Arsip Tag: Lakon Persadaan Si Badia

Suplemen PJJ “Sakramen Ibas GBKP” Matius 28 : 19; 1 Korinti 11 : 24 – 26

Tema : Sakramen Ibas GBKP
Ogen : Matius 28 : 19; 1 Korinti 11 : 24 – 26

A. Kata penaruh
Kata sakramen rehna ibas cakap Latin: ‘sacramentum’ si iterjemahken ku bas pengertin “perbahanen si badia”. Istilah ‘sakramentum’ enda, adi ipake ibas bidang hukum ras pengadilen nuduh kerna barang sikerajangen si ipake guna jadi jaminen, asum dua pihak erbahan perpadanen, ras adi dua pihak ersoal, maka barang pihak si talu isita jadi sikerajangen kalak si menang. Seakatan si e ibas kebiasan tentera Romawi, kata sacramentum e nuduh ku sumpah setia asum sesekalak iangkat jadi tentera.

Alu mperdiateken latar belakang e, jenari Gereja mengambil alih istilah ‘sacramentum’ ras ibere isi/pengertin si mbaru. Sakramen iertiken sebage jaminen si ibereken Dibata i bas erbahan perpadanenNa e me perpadanen keselamaten.

Agustinus, bapa Gereja ngatakenca: “Sakramen e – e me tanda si teridah ibas si la teridah ibas sada hal si badia, ntah wujud si teridah ibas lias ate si la teridah. Sakramen banci ikataken sebage Kata (Ind. ‘Firman’) si teridah.

Calvin ngumpaken sakramen alu meterei ntah segel, si biasana itamaken ibas sada piagam ntah surat perpadanen guna ngesahken isina. Arah sakramen e Tuhan mpegegehi ras ngesahken perpadanen si enggo ibahanNa ras manusia arah pengorbanen Kristus i Golgota.

Sakramen sebage perkakas lias ate si nuduhken keleng ate Dibata, guna peteguhi kinitekenta nandang Kata e gelah kinitekenna la ijolah-joleken kelemahen ras percuban. Janah perlu pe siinget maka tanda-tanda ntah simbol-simbol si ipake i bas pelayanen sakramen e jine labo lit daya ntah gegehna si istimewa. Ia ermakna adi Kesah Si Badia erdahin i bas pusuh manusia, e maka sakramen e ialoken alu kiniteken. Meritaken Kata secara lisan ras meritaken Kata i bas bentuk sakramen e me dua perbahanen si tetap ilakoken i bas ergereja ras kegeluhen Kristen.

Gereja Protestan – GBKP ngakui dua sakramen e me: Peridin Si Badia ras Persadan Si Badia. Tek kita ras bage me pengakunta, erkiteken Jesus jine si netapken duana sakramen e (Mat. 28:18-20 kerna lakon Peridin Si Badia ras Mat. 26:26-29 kerna lakon Persadan Si Badia). 1 Joh. 5:7,8; Joh. 3:5; 6:54,55 kerna lakon Peridin Si Badia ras lakon Persadan Si Badia.

B. Isi
1. Peridin Si Badia
a. Erti Peridin Si Badia
Kata mperidiken ntah peridin rehna ibas kata ‘baptizein’ si ertina kurang lebih ‘menyelamkan’, ‘menyucikan’ ras ‘membersihkan’. Guna ngantusi erti ras makna Peridin Si Badia e, kita arus ngenen kaitenna ras peridin Tuhan Jesus. I bas Mat. 3:13-17, Tuhan Jesus iperidiken i Lau Jordan, asum si e terbegi sora i langit nari: “Enda me AnakKu si Kukelengi, IA me si ngena ateKu” (ay. 17). Enda nuduhken maka Jesus e ‘suruh-suruhen’ si itima-timai (Mas. 2:7; Jes. 42:1), IA si idemi Kesah Si Badia si tuhu-tuhu mersan dosa umat manusia.

