken kalak pengajaren situhu – tuhu. Sura – surana saja me idalankenna. I pepulungna guru – guru guna ngajari ia kerna kai siakapna entabeh megikenca, lanai ibegeinna pengajaren situhu – tuhu, tapi tutus atena megiken pengajaren sila tuhu”. Ibas kinata kegeluhen gereja, perpulungen, hal si isingetken Paulus enda adi siperdiateken memang enggo melala terjadi, ija gereja/perpulungen lanai kritis nandangi pengajaren situhu – tuhu, lanai rukur alu mbages ibas memahami kata Dibata ras ernembeh ate man per – Berita Si Meriah si tuhu – tuhu meritaken Berita Si Meriah alu benar. Ibas sienda perdiatekenlah ibas kita megiken khotbah ntah nenahken pengkhotbah ibas acara – acara gerejanta, la lah ndia kita tedehen ateta sihanya memeriahken ibadah saja ?
5. Persinget Paulus man Timotius nina, “Tapi kam ntah kai gia jadi, ola bene ukurndu. Megegenggenglah ibas ngenanami kiniseran. Dahikenlah dahin meritaken Berita Si Meriah e, janah dalankelah tanggung jababndu jadi suruh – suruhen Dibata” (ay. 5). Ibas sejarah kegeluhenna Timotius memang kalak situtus ras setia ndalanken dahinna ibas meritaken Berita Si meriah ras tetap setia ibas kinitekenna man Jesus Kristus. Tapi amin bage gia maka Paulus tetap mpersingeti ras memotivasi Timotius gelah la bene ukurna gia enterem pagi kalak silanai megiken pengajaren situhu – tuhu.

• Tema Pekan Penatalayanenta ibas wari pe IV ken enda “Beritakenlah Kiniulin Tuhan” (Berita Si Meriah), sada tema ningetken man banta simenuntut gelah tetap sidalanken tanggung jababta sebage murid – murid Kristus, alu nuriken kerina kiniulin Dibata, eme Tuhan si enggo nebusi kerina dosa – dosa manusia ras si dem alu keleng ate si tetap mereken pasu – pasuNa simpar man manusia.

• Mari dage sibuat baginta ibas meriteken Berita Si Meriah e, erbage – bage talenta si ibereken Dibata man banta, si pakekelah lah e guna ndahiken – dahin meritaken Berita Si meriah sebab erkiteken sie kapa maka Dibata pe mereken erbage – bage pemere man banta.

1. Sidahiken dahin meritaken Berita Si Meriah alu prinsip “The rigth man on the rigth pleace and teh rigth job”.
2. Memiliki gairah kerja ibas meritaken Berita Si Meriah labo sebagai kalak si i pekerjaken (*aron – nen, cataten tambahen i teruh) tapi sebage kalak si iutus Dibata guna ndahiken – dahin erberita.
3. Lit rasa penasaren adi la idahiken – dahin e alu mehuli, sebab sieteh e sebage panggilenta alu semangat pengabdian si tuhu – tuhu sebab tanggung jababnta kin guna ndahiken – dahin meritaken kerina kiniulin Dibata sebage kalak si enggo ndatken keselamaten ibas Dibata nari.

• Selamat Selamat menerima panggilen ras selamat menjadi per – Berita Si Meriah ibas kerina kegeluhenta, mari dage ““Pembarkenlah Berita e subuk teng – teng ras la teng – teng paksana, terusken gelah i beritaken”.

Pekanbaru 19 Jan 2016.
Pdt. Israel H S Milala. STh.

Cataten tambahen siman pikirenta ibas status FB ku Israel Heryantony S Milala. Selala 18 Jan 2016 :

ARON …. ?
Setelah berpikir ulang … aku mulai bertanya – tanya … tepatkah istilah ini dipakai dan dikembangkan pengertiannya dalam kata pelayanan :

1. Aron adalah sebuah konsep pola kerja sama dan tolong menolong (gotong royong) baik dalam menghadapi ancaman dari pihak lain atau dalam mengerjakan sesuatu pekerjaan diladang, sawah, membangun rumah, dsb.
2. Istilah aron berasal kata sisaro-saron (saling membantu) yang diwujudkan dalam bentuk kelompok kerja orang muda atau dewasa dalam satu kelompok yang bisa saja terdiri dari sedikit dan banyak orang di dalamnya.
3. Biasanya dilakukan secara bersama – sama secara bergiliran (jika sesorang tidak masuk dalam kelompok Aron, maka ia tidak akan mendapat giliran dalam mengerjakan ladang atau sawahnya), jika demikian maka sifat dari kata Aron ini juga sebenarnya adalah Meminjam Tenaga (Pinjam Gegeh).
4. Sifat lain dari kata Aron adalah dilakukan jikalau kesepakatan bersama dan kalau ada tempat untuk bekerja, jika tidak ada kespekatan dan tempat bekerja maka Aron biasanya tidak melakukan pekerjaanya, maka dapatlah dikatakan pekerjaan ini sifatnya temporer.
5. Dalam perkembangannya Aron akhirnya juga mencari upah dari setiap pekerjan yang ia lakukan dan juga dengan istilah negatif misalnya Aron si siwah. Dsb ….

Hanya sedikit terganggu dengan istilah ini dipakai dalam konsep pelayanan dan tidakkah lebih baik jika tetap memakai istilah yang Alkitabiah misalnya “Hamba” yang lebih sering dipakai dalam Alkitab dan oh ya, pertanyaan saya berikutnya : siapakah yang memberi otoritas kepada pembuat sebutan ini, sehingga harus di legalkan … hehehe.

Suplemen Pekan Penatalayanen wari Pe III Ken 19 Jan 2016. “Kerina Guna Kerinana”

Tema : “Kerina Guna Kerinana”
Khotbah : Perb 2 : 43 – 47

Pokok Pikiren :

• Perpulungen si pemena enda memiliki jumlah anggota 3000 kalak lebih seh maka dungna pe mencapai 5000 kalak lebih (Perb 4). Tentu ibas jumlah sienterem e erbage – bage situhuna kesulitan guna mpersadakenca, tapi amin bage, puji Tuhan ibas jumlah sibage buena kegeluhen perpulungen si pemena e ndatken cataten sejarah simehuli ibas sejarah Alkitab.

