Suplemen PJJ 29 Jan – 04 Feb 2017. Ersaksi Eme Komitmentku Jeremia 20 : 7 – 9

Suplemen PJJ 29 Jan – 04 Feb 2017.

ERSAKSI EME KOMITMENKU
Jeremia 20 : 7 – 9

Ersaksi eme salah sada tugas gereja dingen tugas panggilennta sebage ajar – ajar Tuhan Yesus (Bd. Mat 28 : 19 – 20). Tapi amin bage gia sieteh ersaksi labo hal simenukah terlebih – lebih ibas paksa kegeluhenta sigenduari. Janah sieteh pe maka ersaksi labo hanya terjeng bagi kalak simereken kesaksin ibas sada pengadilen tapi ersaksi si imaksudken ibas pengertin kegeluhen kekristenen maka kesaksin e sekaligus jadi karakter ntah gaya hidupta ibas kegeluhenta si tep – tep wari, dingen adi ikataken ersaksi eme sekaligus jadi karakter ntah gaya hidupta maka kalak sibage arus lit komitmenna guna ndalanken tugas ras panggilenna maka kesaksin e banci ilakoken.

Minggu enda ibas oraten PJJ – nta, isingetken man banta kerna nabi Jeremia si tetap setia ibas mbritaken kata Dibata gia melala kel tantangen si ihadapina, dingen gelah erteguhna ka pe komitmenta ibas ersaksi guna mbritaken kerna kata Dibata ibas kegeluhenta ibas paksa jamanta sigenduari enda, emaka mari sigar – gari lebe bahan oraten PJJ –nta sekali enda erpalasken Jer 20 : 7 – 9, gelah alu bage maka kita pe tetap nteguh ncikep komitmenta ibas jadi saksi – Na ras ersaksi.

• Lit ulina kitab Jeremia pasal 20 enda adi sibaca secara keseluruhen menaken ayat 1 – 18 gelah alu bage si dat sada alur cerita kerna pengalamen nabi Jeremia ibas kegeluhen pelayanenna selaku nabi si tetap erkomitmen. Ibas bahan oratenta enda tempa – tempa icidahken Jeremia berontak kempak Dibata alu erkeluh kesah sebage sekalak nabi alu nuriken kerina isi pusuhna erkiteken ibas pendahinna selaku nabi ia ngenanami erbage – bage kiniseran. Tapi amin bage gia si idah ka pe maka ibas ayat 11 – 13 Jeremia nuriken kerna kinitekenna man Tuhan gia sekali erbage – bage kiniseran si kiniseran sinderpa kegeluhenna dingen kinitekenna e erbahanca ia tetap setia ndalanken tugas panggilenna.

• Ibas ay. 7 Jeremia ngataken dirina tempa “tertipu” ibas pendilo Tuhan selaku sekalak nabi. Ungkapen enda memang tempa – tempa ncidahken pemberontaken man Tuhan tapi jelas kel maka ungkapen Jeremia ibas ayat 7 enda labo ngatakenca Jeremia bagi kalak si tertipu ntah Tuhan sebage sekalak penipu. Tapi ungkapen enda e eme ungkapen perasaan Jeremia selaku nabi si merasa gagal ras kecewa ibas ia ndahiken tugas panggilenna selaku nabi erkiteken bangsa Jehuda la nggit jera ibas dosa – dosana nari tapi malahen njadiken Jeremia sebage musuh. Puncak ungkapen perasaan kekecewaan nabi Jeremia pe teridah tupung ia ngataken erkadiola ia tubuh (ay. 17 – 18). Janah banci pe si kataken maka kai si ibelasken Jeremia eme sebage sada kewajaren sebage sekalak si tek kempak Dibata, ia memang tuhu – tuhu kecewa nandangi bangsa Tuhan, sebab memang ibas kenyataanna pemberitaanna kerna pertobaten la irespon bangsa Tuhan.

• Ibas sisi sideban si idah maka ungkapen Jeremia ibas ayat 7 enda, Jeremia pe ncidahken hak kemutlaken Dibata nandangi anak – anakNa ise si ateNa i pakeNa guna ersaksi kerna Ia, nehken berita ibas Ia nari. Ibas ungkapen Jeremia alu ngataken “gegehen kap Kam asangken aku, emaka enggo italukenNdu aku” ayat e sekaligus ncidahken man banta kerna kemahakuasaan Dibata nandangi sekalak ise si ateNa ipilihNa jadi suruh – suruhenNa (Bd. Kerna pendilo Jeremia si ituriken ibas pasal 1 : 4 – 19).

• Engkai maka nabi Jeremia erkeluh kesah ngungkapken kerina perasanna ras ndatken kiniseran ? erkiteken Jeremia memang sekalak nabi si sungguh – sungguh nuriken kerna kata Tuhan alu kebenarenn situhu – tuhu dingen sekalak nabi si tetap erkomitmen. Kinipangenna nuriken kata Tuhan erbahanca ia jadi sekalak si la isenangi, janah memang tuhu ia pang nuriken kerna kata Dibata alu melasken kata tuhu siteridah ibas ia mbritaken berita penghukumen Tuhan nandangi Pashur ras man kerina kalak Jehuda. Sejarah Alkitab memang mencatatken Jeremia memang sekalak nabi si i tolak kehadirenna sebage nabi, erkiteken kesaksinna rusur kel nuriken kerna berita penghukumen ras pertobaten (Jer 20 : 3 – 6).