Peridin Jesus labo peridin pertobaten, tapi peridin si nuduhken solidaritasNa man umat manusia si perdosa. IA la erdosa ijadiken dosa i perdosa. Peridin Jesus nuduh ku kematenNa, si ulihna mereken pengalemi dosa man kerina manusia.
Jesus jine la mperidiken kalak. IsuruhNa dahin mperidiken e man ajar-ajarNa. Kenca kematen ras kekeken Kristus, e maka peridin Kesah ilakoken sebage perbahanen gerejani.

b. Makna ras Tujun Peridin Si Badia
Peridin Si Badia nuduhken piga-piga hal, antara lain:
1. Peridin Si Badia sebage partisipasi i bas kematen ras kekeken Kristus, ertina maka kalak si iperidiken e jadi sada i bas kematen ras kekeken Kristus. Arah kematen Kristus, manusia si male enggo ikut isalibken ras ikuburken, janah bali ras Kristus keke i bas kegeluhen si mbaru, maka kalak si enggo iperidiken e pe ipekeke ras IA i bas kegeluhen si mbaru, nggeluh ibabai Kesah Si Badia (Rm. 6:3-4; Kol. 2:12).

2. Peridin igambareken sebage ‘penyucian’, ‘pembenaren’ ras ‘pengudusan’ si ibahan Dibata i bas Kristus ras i bas Kesah Si Badia (1 Kor. 6:11; Ep. 5:26). Peridin ncidahken inti berita keselamaten: Ibersihken ibas dosa nari, hubungen ras Dibata enggo ipulihken mulihi arah pengorbanen Kristus. Dareh Kristus enggo mbersihken kita ibas dosa-dosa nari, nggeluh i bas pemabai ras penegu-negu Tuhan penyelamaten e me ibas Dibata jine.

3. Peridin nuduhken bengketna sesekalak ku bas persadan ras Kristus bage pe ku bas persadan ras perpulungen – Gereja sebage kula Kristus. Ringan i bas persadan ras perpulungen ertina ikut muat bagin i bas pergumulen ras perjuangen perpulungen tep-tep wari ngelawan kuasa-kuasa si jahat i bas geluhna i doni enda ras ikut muat bagin i bas kemenangen/keselamaten si ibereken Kristus man bana. Persadan ras Kristus e me palas ibas persadan ras perpulungen.

4. Peridin merupaken tanda pengakun kiniteken ntah kesaksin maka kita tek nandangi lias ate Dibata janah arah lias ateNa e kita dat pengalemi dosa, janah kita ngakuken padan maka setia man baNa.

c. Pelaksanan Peridin Si Badia
Penungkunen si mekatep turah e me, peridin si apai nge si benar – si itenggelamken ntah si ipirpiri? Janah penungkunen si deban e me, uga kerna peridin anak-anak? Me lenga bo lit pengangkan ras pengertinna ras pe lenga bo ia ngasup ngakuken kinitekenna jine?

Aminna pe banci nge ilakoken maka cara peridin alu cara itengggelamken nampati ngggambarken alu lebih jelas ras mesukah kai si imaksud kerna peridin e. Tapi labo perlu lit keberaten guna ngelakoen sakramen peridin e i bas gedung Gereja alu cara ipirpiri lau ku babo takal kalak si iperidiken.

Hakekat ibas peridin e labo ibas ritus/cara peridin, ras ingan i ja peridin e ilakoken, i bas gedung Gereja ntah i bas lau maler ntah i bas bak/kolam, ras alu cara itenggelamken ntah ipiripiri. Penentu erti peridin e – e me i bas ungkapen wibawa Dibata si i bas gelarNa peridin e ilakoken. Gegeh ras makna peridin e – e me ………., iperidiken i bas gelar Dibata Bapa, ras AnakNa Jesus Kristus ras Kesah Si Badia. Ungkapen perpadanen maka kita jadi anak-anak Dibata, sikerajangen Dibata jine. Kristus nge si nebus kita, ras Kesah Si Badia nggit ringan i bas kita. Pelaksanan peridin alu rumusen enda lanai mereken ingan guna erbahan peridin Kesah Si Badia secara tersendiri.

Peridin si nuduhken tanda perpadanen keselamaten Dibata itujuken labo man kalak dewasa saja, tapi padan keselamaten e pe itujuken man anak-anak. I bas Padan Si Ndekah padan e itujuken man anak-anak kalak si erkiniteken, arah tanda sunat, bagi si iperentahken Dibata man Abraham, ras jenari i bas Padan Si Mbaru mekatep kal sijumpai Jesus ringan i tengah-tengah danak-danak (Mrk. 10:13-16), ras ibas wari Pentakosta. Petrus mereken kesaksin: “Sabab enggo ipadanken Dibata man bandu ras anak-anakndu, bage pe man kerina kalak si ndauh ibas Dibata nari, e me kerina kalak si idilo Tuhan Dibatanta ku IA” (Perb. 2:39).

