“Pehaga Dibatandu, sehkenlah Kerja Ranindu” Ulangen 16 : 9 – 12 ; II Kor 9 : 6 – 9

Suplemen PJJ GBKP 07 – 13 Juni 2015.

Tema : “Pehaga Dibatandu ; Sehkenlah Kerja Ranindu”
Ogen : Ulangen 16 : 9 – 12 ; II Kor 9 : 6 – 9

Shalom.

Pelaksanaan Kerja Rani ibas gerejanta enggo merupaken sada kegiatan “wari raya” si ilaksanakan gerejanta tiap tahun. Kerja Rani e pe imaknai sebage ungkapen persembahen pengataken bujur man Dibata erkiteken sigejapken Dibata enggo masu – masu kegeluhenta ibas kerina ulih pendahinta, subuk e ibas hasil juma, usaha ntah pe gaji si idat arah pendahin si ilakoken kita ibas setahun, jenari erpengarapen ka kita maka ibas tahun – tahun si reh pe Dibata tetap simasu – masu kerina ulih pendahinta.

Uga bentuk kerna pelaksanaan Kerja Rani ibas gerejanta situhuna labo soal kel man banta, sebab sie kerina ilakoken rikutken situasi ras kondisi runggun masing – masing, sebab si pentingna ibas perayaan e situhuna eme pelaksanaan Pembuktian pengakun kinitekenta, maka tuhu sigejapken Dibata simasu – masu kegeluhenta ras erkiteken sie me maka si sehken pengataken bujurta sebage tanda pengakun kita la pernah lupa nandangi keleng ate Dibata si isehkenNa man banta.

Sejarah Pustakanta Si Badia nuriken man banta kerna pelaksanaan Kerja Rani si ilakoken kalak Israel, lit pe kerna makna ras pelaksanaan Kerja Rani si ilakoken kalak Israel ibas eme :

• Pelaksanaan Kerja Rani e eme pedah si isehken Musa man kalak Israel ras arus ilakoken bangsa e kenca bengket kubas taneh Kanaan. Salah sada pedah si isehken Musa e, eme gelah kalak Israel tetap nginget ras mpehaga Dibata, si enggo mulahi bangsa e ibas kerina kiniseranna i Mesir (Kel. 23 : 19, 34 : 26, Bil 18 : 21).

• Kerja Rani eme perentah ntah aturen si arus ilakoken bangsa e ibas tep – tep tahun dingen setiap kalak Israel si la ngelakokenca, ia ianggap kalak si la mematuhi aturen siberlaku nandangi kalak Israel (Kel 23 : 16, 19 ; 34 : 22, 26).

• Kerja Rani eme sebage tanda pengataken bujur ras encidahken kepatuhen ras penghormaten man Dibata (Bd. Tema PJJ-nta “Mpehaga Dibata”) ras di kune la ilakoken maka kalak Israel situhuna menolak ntah la mengakui maka Dibata me si enggo masu – masu bangsa e ibas kerina kegeluhenna.

• Ibas nehken persembahen si isehken arus simehulina la banci mekarus ras arus alu pusuh si ermeriah ukur (Ul 16 : 9 – 12). Ibas konteks sie ka me Paulus ningeti kalak Korintus alu ngataken “sekalak-sekalak iberekennalah sue ras si enggo itetapkenna i bas ukurna; ola alu pusuh jungut-jungut entah pe bagi si terpaksa, sabab Dibata ngkelengi kalak si mere alu ukur meriah” (II Kor 9 : 6 – 9).

• Kerja Rani e pe imaknai sebage sada kiniersadaan (pemersatu) kerina kalak Israel erkiteken sie me maka Kerja Rani imeriahken bagi sada kerja – kerja mbelin. Ibas konsep kiniersadan e me maka kerina kalak Israel radu ras memeriahken dingen menikmati ulih Kerja Rani e. Bagepe la banci lang bagin ulih Kerja Rani e pe arus isehken nandangi budak, kalak pertandang, anak yatim ras diberu balu – balu (Kel 23 : 16, 34 : 22, Ul 16 : 9 – 12, Im 27 : 17).

