Suplemen Khotbah Minggu 05 Juli 2015. II Tes 3 : 6 – 12 “Tutus Erdahin Biak Anak Dibata”

Suplemen Khotbah Minggu 05 Juli 2015.

Invocatio : Jeremia 29 : 11
Ogen : Kej 3 : 17 – 20
Khotbah : II Tes 3 : 6 – 12
Tema : “Tutus Erdahin Biak Anak Dibata”

Shalom.

Kekelengen Tuhan …
Abraham Maslow ngataken : “Kita lebih dari sekedar mahluk hidup yang memiliki mulut dan perut, tetapi kita juga adalah mahluk yang bermartabat, memiliki hati nurani, maka ketika kita bekerja sebenarnya kita sedang mengaktualisasikan diri sehingga hidup ini lebih berarti dan memberi arti hidup”. Konsep Abraham Maslow kerna kegeluhen enda sue ras pemahamen kekristenenta erkiteken kita selaku anak Dibata arus kin mengaktualisasiken diri ibas kegeluhenta sebage kalak sierdahin, erkiteken erdahin e sendiri memang kin biak, panggilen ras sebage perintah man banta (bd. Yoh 15 : 17, Kej 3 : 19), alu bage lalit alasenta guna la erdahin ras kalak si la erdahin ia menolak biakna selaku tinepa Dibata sierdahin.

Temata ibas minggu enda “Tutus Erdahin Biak Anak Dibata” kebaliken ibas tema enda tentu kalak si la tutus erdahin la ngusih biak anak Dibata. Alu bage temata ibas minggu enda situhuna enggo menjelasken man banta, erdahin alu tutus tentu ngena me ate Tuhan ras sebab tutus e sendiri ncidahken biak Dibata. Sijadi penungkunen man banta lit kin kalak si la tutus ibas erdahin ? tentu jababna lit. Ibas kita kalak Karo lit rusur ibelasken kuan – kuan simenggambarken kerna ketutusen ras kinilatutusen erdahin umpamana : “Adi man la bias piring tapi sanga erdahin iba cangkul”, kuan – kuan enda ngatakenca lit nge kalak pertewas ntah kedat, ibas sisi sideban rusur ibelasken kuan – kuan : “Raga – raga pernantin”, kuan – kuanen enda ngatakenca kerna kinijingkaten seh maka tupung sanga ngeranai entah paksa ngadi – ngadi pe tetap lit kegiaten si ilakokenna.

Kekelengen Tuhan …
Suarat Paulus man kalak Tesalonika enda ilatar belakangi kerna pengajaren Paulus kerna kerehen Yesus si peduakaliken, tapi lit kalak si salah menanggapi pengajaren e, eme maka ibas II Tes 3 : 6 – 12 Paulus ngulihi perpulungen e kerna sikap kegeluhen kalak kristen ibas nimai kerehen Yesus si peduakaliken, alu tutus erdahin guna ncukupi keperlun nggeluh ras njadiken erdahin sebage gaua hidup kalak kristen. Lit pe persinget si isehken Paulus ibas bahan khotbvahta ibas minggu enda eme :

• Enterem kalak kristen i Tesalonika ibas paksa e enggo kisat erdahin dingen enggo jadi beban man perpulungen. Lit pe penyebab kalak e kisat erdahin erkiteken lit pengakap maka kerehen Yesus sipeduakaliken enggo ndeher, emaka ibas paksa sie enterem kalak kristen si ndayaken erta – ertana jenari manganisa ras mbagi – mbagikenca man kalak sideban ibas nima – nimai kerehen Yesus si pedualkaliken (Perb 2 : 44 – 45). Tentu ras pasti, Yesus reh me peduakaliken, tapi ndigan ntah katawari e la isingetken Yesus. Alu bage, Paulus pe ningetken kiniteken nandangi kerehen Yesus pe arus tetap i gelem, tapi sikap ibas nimai kerehen Yesus peduakaliken tentu, la banci lang pe si pekena – kena me kegeluhenta, salah sada ibas mpekena kegeluhen ibas paksa nimai e eme alu ncukupi keperlun nggeluh alu erdahin.