I bas Padan Si Mbaru sijumpai maka kenca kepala keluarga ngakuken kiniteken, maka radu ras kerina anak jabuna iperidiken. Alu bage, e nuduhken maka labo jadi abat man danak-danak si kitik denga iperidiken. Labo saja banci iperidiken tapi arus iperidiken iikuti alu pebelin-belin ia i bas Kristus. Alu nggejapken erti peridin e, maka merupaken pendilo man orangtua guna ngajari ras mabai anak-anakna i bas kiniteken, seh maka bertumbuh i bas penandai ras erkiniteken man Tuhan Jesus Kristus.

Kenca ia enggo dewasa pagin, ia jine ngakuken kinitekenta i adep-adepen Tuhan ras perpulungenNa. La iumputi alu ngakuken kiniteken, peridin si ialokenna asum ia danak-danak labo kai pe ertina.

2. Lakon Persadaan Si Badia
Guna ngatusi Lakon Persadan Si Badia, perlebe arus kita ngenen ku bas “perjamuan malam” si ilakoken Tuhan Jesus ras ajar-ajarNa ibas berngi ope denga Tuhan Jesus itangkap jenari itamaken ku kayu persilang. Perjamuan malam e ilakoken sehubungen ras perayan Paskah si biasa ilakoken kalak-kalak Jahudi guna peringet-ingeten ndaratna Israel i Mesir nari (Kel. 12:1-13). Asum Tuhan Jesus ngerayaken parjamuan Paskah si terakhir e, ibuatNa roti, ikatakenNa bujur, icepik-cepikNa, ras iberekenNa man ajar-ajarNa janah nina: “Enda me kulangKu si ibereken man gunandu. Lakokenlah bage, guna peringet-ingeten nandangi Aku. Bage kenca dung man, ibuat Jesus calung, jenari nina: Calung enda me iketen padan si mbaru si isahken alu darehKu. Tep-tep kam minem tare calung e, lakokenlah bage, guna peringet-ingeten nandangi Aku” (1 Kor. 11:24-25). Ras Tuhan Jesus mindo gelah ajar-ajarNa tep-tep kali ngerayaken Perjamuan e mulai asum itetapken seh asa kerehenNa mulihi. Alu cara si itetapken Jesus enda me, jenari Gereja ngerayaken perjamuan bagi si itetapken Tuhan Jesus.

Bali ras Lakon Peridin Si Badia, Lakon Persadan Si Badia e me perjamuan si terhisap ku bas perpadanen si ibahan Dibata ras umatNa i uruk Golgota. Anak Biri-Biri Paskah enggo ikorbanken guna keselamaten manusia, janah pengorbanenNa e me sekali guna rasa lalap.

Kai erti roti ras anggur si ipake sebage tanda ibas Lakon Persadan Si Badia e? Roti ras anggur si ipake ibas Lakon Persadan Si Badia e – e me roti ras anggur biasa. Tapi bali ras Lakon Peridin Si Badia, maka alu kite-kite roti ras anggur e, Lakon Persadan Si Badia merupaken Kata si teridah. Roti si icepik-cepik ngelambangken kula Kristus si icepik-cepik ntah pe binasa guna pengalemi dosanta manusia, ras cawan anggur si ipake i bas Lakon Persadan Si Badia nuduhken dua erti e me: sebage pengataken bujur, guna ngerayaken kebebasen si nialoken; ras anggur ngelambangken dareh Kristus si niamburken guna pengalemi dosa. Arah mamburna dareh Kristus terjadi ‘pengudusen’ ras ‘penyelamaten’ man nterem jelma.

a. Pasu-pasu kai sialoken arah lakon Persadan Si Badia e?
1. Kita ngenanami persadan ras Kristus, sekaligus ngelakoken diakoni Kristus. Ngerayaken lakon Persadan Si Badia e me ‘sesuatu’ si nggeluh, kita hadir, kita muat bagin, kita man, berarti kita e me bagin i bas keselamaten. Arah Lakon Persadan Si Badia, kita ipersingeti uga ergana ras mehergana pengorbanen Jesus jadi penebusenta. Aminna pe Lakon Persadan Si Badia e peringet-ingeten nandangi kematen Kristus tapi e labo perjamuan duka, labo perkabungen, tapi perjamuan ngataken bujur erkiteken kekekenNa merupaken kemenangen Kristus nandangi kematen si mpeturah keselamaten man kalak si tek/erkiniteken.