• Kai sebab maka perpulungen si pemena e ndalani kegeluhen perpulungen si mehuli ? Piga – piga hal si banci si idah arah kesaksin Pustaka Si Badia eme :

1. Perpulungen e pantek kenca nusurna Kesah Si Badia dingen Kesah Si Badia me si erdahin ibas pusuh kerina ngawan perpulungen seh maka perpulungen e tuhu – tuhu ermeriah ukur ibas kerina persadanna.
2. Kiniersadaan ibas perpulungen si ertambah – tambah aminna gia mbue kiniseran – kiniseran si ihadapina. Memang kiniseran e sendiri lit ekiteken pengakuan perpulungen e kerna Kristus sebage Tuhan bagepe erkiteken penjajahen ibas bangsa Romawi nari sebagai penguasa ras kibat penjajahen e enterem kalak kristen si jadi miskin erkiteken kinitekenna man Yesus, erkiteken ibas paksa sie terjadi diskriminasi man pengikut Kristus ibas kerina hal.
3. Rasul – rasul sebagai pemimpin perpulungen ibas paksa sie pe ngelai perpulungen e alu mehuli, janah memang ibas paksa sie rasul – rasul tuhu – tuhu mengambil peranna sebage perberita si meriah, pelayan (pengembala) ras pengajar alu benar ras mbiar man Tuhan.
4. Perpulungen e katawari pe muas melihe ras ertedeh ate nandangi pengajaren si isehken rasul – rasul erkiteken enggo mengalami pembaharuan ibas Kesah Si badia. Isamping ketekunen perpulungen megiken pengajaren ibas rasul – rasul nari, perpulungen e pe ertutus ate guna pulung ras – ras sebage tanda kiniersadanna.

• Erpalasken penjelasen e maka lit piga – piga si menjadi cataten man banta ibas kegeluhen kekristenenta paksa genduari enda eme :

1. Perpulungen si pemena nggeluh alu sikeleng – kelengen alu makeken kai si lit ibas ia, hal sie kerina eme hal silumrah janah lebih luar biasa sebab kerina si ilakoken perpulungen si pemena e labo hanya ilakoken ibas hari – hari besar agama saja tapi ibas setiap waktu ibas kegeluhen si lit.
2. Lit ‘kesadaren’ ibas kegeluhen, janah ‘kesadaren’ e sendiri menjadi e jadi sada hal si penting kel si arus ilakokenna sebab ietehna maka kiniersadaan e me jadi gegeh man perpulungen. Tentu pe ibutuhken genduari kesadarenta kerna pentingna kiniersadaan ibas kegeluhen gerejanta.

• Tema Pekan penatalayanenta ibas wari enda “Kerina Guna Kerinana”. Sada tema si ningetken mulihi man banta maka tuhu penting kel ibas kegeluhen kekristenenta ras gerejanta GBKP. Piga – piga hal sibanci jadi perenungenta arah tema dingen oratenta Perb 2 : 43 – 47 enda eme :

1. Gerejanta GBKP enggo tuhu enterem anggota ngawan perpulungenna. Tapi ibas sie enggo nge si pake e jadi gegeta guna negelakoken erbage – bage dahi – dahin simulia bagi si ngena ate Tuhan ?
2. Melala talenta ibas kegeluhen perpulungenta banci nge ndia e jadi gegehta guna ngelai ras nehken kekelengen sapih – sapih kita ?
3. Ibas piga paksa tahun silepas ninta rusur selaku ngawan GBKP “Aku Kap Kam Janah Kam Kap Aku” kata enda ningetken maka kita sada kap. Alu kata sie situhuna maka enggo me megegeh tema si seh man banta sendah enda “Kerina Guna kerinana”.

• Dage marilah erlajar kita ibas perpulungen si pemena sebab melala hal sibanci si praktekken ibas kegeluhenta arah cara kegeluhen perpulungen si pemena e ibas kegeluhen gereja ras pribadinta ibas masanta sigenduari. Ras tentu kerina sie banci terpraktek ibas kegeluhenta adi tetap si gejapken maka kita kap aronNa guna ndahiken – dahin simehuli dingen alu bage ka nge maka tema Pekan pentalayanenta ibas wari si pe III ken enda “Kerina Guna kerinana” tuhu – tuhu banci terrealisasi alu mehuli.

Pekanbaru 14 Jan 2016
Pdt. Israel HS Milala.

Suplemen Pekan Penantalayanen Wari II ken. 18 Jan 2016.“Lanai Atendu Keleng Bagi Si gel – gel”

Tema : “Lanai Atendu Keleng Bagi Si gel – gel”
Khotbah : Ketangkasen 2 : 1 – 7

Pokok Pikiren :

• Bahan oraten Pekan Penatalayanenta kitab Ketangkasen enda nuriken kerna pengenehenen rasul Johanes janah ibas pengenehenen Johanes e isingetken man Perpulungen Efesus si ibas paksa sie jadi sada kota si sangat terkenal i bas propinsi jajahan Roma i Asia ; kota pelabuhan si sangat sibuk alu perdagangen (bisnis) ras pusat pemujaan Dewi Artemis (Perb. Rasul 19 : 27, 35), bage pe melala terjadi praktek – praktek perdukunen ras sebage cataten man banta pe maka tupung sie kerina kekuasanan pemerintahen pe lit iteruh kekaisaren Romawi ras tentu sebage bangsa si terjajah maka melala kesuliten – kesuliten si idatken perpulungen e.

• Rikutken Ket 2 : 1 – 7 bahan oraten Pekan Penatalayanenta ibas wari si pe II ken enda lit 4 hal si penting si isingetken nandangi perpulungen kalak Kristen i Efesus eme :

1. Dibata mujiken kiniulin kegeluhen perpulungen e ibas perpulungen e ngikutken pedah – pedah Tuhan. Lit pe kiniulin kegeluhen perpulungen e si pujiken Dibata eme, ija perpulungen e alu tutus ndarami kebenaren kerna kata Dibata, nguji pengajaren rasul – rasul gelah ietehna palsu ntah lang (bd. Perb 20 : 29 – 32), tutus erdahin, persaber, la atena ngena kalk si erbahan kejahaten, megenggeng ibas negenanami erbage – bage kiniseran (ay. 1 – 3).
2. Dibata mandang (menegor) kinilaulin kegeluhen perpulungen erkiteken lanai atena keleng atena Tuhan ras mpraktekken keleng ate bagi tangtangna ndube ia ngaloken Tuhan ibas kegeluhenna, jenari mulai tek ras ersemabah nandangi dibata – dibata sideban, dingen kekelengenna lanai erpalasken keleng ate Dibata (ay. 4).
3. Dibata mereken jalan keluar guna banci mulilihi mpekena kegeluhen perpulungen kubas dalan Tuhan eme alu ningetken gelah perpulungen e jera ras ngakuken kerina kesalahenna man Dibata (ay. 5)
4. Persinget ras perintah e arus ibegiken ras idalanken perpulungen e, sebab lit ulih si mbelin si isehken Dibata man perpulungen e dikune perpulungen e megiken ras jera ibas kerina kesalahenna. Dingen ulih pertobaten e eme Dibata mereken man perpulungen e man buah batang kayu kegeluhen si lit turah ibas Pardis (ay. 6 – 7).