• Kerja Rani pe merupaken sada tradisi si arus ilestarikenna ras si arus ilakoken kerina kesusuren kalak Israel ras sekaligus sebage pembelajaren si isehken gelah tep – tep kalak kesusuren Israel la pernah lupa sejarah kegeluhen orang tuana ras nini – ninina si i pasu – pasu Dibata (Im 23 : 21) ras e me maka ibas tep – tep kalak Israel nehken persembahen Kerja Rani, kalak e melasken bagi si tersurat ibas 26 : 5b – 10a : “Nini – niningku e me bangsa Aram, kalak perlajang, kalak si lalit tetap inganna tading, simaba keluargana ku Mesir. Sanga e sitik ngenca beliganna, tapi ia dungna jadi sada bangsa si mbelin ras megegeh. Kejam kel perbahanen bangsa Mesir man kami, ipaksana kami erdahin jadi budak. Dunga serko kami mindo penampat man Tuhan, Dibata nu nini – nini kami. I begi Tuhan perserko kami, idahna kiniseran, kelatihen ras kesusahen kami. Alu gegehNa simbelin i pulahina me kami i Mesir nari. IlakokenNa tanda kuasa ibanNa kejadin – kejadin si mejin. IbabaNa kami ijah nari ku jenda, iberekenNa man kami negeri simehuli ras mehumur enda. Emaka genduari kubaba man Tuhan, bagin sipemena ibas ulih juma si enggo iberekenna man bangku”.

Ibas awal tulisen enda ndai isingetkan man banta, uga bentuk pelaksanaan Kerja Rani e labo perlu si ipersoalken, maksudna eme gelah ula kita hanya terkesan ndabuh kubas perayanna saja, tapi marilah silakoken Kerja Rani e lebih kubas makna si ni iarapken Dibata eme sebage Pembuktian pengakun kinitekenta, maka tuhu sigejapken Dibata simasu – masu kerina kegeluhenta, janah erkiteken sie me si sehken pengataken bujurta sebage bukti kita la pernah lupa nandangi keleng ate si isehken Dibata man banta.

Cataten si banci isehken penulis ibas kesempaten enda sebage diskusinta kerna pelaksanaan Kerja Rani si ilakoken ibas gerejanta :

• Lit memang pandangen negatif si isehken piga – piga kalak nandangi pelaksanaan Kerja Rani si ilakoken ibas gerejanta, ibas sada tulisen kubaca nina: “Kesalahan GBKP dalam mengadopsi Kerja Rani menjadi bagian dari perayaan GBKP, adalah ketika menempatkan Kerja Rani ini hanya di pos keuangan, sehingga pelaksanaan Kerja Rani hanya dimengerti sebagai salah satu perayaan yang diadakan untuk mengisi pundi pundi GBKP, disamping jenis jenis sumbangan lainnya (lihat Tata Gereja GBKP bab XI). Pernyataan di atas semakin benderang, ketika banyak Runggun di GBKP yang melaksanakan Kerja Rani tanpa menghadirkan hasil panen, tapi pengumpulan amplop. Lebih ringkas, cepat, dan bahkan katanya lebih banyak yang didapatkan dengan menggunakan metode amplop daripada parade menjunjung pisang, daun ubi, kelapa, jambe, jambu, nenas, gundur, ayam, sambil melahap cimpa serta cipera. Bukankah kalau semuanya sudah diamplopkan, namanya bukan lagi Kerja Rani, tapi Kerja Amplop”. Secara pribadi penulis kurang setuju nandangi pernyataan enda, sebab memang la banci si pungkiri Kerja Rani si ilakoken ibas gerejanta eme salah sada tuhu – tuhu sebagai “Pos Penunjang Keuangan” gerejanta. Ibas piga – piga runggun Kerja Rani e memang sebagai pos penunjang guna mengisi pundi – pundi gereja subuk tingkat runggun bagepe tingkat Sinode ras arus si akui maka Kerja rani sebage salah sada cara guna ngelitken dana pelayanen gerejanta i samping bentuk – bentuk persembahen sidebanna (Bd. Tata Gereja GBKP Bab XI, Pasal 3). Emaka meriahlah ukurta sebab piga – piga Klasis bagepe Runggun tetap ngelakoken Kerja Rani e alu meriah ukur janh soal uga pelaksananna e tergantung ibas perarihen, situasi ras kondisi Runggun si ngelakokenca.