2. I bas Lakon Persadan Si Badia kita ngenanami penyelamaten Dibata i bas Kristus raduken kalak-kalak si erkiniteken, perjamuan e igelari ‘Perjamuan Persekutuan’. Kematen ras kekeken Kristus ‘memulihken’ persadan manusia ras Dibata, tapi sekaligus pe memulihken hubungen persadanta ras temanta. Bali ras kita man roti ibas roti si sada e ras minem ibas calung si sada e, bage pe Lakon Persadan Si Badia nuduhken maka kita enggo ersada ras ipersadaken i bas Kristus. Persadan ras Kristus iwujudken i bas persadan tep-tep kalak ras perpulungen (bandingken ras kegeluhen perpulungen si pemena – Perb. 2:43-47). I bas meja perjamuan la lit perbedan warna kulit, keduduken, cakap ras si debanna, lit keadilen, keleng ate ras persadan.

3. Lakon Persadan Si Badia nuduh ku masa si nandangi reh, ku ‘Perjamuan Agung’ si isikapken, kesertan kegeluhen si tuhu-tuhu dingen la erkeri-kerin, si pagin terjadi. Nina Tuhan Jesus: “Kenca wari enda lanai Kuinem lau anggur enda seh warina Aku ras kam nginem lau anggur si mbaru i bas Kinirajan BapangKu” (Mat. 26:29). Lakon Persadan Si Badia e me ‘perjamuan pengharapan’, keriahen Kinirajan Dibata si ibenai i doni enda, janah genduari kita paksana menuju ku kesempurnanna si nandangi reh.

b. Uga kita nikapken diri guna ngerayaken lakon Persadan Si Badia?
Alu nggejapken maka i bas Lakon Persadan Si Badia kita ersura-sura Kristus jine, maka enggo me oratna kita ersikap guna ngerayaken Lakon Persadan Si Badia e. Persikapen diri si nimaksud labo persikapen lahiriah, melainken kesedaren diri maka situhuna kita e me kalak-kalak perdosa, si la metunggung dingen meparas, tapi ikelengi Tuhan.

Kesedaren si njemba ku pertobaten ras mpelimbarui geluh, erkadiola ras meteruk rukur i adep-adepen Tuhan, janah nggit nggeluh rikutken si ngena ate Tuhan. Alu bage Lakon Persadan Si Badia jadi sada perayan ras ‘pesta sukacita’ ras ‘pesta iman’.

Tulisen bahan PJJ-nta si imuat enda eme tulisen kekelengenta Pdt. Jepta Pelawi. Si aktif pe nulis Suplemen GBKP guna banci reh buena refrensi man banta. Sentabi aku man kerina kekelengen kami, si mengunjungi blog enda guna nambahi bahan refrensinta guna bahan PJJ.
CATATATENKU KERNA LATAR BELAKANG KORINTUS SI JADI BAHAN ORATEN PJJ SEKALI ENDA :
Kekelengen Tuhan, bagi si enggo sieteh ras – ras Pepulungen kalak Korintus, eme perpulungen si ipanteki Paulus. Eme ibas pedalanen misina sipeduaken ibas meritaken berita simeriah. Mari sinen lebe piga – piga cataten kerna perpulungen enda :