• Cara kegeluhen perpulungen Efesus si ituriken ibas Ket 2 : 1 – 7 enda, tentu sie kerina jadi persinget man banta ibas kegeluhen ke kristenenta sigenduari. Alu bage piga – piga hal sibanci jadi persinget man banta si isehken erpalasken oratenta ket 2 : 1 – 7 enda eme :

1. Kai pe silakoken ibas kegeluhen pelayanenta maka kerina e arus erpalasken keleng ate bagi keleng ate Tuhan nandangi manusia sebab adi la erpalasken keleng ate Dibata maka kerina perbahanenta labo lit ertina (bd. I Kor 13 : 1 – 3).
2. Mengintrospeksi diri (mangamati diri sendiri) alu cara memeriksa ngulihi kegeluhen si enggo i dalani kidekah enda, sebab banci jadi pe semangat kekristenenta enggo menurun.
3. Banci jadi pe lanai kita kreatif menumbuhken sikap – sikap simehuli ibas kegeluhenta subuk e ibas jabu ras keluarga. Sebab banci jadi memang, kita ras – ras ergereja ntah bersekutu tapi ibas sie pe banci jadi gairah semangat kebersamaanta enggo luntur, Keleng ate si lit pe enggo terasa hambar dingen kerina aktifitas pelayanenta enggo hanya semacam rutinitas.

• Temata “La nai atendu keleng bagi si gel – gel” eme sada statment/pernyataan Dibata man perpulungen Efesus ras banci jadi statment/pernyataan Dibata e terjadi ibas gereja ntah kegluhen pribadinta. Emaka mari siukuri mulihi sekalak – sekalak kerna tema si seh man banta ibas Pekan Penatalayanenta ibas wari si peduaken enda ; bagi si gel – gel denga nge kesetianta man Tuhan, ertutus ate nandangi pengajaren kerna pustaka Si Badia si benar, Erkeleng ate bagi hukum kekelengen si isehken Dibata, aktif nge kita bagi keaktifenta ndube ibas dahi – dahin gereja ?

• Dibata enggo milih kita jadi aronNa ras tentu kita bangga ibas Dibata milih kita jadi temanNa erdahin guna ncidahken kerina keleng ate si lit ibas Ia, emaka marilah dage si jemak ngulihi komitmenta ras Dibata dingen tetap setia nggeluh sebage kalak kristen sindalanken kerina perentah Dibata ibas kegeluhenna tep – tep wari.

Pekanbaru 15 Jan 2016.
Pdt. Israel HS Milala.

Suplemen Pekan Penatalayanen Wari I ken. 17 Jan 2015

Tema : “Kita Aron Dibata kap”
Khotbah : Ef 4 : 1 – 7

Pokok Pikiren :

• Surat Efesus enda eme surat penggembalaan Paulus si ituliskenna i bas penjara nari man perpulungen Epesus gelah tetap perpulungen nggeluh bagi si ngena ate Dibata bagi tantangna perpulungen tek man Kristus. Sebabna paulus mpersingeti perpulungen e erkiteken lit turah persoalen/konflik itengah – tengah perpulungen e. Lit pe persoalen/konflik si jadi eme :

1. Litna kelasepahamen kerna pengajaren keselamaten antara kalak kristen si non Yahudi ras kalak kristen si Non Yahudi (Junani, Romawi). Ibas pengajaren e kalak Yahudi menekanken maka keselamaten lebih mengarah man bana, erkiteken ia me simeteh torat ras atruren kerna keagaman umpamana : kerna sunat, pantangen pangan rsd. Sedangken kalak si Non Yahudi la ngakai kerna aturen agama e kerina ras erkiteken sie me maka konflik si lit antara kalak Yahudi ras Non yahudi semakin mengacauken perpeulungen e.
2. Ibas sisi sideban muncul pe masalah immoralitas. Masalah e muncul erkiteken Kota Efesus ini terletak i Asia Kecil (kawasan di Asia Barat Daya, letakna geduari kurang lebih i Turki bagian Asia). Ibas zaman PB Efesus eme kota pelabuhan tersibuk di kawasan Asia Kecil. (Terkenal alu juluken ”metropolis pertama dan terbesar di Asia”). Ibas konteks sienda me maka muncul masalah immoralitas terlebih – lebih ibas berkembangna pe pemujaan man Dewi Artemis si mempersiapken diberu – diberu si mejile ibas kuilna siertugas sebage imam ras pelacur suci ibas kuil – kuil Dewi Atermis. Isamping sebage sentral kegeluhen sex maka kuil e pe menawarken suaka man kalak si ngelakoken kejahaten.

