Suplemen PJJ GBKP. Tgl 13 – 19 Sept 2015. “Nggeluh Radu Si Keleng – Kelengen” Mat 22 : 34 – 40

Suplemen PJJ GBKP. Tgl 13 – 19 Sept 2015.

Tema : Nggeluh Radu Si Keleng – Kelengen
Ogen : Mat 22 : 34 – 40

Piga – piga hal sibanci isingetken kami sijadi penjelasen ibas bahan oraten PJJ – nta sekali enda eme :

• Secara keseluruhen Pasal 22 enda encidahken, maka Yesus tetap icubai alu penungkunen – penungkunen si mberat guna mengahalangi Yesus ibas meritaken Berita Si Meriah. Lit pe dua kelompok siersura – sura menekan Yesus eme dua kelompok si memiliki pemikiren ras pendapat siberbeda. Tapi amin gia berbeda ibas sura – sura ras pemikiren, dua kelompok e tetap nge ersura – sura menekan Yesus, alu tetap ncubai Yesus aku penungkunen – penungkunen si menjebak ras dikune Yesus salah mereken jawapen, maka kesalahen Yesus e me modal dua kelompok e maba Yesus ku pengadilen agama.

• Kelompok sipemena eme kalak Saduki salah sada kelompok religius liberal. Kalak enda tempa tek man Dibata tapi situhuna kelompok e hanya sibuk ibas urusen sosial masyarakat seh maka pikiren kelompok enda hanya berpikir seputar masalah sosial masyarakat.

• Kelompok sipeduaken eme kalak Farisi. Klompok situhu – tuhu religius, kepedulinna nandangi hukum – hukum taurat seh kel njelimet, umpamana ibas hal ertoto, erpuasa, ras ndalanken aturen – aturen tambahen si lit ibas kitab Talmud si erisiken 613 aturen si itata menurut Hukum taurat, 248 sifatna “harus” ras 365 sifatna “Jangan”. Alu bage banci ikataken kalak Farisi lebih menekanken hal rohaniah jenari ngelupaken urusen sosial masyarakat.

• Ibas penungkunen si isehken kalak Farisi man Yesus ibas ayat, 36 “O Guru , perentah siapai kin sipentingna kel ibas kerina undang – undang agama”. Situhuna penungkunen enda sifatna hanya menjebak Yesus, erkiteken ibas penungkunen e, Yesus iperhadapken kubas dua soal eme : soal kepatuhen man Dibata ras soal engkelengi manusia ras dikune Yesus salah jabab, maka Yesus ikataken sebage guru palsu.

• Penungkunen e Ijabab Yesus alu ngataken “Kelengilah Tuhan Dibatandu, asa ukurndu, asa tendindu, asa gegehndu lit dingen kelengilah temanndu manusia bagi kam ngkelengi dirindu jine”. Jawapen Yesus enda, e me jawapen simenjawab sekaligus kerna hubungen ras Dibata bagepe hubungen ras manusia. Ibas jawapen si isehken Yesus e kalak Farisi lanai beluh ersoal jabab ras Yesus, erkiteken jawapen Yesus e ibuat Yesus erdasarken shema kalak Israel si arus ibelaskenna tep – tep wari. Sebab Shema e sendiri ningetken maka totalitas kegeluhen kalak Israel arus encidahken ia kalak si engkelengi Dibata dingen ibas engkelengi Dibata, maka ibassa pe arus lit perbahanen kekelengen man sapih – sapih manusia (Ul 6 : 4 – 5).

• Tema PJJ – nta sekali enda “Nggeluh Radu Si Keleng – Kelengen”, eme sada pengajuk ntah persinget uga seharusna kita nggeluhken geluhta selaku kalak si erkiniteken. Ibas kitab Jakup 1 : 19 – 27, isingetken maka kalak kristen la banci hanya meteh ntah erpemegi nandangi kata Tuhan tapi pe kalak kristen arus nggeluh sebage pendengar ras pelaku kata Dibata ibas kegeluhenna si tep – tep wari. Alu bage tema enda ningetken man banta, maka kegeluhen kalak kristen la banci ngadi hanya ibas erpemeteh kerna kata Dibata ntah ibas rumusen saja, tapi pe arus menijiwai ras ngelakokenca ibas kegeluhenna.

• Perdiatekenlah kegeluhen Yesus, maka Yesus la hanya menjawab penungkunen kalak Farisi, labo hanya sekedar mengerti kerna hukum Taurat, tapi pe menjiwai hukum e ibas kerina dampar kegeluhenNa dingen mpraktekkenca ibas tindaken sinyata. Kita enggo ngaloken penebusen ibas Kristus nari dingen penebusen me erbahanca kita nggeluh ibas persadan ras Kristus. Emaka ula si sia – siaken penebusen si enggo ilakoken Kristus man banta, sebab kalak singgeluh ibas persadaan ras Kristus memang ngenca ngasup ndalanken bagi kai si ikataken Yesus.

• Sipraktekkenlah “Nggeluh sikeleng – kelengen” ibas kegeluhenta subuk e ibas keluarga bagepe nandangi kalak sideban. Lit pe cara sibanci silakoken guna banci nggeluh sikeleng – kelengen e eme alu, sibereken perhatianta, kepedulianta, membuka mata ngenehen kai siterjadi ibas kegelehun keluarga ras sekelewetta dingen mari entisik sitadingeken aktifitas kesibukenta guna banci ngelakoken tindaken kegeluhen ibas nggeluh si keleng – kelengen e, sebab ibas kita “nggeluh sikeleng – kelengen” situhuna kita enggo mpertanggungjawabken kerna kerina pemetehta kerna kata Dibata.

• Yesus meteh kalak Farisi menentang diriNa ibas nehken kekelengen, tapi kerina bentuk kekelengen ras kiniulin kegeluhen si icidahken Yesus, memng labo hanya guna ngajarken saja, tapi pe sekaligus ateNa mereken teladan secara langsung guna banci i teladanken kerina anak – anakNa.

• Uga ninta ?

Pekanbaru 14 Sept 2015.