  • Perpulungen Korintus eme sada perpulungen si ipasu – pasu Tuhan sebab ibas perpulungen e erbage – bage ibereken Dibata pemere – pemere si erbahanca perpulungen sikap ibas kerina kegeluhenna, tapi amin amin bage gia perpulungen e pe la lepas ibas masalah nari janah perpulungen enda pe ncedai pusuh Paulus sebab ibas perpulungen e pe turah perpecahen.
  • Perpecahen si lit ibas perpulungen erkiteken litna “PENGKULTUSEN” sekalak pemimpin (Palus, Petrus , Apolos, Pengikut Kristus) ras turahna “KESOMBONGAN ROHANI” antara perpulungen erkiteken litna pemere – pemere si khusus si ibereken Dibata.
  • Si paling menyedihken iakap Paulus erkiteken ibas perpulungen enterem kalak si bayak si iakapna ia lebih hebat asangken perpulungen si deban seh maka terjadi me “DISKRIMINASI SOSIAL”. Sikap eklusifisme kalak bayak e tole erbahanca turah perpecahen ibas perpulungen e.
  • Ibas situasi bage rupana me Paulus mpersingeti perpulungen e. Kebiasan perpulungen e pulung ibas rumah – rumah kalak bayak sebab ibas paksa sie lenga lit “RUMAH PERTOTON” ras tep –tep kalak e pulung, ibahan me “PERJAMUAN MAKAN” si igelarina perpulungen e alu “PERJAMUAN KASIH. Pangan si ipan ibas perjamuan makan e, ibaba tep –tep perpulungen i rumahna nari ras kenca elah man me maka iterusken ku “LAKON PERSADAAN SI BADIA”. Ibas perjamuan makan e pe mekatep turah persoalen sebab ibas perjamuan makan e biasana kalak bayak reh leben asangken kalak si musih janah biasana kalak si bayak la nggit ersada ras kalak si musil.
  • Erkiteken sie Paulus sangat mengecam tindaken kalak e, kalak si la nandai Dibata pe erbagi nge ia nandangi temanna adi lit pangan siman panganen tapi justru ibas kalak kristen terjadi pembagin si la ngena ate Tuhan, emaka nina Paulus kai si ilakoken kalak e labo perjamuan kudus (ay 20 – 22), ras ekiteken kejadin si bage me maka Paulus mengutip ngulihi kai si ikataken Yesus tupung ngelakoken perjamuan si terakhir ras ajar – ajarNa, guna ngingetken makna situhuna ibas ngelakoken perjamuan kudus e.

Suplemen Pekan Penatalayanen wari VII. Luk 22 : 14 – 20. “Persadanta Ras Jesus Erbahan Kita Megegeh”

Suplemen Pekan Penatalayanen wari VII. 24 Jan 2015

Khotbah : Luk 22 : 14 – 20
Tema : “Persadanta Ras Jesus Erbahan Kita Megegeh”

Shalom.

La tergejap dingen banci denga kurang siakap wari – wari ibas kita muji Dibata dingen nggari – gari kataNa, sebab ibas persadannta ras Tuhan tentu sidat me kemalemen ate. Wari enda wari si pepituken kita ngelakoken Pekan Penatalayanenta dingen itutup pagi alu Lakon Persadaan Si Badia. Persadaan Si Badia si ikuti kita ibas wari pepagi sifatna “Sakral” emaka labo sembarangen kalak guna ngikutisa erkiteken Yesus sendiri jine netapken dingen merentahkenca guna ilakoken alu tujun gelah si inget tetap kerna keleng ate Yesus si isehkenNa man banta ibas kematenNa i kayu persilang bagepe ngingetken man banta pentingna persadaanta ras Ia simpetetap kinitekenta maka keselamaten enggo bagin sikerajangenta erkiteken pengorbanen Yesus i kayu persilang sebab kuasa dosa labo tertaluken alu kesalehan, akal budi, pengertin ras kebijaksanaan dirinta sendiri kecuali Yesus sendiri sinalukenca. Tapi ibas kinatana mekatep mekarus denga kita ngikuti Lakon Persadaan Si Badia sinilakoken gerejanta. Ibas Lakon e isingetken “maka sekalak – sekalak kita arus nguji bana” (Pemeriksaan ntah Pengujian diri) erpalasken I Kor 11 : 28 – 29 ”dage tep – tep kalak nguji banalah, jenari ipannalah roti e dingen minem tare calung e, sebab kalak siman ras minem alu la nandai badan Tuhan i je, ia jine maba ukumen man bana, asum ia man ras minem e”, kata enda me ningetken kerna kesakralen Lakon Persadaan Si Badia dingen eme sebabna ibas gerejanta kalak si kena siasat la banci ngikuti Lakon Persadaan Si Badia erkiteken kegeluhenna tetap denga ikuasai dosa. Kata enda pe sekaligus jadi persinget banta ibas paksa mengketi Lakon Persadaan Sibadia, ija kita arus mpebadiaken kegeluhenta alu nadingken kerina biak dosa, Ibas sada minggu enda kita ngelakoken Pekan Penatalayanenta tentu enda pe jadi modal man banta mengketi Lakon Persadaan Si Badia e, ija kita nggo mbue rukur kerna kata Dibata ras nggejapken kelenga ate Tuhan ras penjemba man banta guna ngelakoken kai simehuli singena ate Tuhan ku lebe enda.