• Lit pe pengajaren si isehken Paulus guna njagai kiniersadaan si lit itengah perpulungen e, bagi isingetken ibas bahan oratenta wari si pemena ibas pekan penatalayenta wari enda Ef 4 : 1 – 7 :

1. Paulus pe mperjelas doktrin si penting man perpulungen terlebih ibas ngelawan kiniteken nandangi Dewi Atermis ras pemahamen si berbeda kerna keselamaten antara kalak Yahudi ras Non Yahudi. Ibas sie Paulus ngataken sada ngenca Tuhan eme Bapa ibas kerinana ibabo kerina sinasa lit emaka kiniteken man Dewi Atremis eme kiniteken sisalah. Ibas ndatken keselamaten maka Paulus mereken penjelasen, maka ibas sada kiniteken man Yesus maka kerina kalak si tek man Yesus i selamatken janah la lit perbedaan antara kalak Yahudi ntah Non Yahudi (Bd. Ef 2 : 17 – 18) dingen kerina keselamaten e idatken alu sada peridin, ija ibas sada peridin e kerina kalak si enggo ngakuken Yesus eme Tuhan, maka kalak e enggo ersada ibas kematen ras kinikeken Yesus (ay. 5 – 6 ; bd. Rom 6 : 4 – 5).
2. Gelah perpulungen nggeluh bagi si iaturken Dibata alu sikap nggeluh : meteruk ukur, lemah lembut, saber, la pergelut erkiteken litna kekelengen ibas perpulungen e bagi keleng ate Kristus nandangi perpulungen e (ay. 1 – 2).
3. Tetap ngusahaken nggeluh ibas perdamen alu la sipandang punjuten tapi nggeluh bagi sada kula. Ibas sie Paulus mereken pengertin maka Kesah Si Badia me simpersadaken perpulungen e kubas sada pengarapen nandangi Tuhan eme ndatken kegeluhen sirasa lalap (keselamaten). Alu bage, ibas sada pengarapen si seri , maka Paulus ningetken gelah perpulungen tetap gelah nggeluh ibas perdamen (ay 3 – 4).
4. Ibas menyemangati perpulungen e Paulus ningetken, ibas kerina kinierbagen si lit ibas perpulungen e, maka kerina e eme kap gegeh si banci ipake guna membangun kiniersadan kula gelah lebih mehuli si saling melengkapi sada ras sidebanna (ay. 7 ; bd. 12 : 6 – 8).

• Arah penjelasen kerna bahan oraten Pekan Penatalayanenta ibas wari si pemena enda piga – piga hal sibanci simaknai khususna ibas kegeluhen gerejanta GBKP eme :

1. Gelah gerejanta pe lebih mbages memahami maka GBKP pe bengket nge kubas bagin kula ni Kristus siarus mengambil peranna sebage gereja situhu – tuhu ras lebih ernanam ras tergejap kehadirenna i tengah – tengah kegeluhen i doni enda.
2. Sebage warga gereja GBKP. Kita sebage ngawan ni perpulungen nggeluh ibas bagi sada kula, alu sikap nggeluh meteruk ukur, lemah lembut, saber, la pergelut ras sikeleng – kekelengen. Lanai jamanna nggeluh sipandang punjuten guna saling menjuatuhken, menganggap diri paling benar, paling berjasa, paling rohani, tapi marilah kerina kita sebage ngawan niperpulungen makeken kerina talenta silit ibas geluhta guna membangun kiniulin gerejanta kuarah lebih mehuli sebab Tuhan si isembah ras simada gerejanta sada kap dingen sada nge kerina tujunta eme kubas kegeluhen sirasa lalap.

• Tema Pekan Pentalayanenta : “Kita Kap Aron Dibata”. Tema enda ningetken man banta dua hal eme sebage “aron” maka kita me sierdahin si terpilih ras sebage “aron” kita ituntut guna radu ras ndahiken dahin si isehken Tuhan man gerejaNa, alu sada sada arih dingen sada ukur, saling mendukung ras si iwujudnyataken e ibas perbahannen sinyata rikutken kerina pemere/talenta si ibas kita. Gelah alu bage melala hal banci silakoken tole guna ndahiken – dahin si lit ibas gerejanta.

Pekanbaru. 14 Feb 2016.
Pdt. Israel HS Milala

Suplemen Pekan Doa Wari III. 19 Mei 2015 “ERTOTO GUNA SEKELEWETTA” Mrk 7 : 24 – 30

Invocatio : Jesaya 58 : 10
Ogen : Jesaya 49 : 5 – 6
Khotbah : Markus 7 : 24 – 30
Tema : “ERTOTO GUNA SEKELEWETTA”

Shalom.

Kekelengen Tuhan Yesus …
La sigejap enggo seh kita ku wari III ken ibas Pekan Doanta, janah tentu arah Pekan Doa enda reh ulina komunikasita ras Dibata arah kerina pertotonta. Mbarenda banci jadi lenga sieteh ertoto ras banci jadi pe genduari lenga ka bo sieteh kel uga seharusna ertoto, tapi erpengarapen kita mbera arah Pekan Doa sekali enda reh ulina kerina isi pertotonta erkiteken kegeluhen pertendinnta ras tingkat kedewasanta ibas Tuhan enggo reh ulina erkiteken pengajaren Kesah Si Badia (Bd. Tema Pekan Doa I & II).

E gia bicara nulih kita entisik ku masa awal kekristenenta, secara pribadi – pribadinta, uga nge mbarenda carata ertoto, uga nge kira – kira kata si ibelasken, dem kel nge alu kiniteken kerina kata sini ibelasken kerina pertotonta ?

Pengalamen pribadiku mbarenda adi suruh ertoto lit nge lucu – lucuna, pernah nge ertoto alu nggir – gir, la ertorosen, betat – betat, ertoto alu gendek – gendek, kata “Tuhan” pe pernah salih jadi “turang” ban grogi … tapi kerina pertoton e murni, kata siibelasken tuhu – tuhu ndarat ibas pusuh nari dingen tuhu – tuhu iyakini ibas kiniteken si paguh man Tuhan maka Tuhan pasti ndengkehken pertoton e …. adi genduari aku ertoto enggo agak beluh beluh, kata – katana pe enggo agak mejile, nggedang ka, lanai mbiar ras tenang saja adi ertoto, topik pertoton pe enggo mbue ras kai pe banci itotoken … ? (hehehe … kusingetken enda, gelah ula min kita terjebak hanya kubas rutinitas doa saja). E gia kita gia kerina, me enggo me beluh ertoto …. ? sebab temata ibas wari si pe III ken enda ngajak kita subuk secara komunitasta ntah secara pribadi ngajuk ntah ngiahken kita gelah kita “Ertoto Guna Sekelewetta”.