• Ibas Pustakanta memang isingetken maka kalak Israel erbahan Kerja Rani e alu maba ulih jumana ras ipersemahken tapi ula kita lupa maka ibas ibas jaman e sen lenga bo bagi si genduari dominan sebage alat tukar menukar dingen janah mungkin ibas jaman e “Barter” lebih dominan berlaku asangken jual beli si mempergunaken sen. Sejarah ngatakenca maka Kerja Rani e pe ilakoken tahun kenca dung peranin kenca bangsa e bengket kubas taneh Kanaan emaka secara ekonomi kalak e banci ikataken lenga makeken sen sebage bentuk persembahen tapi lebih kubas hasil si lit ibas jumana nari. Janah kedungenna bentuk persembahen e pe berkembang alu makeken sen janah adi siperdiateken perkataan Yesus nandangi kalak penukar duit ibas rumah pertoton ras sekalak diberu miskin simereken dua keping perak ibas rumah pertoton, maka Yesus pe labo mpersoalken bentuk persembahen si isehken tapi Yesus lebih mempersoalken soal “kemurnian Hati” (bd. Mrk 11 : 5, Lukas 21 : 2). Alu bage maka amin ibas bentuk amplop pe si sehken persembahen Kerja Rani situhuna labo salah, sebab cara e mungkin lebih praktis ras banci menampung kerina hasil pendahinta, si salah eme adi la si sehken persembahen e dingen la merekenca la dem alu pengataken bujur man Dibata.

• Wajib nge kita erpesta ibas ngelakoken Kerja Rani ibas gerejanta ? Sejarah kegeluhen kalak Israel i Kanaan memang nuriken bangsa e ngelakoken Kerja Rani alu keriahen, tapi keriahen si isingetken e pe labo hanya ibas bentuk pesta tapi mereken keriahen man kalak si lalit peraninna eme alu nehken keleng ate, man kalak si musil, kalak Lewi, kalak pertandang, anak yatim ras diberu balu – balu (Ul 16 : 9 – 12). Alu bage, soal erpesta ntah pe lang e pe labo soal terlebih ibas masata genduari ija mobilitasta semakin tinggi ras buena pelayanen si arus si ilakoken gerejanta, janah bicara erpesta ka pe labo soal, lakokenlah pesta Kerja Rani e sue ras perarihen, situasi ras kondisi runggunta masing – masing janah sipentingna kel pe ula si lupaken, maka makna ibadah Kerja Rani e ula min jadi pelengkap saja dingen lakokenlah tuhu – tuhu sebage pesta gerejawi, gia si lakoken pesta Kerja Rani e ibas Runggunta.

Alu bage dage, Ibas minggu Kerja Rani enda si sehkenlah dage kai kin si arus si sehken man Dibata alu dem pengertin ras pengataken bujur man Dibata ras sebage Pembuktian pengakun kinitekenta, ibas penggejapen Dibata nge simasu – masu kegeluhenta. Sebab ibas ngelakoken Kerja Rani e kita pe enggo ikut mereken dukungenta nandangi kerina pelayanen gerejanta subuk ibas tingakt Runggun bagepe tingkat Sinode ras sie kerina sue kel tupung sisehken perpadanenta tupung kita ingawanken maka kita nggit nanggung tanggungenta i bas GBKP enda.

Selamat Kerja Rani man banta ngawan perpulungen GBKP, mari si sehken persembahken persembahen Kerja Rani-ta ibas tahun enda, dingen si itotoken pe gelah pelaksanaan Kerja Rani ibas runggunta erdalen alu mehuli dingen dem alu keriahen ukur. Sehken dage simehulina man Dibata saja sebab e me tandana kita mpehaga Tuhan dingen malem me ate kasa kalak sibage ukurna sebab Dibata me si simasu – masu kegeluhenna.

Amin.
Pekanbaru 05 Mei 2015.