Oratenta ibas wari enda Luk 22 : 14 – 20 nuriken kerna perayaan Paskah si ilakoken Yesus ras ajar – ajarNa ope denga Ia itangkap ras isalibken. Perayaan Paskah e biasana ilakoken kalak Israel tiap tahun guna ngingetken kalak Israel tupung ndarat i Mesir nari (Ul 16 : 1). Paskah e sendiri ertina “lewat ntah berlalu” siterjadi ibas berngi ope denga kalak Israel ndarat i Mesir nari, ija malekat Dibata ngelewati kerina rumah – rumah kalak Israel si enggo itandai alu dareh biri – biri ibas pintu rumahna. Dareh e me sebage tanda maka ukumen Dibata la berlaku nandangi kerina isi rumah e. Janah ibas berngi e kerina kalak Israel i perentahken man daging panggang biri – biri si enggo ibuat darehna e ras man roti si la itama ragi si ikuahi alu kuah si pagit. Kerina e ilakoken alu tedis, make benting, make sepatu ras ncikep tongkat sebage tanda siap – siap guna berangkat nadingken Mesir taneh perbudaken. Ibas kecibal sibage me kalak Israel memaknai Paskah eme sebage perayan kebangikten ras pembebasen i Mesir nari, erkiteken Mesir memang imaknai sebage lambang penindasen ras Laut Merah sebage lambang kematen.

Perayan Paskah si enda me irayaken Yesus ras ajar – ajarNa, tapi ibas paksa Yesus ngelakoken perayan Paskah e Yesus lebih memaknaisa kubas diriNa sebage tebusen si tuhu – tuhu sinasapken kerina dosa manusia. Ibas perjamuan e Yesus nuriken kerna kiniseran sibakal ialamiNa dingen perjamuan si ilakokenna ras ajar – ajarNa e me sebage tanda peringet – ingeten kerna kiniersadanNa ras ajar – ajarNa ras sekaligus ningetken kerna karya penebusen Yesus man manusia perdosa. Tanda persadaan si ilakoken Yesus eme alu muat roti jenari icepik – cepiksa ras Anggur si iberekenNa man ajar – ajar niNa : “Enda me dagingKu si Kubereken man gunandu bahanlah bagenda guna peringet – ingeten man bangKu. Jenari iterusken Yesus alu muat calung, janah nina man ajar – ajarNa : arah calung enda Dibata erbahan padan si mbaru si isehken alu darehku simambur gunandu”. Pengertin kerna roti sicepik-cepik ras anggur e si bereken Yesus man ajar – ajarNa e me : roti e merupaken simbol daging kula Kristus si ngenanami kiniseran si isalibken, mate ras si keke ibas si mate nari, jenari Anggur si inem ajar – ajar merupaken simbol dareh Yesus si mambur guna ngalemi dosa-dosa manusia. Ibas pengertin sienda me tep – tep kali kita ngelakoken Persadaan Si Badia maka kita arus nggejapken kerina kiniseran Tuhan Yesus ras kematenNa. Erpalasken sie kerina mari dage simaknai alu mehuli tep – tep kali kita ersada ibas Lakon Persadan Si Badia, silakokenlah alu tuhu – tuhu ngataken bujur man Dibata erkiteken Kristus Yesus enggo nggancihken kita ibas kematen dingen simereken keselamaten ibas kegeluhen si mbaru.