Bahan khotbahta ibas wari pe III ken enda ibas Mrk 7 : 24 – 30, nuriken man banta kerna sekalak diberu si tek man Yesus, guna lebih jelasna mari si gar – gari kerna bahan renungenta enda :

Bahan khotbahta Mrk 7 : 24 – 30 enda sejajar ras Mat 15 : 21 – 28 sinuriken kerna kiniteken diberu man Yesus. Lit pe ije ituriken :

• Ibas Matius 15 : 21 – 28 isingetken : Yesus la menjawab pemindon diberu Siro Fenesia e alu sengkebabah ranan pe, malahen Yesus nuruh ajar – ajarNa mpelawes diberu e sebab gejek iarah pudi kalak e (ay. 23). Jenari tempa pe Yesus agak diskriminasi alu ngataken diriNa iutus hanya guna kalak Israel si enggo bene bagi biri – biri si lalar (ay. 24), bagepe tempa agak menurunken drajat diberu erkiteken Yesus ngataken diberu bali ras biang (ay. 26), tapi amin bage gia diberu e tetap erpengarapen kerna kuasa Yesus seh maka nina Yesus man diberu e, “kam diberu situhu – tuhu tek man Dibata” (ay. 28).

• Ibas Markus 7 : 24 – 30 isingetken : Yesus paksana i daerah taneh Tirus, Sidon, Siria ija ije nterem i je kalak non-Jahudi. Tupung Yesus ije me reh sekalak pernanden ndahi Yesus erkiteken anakna iseluki setan. Pernanden e nembah seh kutapak – tapak nahe Yesus, erkiteken tek ia Yesus ngasup mpelawes setan sineluki anakna. Tapi Yesus la serius nanggapi pemindon diberu e alu ngataken “Peturut lebe anak-anak e man seh besur, sabab la patut ibuat nakan anak-anak je nari iambengken man biang” (ay 27), tapi amin gia perkataan Yesu, la erbahnsa surut semangat pernanden e janah situhuna lit nge kesadarenna kerna kai si ikataken Yesus e, sebab ia memang labo kalak Jahudi, tapi amin bage gia nina man Yesus “Tuhu, Tuhan. Tapi biang si iteruh meja pe kenan nge rimah – rimah si ndabuh iban anak – anak e” (ay. 28), alu perkataan sie diberu e encidahken maka ia tuhu – tuhu kel ngarapken perkuah ate Yesus. Dingen arah pengarapen ras kinitekenna e me maka nina Yesus man diberu e “Perban jababndu si bagenda, mulihlah ku rumahndu, setan enggo ndarat i bas anakndu nari” (ay. 29) janah tuhu malem anakna ndai kenca ia mulih kurumahna (ay. 30).

Kekelengen ni Tuhan, arah bahan khotbahta enda isingetken me man banta kerna pengarapen ras kinigenggen diberu Siro Fenesia situhu – tuhu tek man Yesus, janah hasil ibas pengarapen ras kiniteken diberu e tuhu erbahanca malem atena, erkiteken pemindonna kerna kesehaten anakna si iseluki setan isehken Yesus. Tentu enda sekaligus jadi penjemba man banta secara pribadi ibas geluh kinitekenta, gelah kita pe tetap erpengarapen ras megenggeng ibas nimai jawaben Tuhan ibas kerina pertotonta man baNa ras bahan khotbahta ibas berngi enda pe sekaligus jadi koreksi man banta :

• Ibas kiniteken. Diberu e tuhu – tuhu encidahken dirina tuhu tek man Yesus ras ietehna Yesus ngasup mulahi anakna ibas kerasuken setan nari. Koreksi ibas kegeluhen kinitekenta, lit nge ndia kinitekenta bagi diberu Siro Fenesia e ?

• Ibas erpengarapen. Diberu Siro Fenesia tuhu – tuhu megenggeng, aminna pe i tolak Yesus, ia tetap encidahken pengarapen ras kinitekenna man Yesus. Bicara si koreksi dirinta seh piga kali nge kita ngasup ertoto kerna sada – sada hal ibas dirinta, dingen sabar ras megenggeng nge kita ?

• Ibas pengakun. Diberu e tuhu – tuhu mengakui Yesus e Tuhan, tupung ia ngataken “O Tuhan anak Daud” (Mat 15 : 22), koreksi dirinta terjeng uga pengakunta man Yesus, me lanai bo lit kesangsinta nandangi kuasa ras keleng ateNa ?

• Ibas mindo. Pemindon diberu e ijawab Yesus, gia sekali diberu e iakap jahudi la mungkin ndatkenca. Tentu sie encidahken man banta, adi kalak sila nandai Tuhan pe i jababNa, tentu pertotonta pe ijababNa nge erkiteken kita memang anakNa.

Alu bage dage, kiniteken, pengakuan ras pengarapenta man Tuhan perlu rusur si pegegehi, sebab kalak si tutus ertoto ras megenggeng ngena ate Tuhan sebabi Ia perkuah kap, si empati nandangi kegeluhenta.

Tema Pekan Doanta ibas wari si III ken enda “Ertoto Guna Sekelewetta”. Bagi enggo sieteh, gereja emekap lambang kehadiren kinirajan Dibata i doni ras sekaligus sebagai salah sada komunitas sosial, alu bage maka gereja pe arus encidahken kepedulianna nandangi kegeluhen iluar daripada dirina, hal sienda me si isingetken ibas tema umum Pekan Doata tahun enda “Ertoto Nandangi Gereja Gelah Erguna Ku Kerina TinepaNa”, ertina gereja (Bc, kalak Kristen) la banci hanya rukur guna dirina saja ntah peduli man bana saja, tapi gereja (Bc, Kalak Kristen) arus encidahken tugas ras panggilenna alu encidahken kepedulianna i tengah – tengah kegeluhen manusia. Salah sada bentuk “Kepedulian” e, berngi enda isingetken man banta eme alu “Ertoto guna sekelewetta”, ertina adi enggo si ibaba ibas pertoton uga kel pe maka pertoton e pasti ningetken ras njemba dirinta (gereja/kita) guna ngelakoken sada – sada tindaken nyata sebage buah aplikasi pertotonta ras lebih asangken sie tek kita, Tuhan pasti nampati ras megiken kerina pertoton kalak situtus ndahiken dahinNa.

Ise dage siman totonken ? Adi ngerana kerna sekelewetta enterem, melala erbagena. Keluarganta, teman ibas perpulungenta, si beda suku ntah beda agama ras kita, beda tingkat sosial, ekonomi, rsd. Ibas erbage – bage enda me sicidahken kehadirenta sebagai kalak si tek ras jadi terang man sekelewtna. Kita (Gereja/kalak kristen) la banci bersifat eksklusif, tertutup, hanya dirinta, jabunta, komunitasna ngenca ateta si iperdiatekenna tapi kita harus pe terbuka man sekelewetta.