• Ibas pemahamen kalak Tesalonika si salah enda me Paulus mpersingeti perpulungen e alu ngataken “ ….. sirangindulah senina – seninandu si perkisat, sila nggit ngikutken ajaren si ibereken kami” (ay.6), si enggo riahen iakapna ncampuri urusen kalak (ay.11). Jenari paulus njemba perpulungen gelah tetap ngusih dirina ibas tutus erdahin alu la erlatih – latih, sebab bage kin biak anak Dibata, la ngarapken pangan si la nggalar, la jadi beban man kalak sideban, membangun mentalitas simehuli alu la jadi kalak pemindo – mindo (ay. 7 – 10, Bd. Kol 3 : 23).

Kekelengen Tuhan …
Melala hal memang alasen si ibelasken kalak si la tutus erdahin, tapi umumna kerina alasen e hanya alasen kalak si perkisat ra la menjiwai dahin e alu meriah ukur. Wari enda isingetken man banta, ngena kel ate Tuhan nandangi kalak situtus erdahin, sebab erdahin biak anak Dibata kap selaku tinepa ras mari simaknai dahin ras erdahin sebage perintah Dibata ras panggilenta si isuruh jadi teladan ibas kegeluhen doni enda (bd. Ogen. Kej 3 : 17 – 20).

Piga – piga hal sibaci isingetken man banta guna banci mpeturah ras nambahi pengertinta kerna “Tutus Erdahin Biak Anak Dibata” si jadi temata ibas minggu enda eme :

• Kita enda kerina persuruhen Dibata ibas doni enda emaka la banci lang sicidahken me kemulian Dibata ibas kerina kegeluhennta, salah sada cara kita mpemuliaken Dibata ibas pengajuk wari enda eme alu encidahken kita enda labo kalak si malas ntah perkisat guna erdahin, tapi kalak situtus si memiliki mentalitas ras produktifitas kerja simehuli, sebab kai pe si idahiken kita mereken erti man banta banta ras man kalak sideban.

• Erdahinlah ras maknai dahin e sebage panggilan jiwa (Vocatio) gelah hasil dahin e memuasken. Sekalak memang la banci ipaksa guna erdahin adi la kin reh ibas ukurna nari dingen kalak sierdahin alu paksaan ntah bagi pahat si i pek – pek lebe maka erdahin sebab kalak si bage pahat pasti la pernah berinisiatif guna mengembangken pendahinna.

• Erdahinlah alu memaknai dahin e anugrah si ibereken Dibata man banta, labo hanya sebage pengertin dahin (pekerjaan/job) entah hanya guna ndatken hasil (sen) ntah pe guna erkarir (career), ibas sie sada pepatah ngataken nina : “If you work just for money, you’ll never make it. But if you love what you’re doing and you always put the customer first, success will be yours” (Jika Anda bekerja hanya demi uang, Anda tidak akan mendapatkannya, tapi jika Anda mencintai apa yang Anda kerjakan dan selalu meletakkan pelanggan sebagai yang utama, maka keberhasilan akan menjadi milik Anda). Dahiken sajalah dahinta alu meriah ukur ras ngataken bujur man Dibata soal hasilna serahken saja man Dibata sebab uga kel Dibata masu – masu kalak sierdahin alu tutus ras erkemalangen man baNa .

Kekelengen Tuhan …
Dahikenlah dage dahinta, tutus ate, ola lolah – lolah, ola kedat, ola pertewas, ola bagi pahat, ola dekahen medem, ola dekahen engkawil, ercatur, rsd, tapi pakekenlah waktu alu mehuli, dahiken kai sibanci silakoken ibas wari enda, sebab ibas kita ndahiken dahinta, Dibata erdahin ras bekerja sama kap ras kita, emaka nintalah ras – ras dage ras – ras ibas penutup khotbah enda alu melasken temata ibas minggu enda “Tutus Erdahin Biak Anak Dibata”.

Amin.
Pekanbaru 02 Juli 2015.

Suplemen Pekan Penatalayanen wari VII. Luk 22 : 14 – 20. “Persadanta Ras Jesus Erbahan Kita Megegeh”

Suplemen Pekan Penatalayanen wari VII. 24 Jan 2015

Khotbah : Luk 22 : 14 – 20
Tema : “Persadanta Ras Jesus Erbahan Kita Megegeh”

Shalom.