• Penolaken nandangi pemberitaan Jeremia memang tuhu luar biasa ibas kalak Jehuda nari, seh maka Jeremia pe ngenanami kiniseran akibat pemberitaan si isehkenna, ija imam Pashur anak Immer sekalak kepala rumah pertoton, nuruh jelma sienterem mekpeki ia ras ipasungken ibas binagun pintun rumah pertoton (Jer 20 : 1 – 7). Tapi gia sekali Jeremia ibas tekanen ibas mbritaken kerna kata Tuhan ia tetap erkomitmen alu paguh ndahiken – dahinna selaku nabi si enggo i pilih Tuhan. Jeremia tetap berani mengambil resiko nehi panggilenna, sebab ia memang kalak si teriplih.

Ibas paksa jamanta genduari, sieteh sendiri maka mbue alasen sila jelas ija enterem kalak ernembeh ate nandangi Kristus ntah pe ernembeh ate man kalak Kristen. Labo erkiteken Kristus erbahan kesalahen (Kejahaten) ntah kita erbahan kesalahen (kejahaten). Tapi erkiteken kegeluhenta memang bagi siiajarken Tuhanta memang memiliki kelebihan moral si tinggi asangken kerina pengajaren agama si lit i tengah – tengah doni enda. Kebenaren, keadilen, ras keleng ate ibas kegeluhen kekristenenta memang melebihi standart si lit. Reh ulina kegeluhenta banci jadi erbahanca reh nembehna ate kalak nandangi kita, bandingken ras pengalamen nabi Jeremia, ia tampil sebage sekalak si tampil beda itengah – tengah kebobroken moral kalak Jehuda. Banci jadi ka pe ibas jamanta si genduari enda kita ndatken intimidasi ibas enterem jelma nari, la siakap nyaman erkiteken buena tekanen sireh nindih kegeluhen kinitkenta, seh maka banci jadi pe kita ngenanami erbage – bage kiniseran ibas kita ersaksi kerna Kristus ras kerina kebenarenNa. Tapi ibas sie kerina perlu si inget justru Tuhan banci jadi berencana ija kita ipake-Na jadi saksi-Na ibas kondisi si memang melala tantangen si man hadapen. Jeremia ibas nuriken kerna kata Tuhan ngenanami erbage – bage kiniseran, tapi bagi kesaksin Jeremia maka Tuhan tetap jadi gegehna, dingen keleng ate Tuhan belinen jadi ibas geluhna asa si ibayangkenna (Bd. Jer 20 : 11 – 13). Tentu hal sie pe jadi penjemba man banta ibas kegeluhen kinitekenta ibas paksa jamanta sigenduari enda, ija kita pe tetap nge i temani Tuhan ibas kita ersaksi kerna Ia, bagi nina Tuhan Yesus “Aku tetap ras kam seh ku kedungen jaman” (Mat 28 : 20).

Janji Tuhan nemani kita seh ku kedungen jaman labo hanya sebage janji manis sebab Ia memang pasti tetap ras kita eme ibas penemani Kesah Si Badia si erbahanca kita megegeh ibas kai – kai pe. Tapi amin bage gia maka arus ka nge tetap si inget maka Tuhan pe labo menjanjiken langit tetap cerah, bunga tetap merim, ertina Tuhan la menjanjiken man banta maka lalit kesuliten ras kiniseran ibas kita ersaksi kerna Ia ras kalak singangkai sibage rupana me kalak singasup erkomitmen guna terus ersaksi kerna ia alu setia.

Tema PJJ – nta sekali enda mindo gelah si pepaguh komitmenta ibas ersaksi ras adi enggo kita erpengue ibas komitmenta, maka kita enda me saksi Tuhan sue ras tema PJJ – nta sekali enda “Ersaksi Eme Komitmenku”. Maka mari dage ersaksi sebab kita memang saksi ibas kerina kerna si enggo ilakoken Kristus nandangi kegeluhen manusia ras memang kin tanggungjawabta selaku kalak si tek ersaksi guna mbritaken kerna Ia (Bd. I Ptr 3 : 15). Dingen sue ras tahun pelayanen GBKP ibas paksa enda “Mengajar Dan Melakukan” maka ula ka min terjeng ibas ersaksi saja kita megegeh tapi pe teridah ka pe min kesaksin e ibas kerina perbahanen kegeluhenta.

Sieteh sendiri maka enterem kel kalak genduari sibeluh ersaksi kerna Tuhan tapi banci jadi kegeluhenna la jadi kesaksin si nggeluh, sebab jadi saksi Kristus memang labo hanya terjeng ibas cakap (perkataan) saja tetapi arus pe arah kegeluhen sinyata. Si inget Mahatma Gandhi pernah ngataken ilebe – lebe ribuan mahasiswa kalak Kristen i Colombo “seandainya kekristenan hanyalah kotbah di bukit, maka saya telah menjadi orang Kristen. Tetapi karena hidup orang – orang Kristenlah maka saya tidak mau menjadi Kristen.” Ertina ibas ungkapenna e Mahatma Gandhi ngidah kegeluhen kalak Kristen kepeken la sue ras kai si isaksikenna ntah banci ikataken enterem kalak kristen si hanya pande ersaksi, jago nuriken penggejapen ntah alu bahasa sirusur ku pake “Jago Di Mimbar” tapi ibas kinata kegeluhen si ibelaskenna pe lanai ingetna.

Dage, gelah la kesaksinta ngenca mbelang dingen sue ras tuntuten tema PJJ – nta sekali enda mari si peteguhi komitmenta dingen terus ersaksi ras sekaligus kesaksin e jadi perbahanenta ibas kerina dampar kegeluhenta, bagi si ikateken Yesus man ajar – ajarNa ibas Mat 5 : 16 “Dage ersinalsalah min terangndu, ilebe – lebe kalak si enterem gelah adi idahna perbahanenndu simehuli, i pujina BapaNdu si i surga”. Selamat berkomitmen ras selamat melakukan.

Pekanbaru. Minggu 29 january 2017.