Berngi enda kita nerusken Pekan Doa si pe III ken bagi si enggo iaturken ibas gerejanta, alu bage khususna i bas ertoto, sue ras temata ibas berngi enda “Ertoto Guna Sekelwetta”, emaka mari sibuka dirinta gelah kita lanai ertoto hanya guna dirinta ras keluarganta saja, tapi kita lebih terbuka notoken kerina si lit i sekelewetta ras adi e enggo terlaksana alu mehuli tentu alu la sengaja ras sekaligu kita enggo erlajar jadi kalak si peduli nandangi si iluar dirinta.

Usul tindaken konkrit ibas sienda : Ntah enggo nge perlu sibahan waktu khusus nandangi diri pribadinta, khusus ertoto nandangi kalak iluar dirinta (sekelewetta), bagepe ntah enggo nge perlu si bahan ras sikembangken jam doa ibas Gereja ntah ibas PJJ-nta, gelah alu bage kita banci lebih khusus notoken kerina kecibal kegeluhenta/perpulungenta ras kalak si isekelewetta, ertina la hanya ibas doa syafaat bagi si enggo biasa si lakoken, alu pengarapen ras tujuanna ku lebe, lit komunitas doa ibas gereja ntah PJJ-nta ras sekaligus kita mengembangken kegeluhen kerohanianta.

Selamat ertoto ras ertotolah guna kerina kalak si i sekelewetta. Tuhan simasu – masu ras megiken kerina pertotonta.

Amin.
Pekanbaru 19 Mei 2015

Suplemen Pekan Doa I. 17 Mei 2015 “ERTOTO GUNA KEGELUHEN PERTENDIN” 1 Korinti 2:13 -16

Invocatio : Kuan-kuanen 4 :11
Ogen : 1 Raja-raja 19:1-9a
Kotbah : 1 Korinti 2:13 -16
Tema : “ERTOTO GUNA KEGELUHEN PERTENDIN”

Penjelasen Bahan

1 Kor. 2:13-16 ilatarbelakangi perselihan si terjadi i tengah-tengah perpulungen Korinti (1 Kor. 1:11-12). Perselisihen si terjadi erkiteken piga-piga perpulungen si lenga dewasa geluh pertendinna, ibahanna kelompok-kelompok erpalasken hikmat duniawi.

E maka i bas perikop enda Paulus mpertentangen kerna kepentaren Dibata ras kepentaren manusia, antara kalak si enggo dewasa geluh pertendinna ras kalak si la lit bas ia Kesah si Badia. Kalak si enggo dewasa pertendinna, e me kap kalak si enggo ngaloken keselamaten i bas Jesus Kristus nari, ras kegeluhenna terus-menerus ipelimbarui Kesah si Badia (bdk. ay. 12, “ngaloken Kesah si Badia”).

Kalak si enggo dewasa pertendinna (pneumatikos) nina Paulus e me kap manusia rohani, si terbuka nandangi kepentaren Dibata, si nggit iajarken, iarahken ras ipengasup Kesah si Badia guna ndalanken sura-sura Dibata. Kalak si enggo dewasa pertendinna ngasup ia ertimbang kerna kai pe. Tapi kalak duniawi (psukhikos) si nimaksud Paulus e me kap si lenga dewasa geluh pertendinna, si ngutamaken kepentaren doni ras pemetehna, umapamana: lebih mengandalken gegehna, jabatenna, kinibayakenna, kekuasaanna, rsd. Manusia duniawi la ia nggit iajarken Kesah si Badia, sabab ianggapna sada kebodohen (“si lang-lang akapna,” ay. 14). E maka nina Paulus, manusia rohani bertentangen ras manusia duniawi, hikmat Dibata la banci inilai alu ukuren hikmat duniawi (ay. 15).

Ogenta e me kap turin-turin kerna Elia si ngenanami keletihen jiwa, lebih mengandalken gegehna asangken gegeh Tuhan. Padahal Elia mbaru saja menghancurken gegeh 450 nabi baal alu tetap mengandalken gegeh Tuhan. Tapi kenca ieteh Isebel arah penuriken perbulangenna raja Ahab, merawa kel Isebel. E maka itenahkenna kata, maka Elia arus mate, bagi pemunuhna nabi-nabi baal. Kenca megi berita e, tuhu-tuhu mbiar kel ia. Lupa ia lit Tuhan si tetap nemani ras nampati geluhna, tapi lebih ia mengandalken gegehna. Mbiar Elia e maka lompat ia ras suruh-suruhenna guna ngkelini kesahna.

Lupa Elia, kesah manusia lit i bas kuasa Tuhan. Kenca seh i Bersyeba, tadingkenna suruh-suruhenna ras iteruskenna perdalanenna ku taneh si melenget sada wari perdalanen. Seh ia ku sada batang kayu, janah cicio ia i je, janah madin akapna ia mate saja. Ertoto ia man Tuhan, “Enggo me Tuhan, buatlah kesahku, madin me aku mate.” Elia mengalami putus asa bahkan stress. Medem ia teruh batang kayu e. Tupung ia medem reh Malekat Tuhan nampati Elia, nuruh Elia keke ras man, sabab enggo lit i je roti ras sada guci deherken takalna. Man ras minem jenari medemka ia mulihken. Dua kali kejadin si serupa. Pangan ras inemen ndai kedungenna mereken gegeh man bana labo erdalan 40 wari ku deleng Sinai deleng si badia. Arah Turin-turin Elia, banci siidah maka kemahen Tuhan banci mengalami keadaan down, putus asa asum ia lebih mengandalken gegehna asangken gegeh ras kepentaren Tuhan si la terbatas. Tapi kalak si tetap erkemalangen man Tuhan, tetap isampati Tuhan, Elia ibereken Tuhan gegeh tole guna banci nerusken kegeluhenna.