La tergejap dingen banci denga kurang siakap wari – wari ibas kita muji Dibata dingen nggari – gari kataNa, sebab ibas persadannta ras Tuhan tentu sidat me kemalemen ate. Wari enda wari si pepituken kita ngelakoken Pekan Penatalayanenta dingen itutup pagi alu Lakon Persadaan Si Badia. Persadaan Si Badia si ikuti kita ibas wari pepagi sifatna “Sakral” emaka labo sembarangen kalak guna ngikutisa erkiteken Yesus sendiri jine netapken dingen merentahkenca guna ilakoken alu tujun gelah si inget tetap kerna keleng ate Yesus si isehkenNa man banta ibas kematenNa i kayu persilang bagepe ngingetken man banta pentingna persadaanta ras Ia simpetetap kinitekenta maka keselamaten enggo bagin sikerajangenta erkiteken pengorbanen Yesus i kayu persilang sebab kuasa dosa labo tertaluken alu kesalehan, akal budi, pengertin ras kebijaksanaan dirinta sendiri kecuali Yesus sendiri sinalukenca. Tapi ibas kinatana mekatep mekarus denga kita ngikuti Lakon Persadaan Si Badia sinilakoken gerejanta. Ibas Lakon e isingetken “maka sekalak – sekalak kita arus nguji bana” (Pemeriksaan ntah Pengujian diri) erpalasken I Kor 11 : 28 – 29 ”dage tep – tep kalak nguji banalah, jenari ipannalah roti e dingen minem tare calung e, sebab kalak siman ras minem alu la nandai badan Tuhan i je, ia jine maba ukumen man bana, asum ia man ras minem e”, kata enda me ningetken kerna kesakralen Lakon Persadaan Si Badia dingen eme sebabna ibas gerejanta kalak si kena siasat la banci ngikuti Lakon Persadaan Si Badia erkiteken kegeluhenna tetap denga ikuasai dosa. Kata enda pe sekaligus jadi persinget banta ibas paksa mengketi Lakon Persadaan Sibadia, ija kita arus mpebadiaken kegeluhenta alu nadingken kerina biak dosa, Ibas sada minggu enda kita ngelakoken Pekan Penatalayanenta tentu enda pe jadi modal man banta mengketi Lakon Persadaan Si Badia e, ija kita nggo mbue rukur kerna kata Dibata ras nggejapken kelenga ate Tuhan ras penjemba man banta guna ngelakoken kai simehuli singena ate Tuhan ku lebe enda.

Oratenta ibas wari enda Luk 22 : 14 – 20 nuriken kerna perayaan Paskah si ilakoken Yesus ras ajar – ajarNa ope denga Ia itangkap ras isalibken. Perayaan Paskah e biasana ilakoken kalak Israel tiap tahun guna ngingetken kalak Israel tupung ndarat i Mesir nari (Ul 16 : 1). Paskah e sendiri ertina “lewat ntah berlalu” siterjadi ibas berngi ope denga kalak Israel ndarat i Mesir nari, ija malekat Dibata ngelewati kerina rumah – rumah kalak Israel si enggo itandai alu dareh biri – biri ibas pintu rumahna. Dareh e me sebage tanda maka ukumen Dibata la berlaku nandangi kerina isi rumah e. Janah ibas berngi e kerina kalak Israel i perentahken man daging panggang biri – biri si enggo ibuat darehna e ras man roti si la itama ragi si ikuahi alu kuah si pagit. Kerina e ilakoken alu tedis, make benting, make sepatu ras ncikep tongkat sebage tanda siap – siap guna berangkat nadingken Mesir taneh perbudaken. Ibas kecibal sibage me kalak Israel memaknai Paskah eme sebage perayan kebangikten ras pembebasen i Mesir nari, erkiteken Mesir memang imaknai sebage lambang penindasen ras Laut Merah sebage lambang kematen.