Tema Pekan Penatalayanenta ibas wari enda “Persadanta Ras Jesus Erbahan Kita Megegeh”. Tema tentu njemba kita lebih memaknai persadan e sebagai persadaan anak – anak Dibata dingen mpraktekken persadan e ibas kegeluhenta si irakut ibas keleng ate Tuhan Yesus. Tentu pe tema ibas wari enda tetap si kaitken kubas program tahun gerejanta eme “Peningkaten Sosial, Ekonomi ras Budaya” sinjemba kita banci nggeluh ersada ibas hubungen sosial simehuli, ersada arih meningkatken kegeluhen ekonomi jemaat ras kalak sideban dingen ersada ibas membudayaken budaya sisampat sampaten. Man banta warga GBKP situhuna hal sienda labo kap mesera guna ndalankenca, erkiteken nai nari kita memang enggo i iket ibas persadaan iketen kekeluargaan ras kekerabaten si saling terkait sada ras sidebanna alu iketeken tutur siwaluh rakut sitelu janah iketen e situhuna kita enggo encidahken maka kita saling membutuhken kap sada ras sidebanna, persadan e banci i ibaratken bagi “Persadan Kopi ras susu”, ersada ia duana alu la situalen, la ngataken aku si entabehna nina sapih – sapih ia, tapi ipersadana bana duana seh maka iberena rasa si entabeh siakap nginemsa.

Ibas doni enda pe melala bentuk – bentuk “Persadan” umpamana : Persadan Merga silima, Persadan Sembiring ras anak beruna, Persadan Singalor Lau, Persadan lau Simalem, Persadan Keleng ate, Persadan Gereja Indonesia, Oikumene, rsd. Persadan enda ibahan alu erbage – bage tujun umpamana : nehken keleng ate ras si sisampat – sampaten (STS), gelah tetap lit iketen si mengikat ras erbage – bege tujun simehuli sidebanna. Tapi engkai ka maka mekatep lanai siakap malem ibas kerina persadaanta ? tentu sienda pe jadi pergumulenta ras – ras erkiteken mekatep memang persadaan e dungna pecah ras lanai siangkan, memang perpecahen ibas persadaan banci saja terjadi erkiteken piga – piga hal, umpamana :

  • Kita la ateta mereken ” rasa “ ibas keanggotanta tapi mekatep encidahken “tualta” (inget persadaan Kopi ras susu ndai).
  • Sifat Individulis simegegeh pe mekatep jadi penyebab sebab kalak si individualis memamng bana ngenca ukurina (Partikularis).
  • Sifat Komersialistis ertina adi lit iakapna ombangna bana maka sikap iakapna persadaan e ras adi labo iakapna lit ombangna maka labo diatena.
  • Sifat rayo – ayo. Lit kuan – kuanta sicocok kel ibas sienda eme “Seri nge ate kelengna / pengidah mata tapi la seri ibas perbahanen” entah pe kuan – kuanta “Situngkat – tungkat galuhna “, bage – bage denga kin simekatep jadi, janah hal sienda pe merambat kubas pelayanen Gereja, umpamana : mengayak kel kita kubas sada ingan entah e mungkin erkiteken hubungen emotionalna ntah kalak si idahi kita kalak erpangkat, bayak ras mehaga tapi kubas sada ingan mekatep ka kita la mengayak erkiteken la siakap lit ngaruhna banta bicara sidahi. La kita sadar maka cara sibage meruntuhken kerina persadan si lit.

Melala denga kel sibanci sidaftarken adi ateta kita ngerana kai nge si menghambat kiniersadannta seh maka banci pecah ras adi sidaftarken banci jadi ribuan hasilna dingen sie kerina terjadi erkiteken gegehna biak dosa singerajai ija biak iblis gegehen asangken biak – biak anak – anak Tuhan. Tapi kenca Penata layanenta ibas ari si pe 7 ken enda tentu terjadi me perubahen man banta ras tek kita maka turah dingen erbuah me me biak – biak anak Tuhan ibas persadaanta si teraplikasiken ibas kita radu menerima, menghargai, engkelengi amin lit perbedaan tapi perbedaan e la jadi penghalang erkiteken kita enggo ipersadaken ibas keleng ate Kristus dingen enda me siarapken Tuhan jadi ibas kerina kiniersadanta. “Selamat memberikan rasa simehuli si erpalasken keleng ate Tuhan ibas kerina persadaanta”.

Amin.
Pekanbaru 24 Jan 2015.