Perenungen

Tema : “Ertoto guna kegeluhen pertendin.” Manusia terdiri dari jasmani ras rohani. Dua-dua e penting i bas kegeluhenta. Tapi mekatep kita lebih fokus guna ncukupi kebutuhen jasmaninta asangken pertendinta. Ertina kurang seimbang pemenuhen si niperluken guna kebutuhen pertendinta. I bas sada wari 24 jam saja piga menit/jam sibereken waktuna guna kita ertoto, rende, ngoge Pustaka guna ncukupi pangan guna geluh pertendinta? Lit deba sama sekali la lit waktu guna si e kerina, pepagi nari seh berngi berkutat kita ku bas kebutuhen jasmani. I bas kita ertoto, i je pe biasa ikataken 3 sendalanen si nipindoken kita man Tuhan: kesehaten, rejeki ras anak-anak. Guna kegeluhen pertendinta, gelah dewasa kinitekenta, gelah tambah kesabaren, kekelengen, pengarapenta man Tuhan, lupa kita mindosa man Tuhan. Firman Tuhan mpersingeti kita gelah ertoto kita guna kegeluhen pertendinta. Sabab manusia labo hanya arah roti saja ia nggeluh tapi pe arah tep-tep kata si ibelasken Dibata. Bahkan Paulus ngatakenca man Timotius latihan gerak badan lit piga-piga gunana, tapi latihan pertendin erguna i bas kai pe, sabap latihan pertendin e njamin geluhta subuk si genduari bage pe si pagin (1 Tim. 4:8).

Pdt. Larena Sinuhaji. (Batam Centre)

Cataten Tambahan Aplikasi :
La banci si pungkiri maka ibas zaman genduari enda reh buena me tantangen si man hadapenta, adi si gambarken secara singkat, ekonomita banci jadi lanai pernah stabil ras banci jadi lanai terprediksi kita uga ekonominta ku lebe enda, nilai – nilai kegeluhen semakin ceda, standar – standar moralitas enggo gagal guna menciptaken kedamen ras kebahagian ibas geluh manusia, ija pa nari pe reh tantangen man banta, janah arus siperdiateken maka mekatep nge kepentaren manusia la ngasup ngelawan kai sijadi ibas kegeluhenna.

Ibas sisi sideban pe, genduari enda trend ka si idah kalak lebih suka ndarami kata – kata motivasi guna menyemangati geluhna, emaka la ateta mamang maka enterem kel gundari motivato r – motivator si mereken kata – kata bijakna kerna kegeluhen si hanya bermain i daerah lingkungen pemikiren manusia seh maka di kune kata – kata motivator e gagal guna menyemangati kegeluhen sekalak jelma, kalak e dungna banci jadi kehilangen arah ras tragisna mengambil jalan pintas alu mengahiri kegeluhenna.

Si idah ka pe genduari enda berkembang cara – cara manusia siatena menyemangati kegeluhenna alu menikmati kesenangen doni, subuk e alu cara gawah – gawah ku luar negri ntah dalam negri, ngelakoken hobby, kumpul – kumpul ras teman meriah, rsd. Tapi ibas akhirna kerina e sifatna hanya sementara janah la pernah mereken kesenangen situhu – tuhu janah kedungenna kepeken peturahken masalah – masalah simbaru, umpamana : sen si iperluken la erbias – bias, kesehaten terganggu erkiteken hobby si isalurken pe mekatep enggo kelewaten, kumpul ras teman – teman dingen meriah – riah pe kepe sifatna hanya sementara.

Sue ras tema Pekan Doa ibas wari si pemena enda, mari si pegegehi dirinta alu “ERTOTO GUNA KEGELUHEN PERTENDIN” gelah alu bage kidekah kita nggeluh malem ateta ibas penemani Dibata ras nggeluh alu cara – cara bagi singena ate Dibata.

Sentabi.
Man kerina teman singarapken tulisen suplementa ibas wari si pemena, lenga banci kusikapken alu mehuli, erkiteken kesibuken pelayanen ibas gerejanta.

Suplemen Pekan Doa Wari II. “Ertoto Guna Nggeluh Sepenggejapen Ibas Perpulungen” Job 29 : 12 – 17

Suplemen Pekan Doa Wari II. Tgl 18 Mei 2015.

Invocatio : Epesus 5 : 2
Ogen : Ul 24 : 17 – 22
Khotbah : Job 29 : 12 – 17
Tema : “Ertoto Guna Nggeluh Sepenggejapen Ibas Perpulungen”

Shalom.

Tema Pekan Doanta ibas wari si II ken enda “Ertoto guna sepenggejapen ibas perpulungen”. Tema enda eme sada pengajuk man banta ntah pe jadi sada persinget man banta guna banci simaknai pertotonta tep –tep kali kita ertoto. Sebab sieteh maka pertoton kalak Kristen arus teraplikasi ibas kegeluhenna, ertina : Dibata labo hanya banci i jumpai ibas pertoton, tapi Dibata pe banci ijumpai ibas sekalak seninaNa simusilna ibas doni enda, ertoto pe kepeken labo terjeng tutup mata tapi pe membuka mata, ngenehen kenyataan si lit ibas sekelewetta dingen ertoto pe labo hanya melipat tangan tapi pe turun tangan ras melakukan tindaken sinyata (bd. Mat 25 : 31 – 46).

Ogennta si pemena ibas wari enda Ul 24 : 17 – 24 ningetken aturen kegeluhen kalak Israel ibas perentah Dibata, maka bangsa e arus mperdiateken kegeluhen kalak pertandang, anak melumang, bagepe diberu balu – balu, lit pe aturen si arus idalanken bangsa e eme :

• La banci ngerampas kai si menjadi hak man kalak pertandang, anak melumang ras diberu balu balu (17-18)

• Arus mereken penampat man kalak pertandang, anak melumang ras diberu balu – balu, la banci bangsa enda sinik saja (19 – 22)

Ras malem ateta maka kesaksin Pustaka si Badia tuhu – tuhu mereken pejemba man banta erkiteken nai – nai nari lit nge kalak si enggo ndalanken kerina perentah Tuhan ibas kegeluhenna alu mehuli ras banci ikataken sempurna ibas ndalanken kerina kata Dibata. Salah sada isaksiken senda man banta eme kerna kegeluhen Job, sebagai salah sada kalak situhu – tuhu erkiniteken man Tuhan ras ndalanken kerina perentah Tuhan ibas kegeluhenna aminna ia sendiri pe lit ibas kesusahen :

• Job jadi teladan sebab aminna ibas kiniseran, Job tetap ngasup mperdiateken kalak si musil, anak melumang, kalak si lit ibas kesusahen, mata man kalak si pentang, nahe man kalak si cempang – cempang (Job 29 : 12 – 17).

• Job tetap nggeluh ibas standar kebenaren ras keadilen Dibata. Bageme Job mampu menghadirken Dibata ibas kegeluhenna guna menjawab kalak sindarami jawapen ibas Dibata nari, ibas kerina perbahanenna si mehuli.

Ibas gerejanta GBKP enda kita jadi ngawan, sada rumah dingen nggeluh bagi sada kula. Malem ate erkiteken memang enggo si praktekken rasa saling penggejapen, saling membutuhken, saling mperdiateken ras sitatang – tatangen ibas kerina dampar kegeluhen (I Kor 12 : 12 – 31. Ef 5 : 29). Tapi amin bage gia, maka la banci sipungkiri kerina sie lenga bo erdalan bagi arusna kel, mekatep nge kepentingen pribadi lebih siutamaken asangken kepentingen bersama (Kepentingen Dibata), umpamana runggun/klasis masing – masing lebih mementingken kepentingenna, padahal lit denga nge si idah perpulungen si harus isampati pelayanenna ibas erbage hal ras secara finansial, ibas kinata kegeluhen mekatep pe kegeluhen anggota perpulungen kurang sepenggejapen sapih – sapih ia. Ibas tahun 2013 gerejanta GBKP situhuna enggo ngelumbaken cara nggeluh “Sepenggejapen” eme alu nggeluh er-solidaritas, alu motto “Aku kap Kam – Kam Kap Aku” ija arah tahun “Peningkaten Solidaritas” e ndube ateta kegeluhenta lanai mbeda-mbedaken sada ras sidebanna tapi nggeluh alu sada tujun sepenggejapen ras sikeleng – kelengen guna kemulian Dibata.

Melala memang tantangen guna banci nggeluh bagi siarapken tema, ogen ras oratenta ibas Pekan Doa sipeduaken enda ! tapi tek kita ibas paksana pagi “Ertoto guna nggeluh sepenggejapen” banci jadi ibas kerina kegeluhen anak – anak Dibata eme saling merasaken, litna perasan bersatu ras senasib, dingen kerina sie pagi jadi nilai – nilai kegeluhenta sierpalasken keleng ate Kristus.

Alu bage dage pekan doa wari si II ken enda alu temata “Ertoto guna sepenggejapen ibas perpulungen” memotivasi ras mereken semangat man banta guna banci seh tujun bagi siarapken temata.

• Tentu bagi kalak Israel si nggeluh ibas undang – undang Tuhan bagi isingetken ibas ogen si pemena ndai Ul 24 : 17 – 22, maka tentu aturen e pe berlaku man banta genduari ras mari sibereken dirinta enda nggeluh ibas undang – undang Dibata.

• Model siman usihenta enggo icidahken Job ibas dirina, ija Job menghadirken Dibata ibas kerina praktek kegeluhenna seh maka karakter kegeluhenna tuhu ngena ate Dibata ras jelma isekelewetna (Job 29 : 12 – 17).

Sebage Cataten :
Temata : “Ertoto guna nggeluh sepenggejapen” situhuna sekaligus jadi koreksi man banta ibas setiap kali erbahan pertoton Syafaatta :

Mekatep kita ertoto guna sekalak temanta ntah ise gia ibas doa syfaatta, sijadi penungkunen man banta, enggo nge si jiwai ntah sidat konswekensi pertoton syafaat e ? sebab banci jadi pertoton syafaatta e hanya bersifat kalimat – kalimat klise saja, umpamana : mekatep kita ertoto guna kalak si kelihen, padahal tupung kita man, maka la bo ise pe si inget seh maka paksa kita man melala kel situhuna siambur – amburken bage – bage saja. Mekatep kita ertoto guna kalak si mesera baban geluhna tapi labo kai pe silakoken guna mengurangi beban temanta ndai. Mekatep pe kita ertoto guna si sakit tapi situhuna banci jadi kita labo kepate ntah merasaken kiniseraan temanta e ibas sakitna. Emaka banci jadi sifaat pertoton syafaatta bage semacam tour doa murahen, umpamana : kita ertoto kerna bencana alam i Indonesia, jenari notoken Pemerintahen ras peranggaktna kerina, jenari melompat pertotonta e ku Timur Tengah notoken gelah ngadi kalak erperang, jenari lompat ka ku Afrika notoken kalak si kelihen ijah, dungna i akhiri alu kata Amin tanpa lit aplikasi ibas pertoton e.

Kai kin situhuna pertoton Syafaat, Pertoton syafaat e bali jiwana ras si imaksudken tema Pekan Doanta ibas wari si peduaken enda “Ertoto guna nggeluh sepenggejapen”. Erti pertoton Syafaat bagi si isingetken Pdt. DR. Andar Isamil ibas bukuna “Selamat Pagi Tuhan” eme :

Syafaat erasal kata ibas kata Arab nari eme syafa’at si ertina perantaraan ntah pertolongen guna mpeseh permohonen pertolongen. Kata Syafaat enda sejajar ras kata syafakat si ertina simpati. Alu bage maka pertoton syafaat e sendiri situhuna lahir ibas kata simpati (syn – pathos = sama – sama merasakan). Rasa simpati simbages e banci si idah pertoton Tuhan Yesus nandangi ajar – ajarNa ibas Yoh 17 : 9 – 17.\

Alu bage dage maka Pertoton syafaat eme sada usaha ras keinginen guna terlibat nandangi sekalak jelma ras persoalen ibas kai si itotoken. Keterlibaten e situhuna la hanya terjeng ibas kalimat – kalimat saja tapi kai si ibelasken jadi konsekwensi si isusul alu tindak lanjut sinyata.

Memang labo kerina kel pertoton syafaat e jadi konsekwensi si isusul alu tindak lanjut sinyata, tapi paling tidak, enggo min kita terbuka nandangi pertoton si ibelasken jenari berusaha nandingken dunia pribadinta dingen memasuki ras menyelami isi pertoton syafaat e ibas diri kalak sideban si isusul alu tindaken keprihatinen sinyata.

Selamat “Ertoto guna nggeluh sepenggejapen” ras ertotolah dage guna nggejapken kerina isi pertoton ras cidahkenlah ibas tindaken sinyata kerina isi pertoton e alu tuhu – tuhu sepenggejapen.

Amin.
Pekanbaru 15 Mei 2015.