Perayan Paskah si enda me irayaken Yesus ras ajar – ajarNa, tapi ibas paksa Yesus ngelakoken perayan Paskah e Yesus lebih memaknaisa kubas diriNa sebage tebusen si tuhu – tuhu sinasapken kerina dosa manusia. Ibas perjamuan e Yesus nuriken kerna kiniseran sibakal ialamiNa dingen perjamuan si ilakokenna ras ajar – ajarNa e me sebage tanda peringet – ingeten kerna kiniersadanNa ras ajar – ajarNa ras sekaligus ningetken kerna karya penebusen Yesus man manusia perdosa. Tanda persadaan si ilakoken Yesus eme alu muat roti jenari icepik – cepiksa ras Anggur si iberekenNa man ajar – ajar niNa : “Enda me dagingKu si Kubereken man gunandu bahanlah bagenda guna peringet – ingeten man bangKu. Jenari iterusken Yesus alu muat calung, janah nina man ajar – ajarNa : arah calung enda Dibata erbahan padan si mbaru si isehken alu darehku simambur gunandu”. Pengertin kerna roti sicepik-cepik ras anggur e si bereken Yesus man ajar – ajarNa e me : roti e merupaken simbol daging kula Kristus si ngenanami kiniseran si isalibken, mate ras si keke ibas si mate nari, jenari Anggur si inem ajar – ajar merupaken simbol dareh Yesus si mambur guna ngalemi dosa-dosa manusia. Ibas pengertin sienda me tep – tep kali kita ngelakoken Persadaan Si Badia maka kita arus nggejapken kerina kiniseran Tuhan Yesus ras kematenNa. Erpalasken sie kerina mari dage simaknai alu mehuli tep – tep kali kita ersada ibas Lakon Persadan Si Badia, silakokenlah alu tuhu – tuhu ngataken bujur man Dibata erkiteken Kristus Yesus enggo nggancihken kita ibas kematen dingen simereken keselamaten ibas kegeluhen si mbaru.

Tema Pekan Penatalayanenta ibas wari enda “Persadanta Ras Jesus Erbahan Kita Megegeh”. Tema tentu njemba kita lebih memaknai persadan e sebagai persadaan anak – anak Dibata dingen mpraktekken persadan e ibas kegeluhenta si irakut ibas keleng ate Tuhan Yesus. Tentu pe tema ibas wari enda tetap si kaitken kubas program tahun gerejanta eme “Peningkaten Sosial, Ekonomi ras Budaya” sinjemba kita banci nggeluh ersada ibas hubungen sosial simehuli, ersada arih meningkatken kegeluhen ekonomi jemaat ras kalak sideban dingen ersada ibas membudayaken budaya sisampat sampaten. Man banta warga GBKP situhuna hal sienda labo kap mesera guna ndalankenca, erkiteken nai nari kita memang enggo i iket ibas persadaan iketen kekeluargaan ras kekerabaten si saling terkait sada ras sidebanna alu iketeken tutur siwaluh rakut sitelu janah iketen e situhuna kita enggo encidahken maka kita saling membutuhken kap sada ras sidebanna, persadan e banci i ibaratken bagi “Persadan Kopi ras susu”, ersada ia duana alu la situalen, la ngataken aku si entabehna nina sapih – sapih ia, tapi ipersadana bana duana seh maka iberena rasa si entabeh siakap nginemsa.

Ibas doni enda pe melala bentuk – bentuk “Persadan” umpamana : Persadan Merga silima, Persadan Sembiring ras anak beruna, Persadan Singalor Lau, Persadan lau Simalem, Persadan Keleng ate, Persadan Gereja Indonesia, Oikumene, rsd. Persadan enda ibahan alu erbage – bage tujun umpamana : nehken keleng ate ras si sisampat – sampaten (STS), gelah tetap lit iketen si mengikat ras erbage – bege tujun simehuli sidebanna. Tapi engkai ka maka mekatep lanai siakap malem ibas kerina persadaanta ? tentu sienda pe jadi pergumulenta ras – ras erkiteken mekatep memang persadaan e dungna pecah ras lanai siangkan, memang perpecahen ibas persadaan banci saja terjadi erkiteken piga – piga hal, umpamana :

• Kita la ateta mereken ” rasa “ ibas keanggotanta tapi mekatep encidahken “tualta” (inget persadaan Kopi ras susu ndai).

• Sifat Individulis simegegeh pe mekatep jadi penyebab sebab kalak si individualis memamng bana ngenca ukurina (Partikularis).

• Sifat Komersialistis ertina adi lit iakapna ombangna bana maka sikap iakapna persadaan e ras adi labo iakapna lit ombangna maka labo diatena.

• Sifat rayo – ayo. Lit kuan – kuanta sicocok kel ibas sienda eme “Seri nge ate kelengna / pengidah mata tapi la seri ibas perbahanen” entah pe kuan – kuanta “Situngkat – tungkat galuhna “, bage – bage denga kin simekatep jadi, janah hal sienda pe merambat kubas pelayanen Gereja, umpamana : mengayak kel kita kubas sada ingan entah e mungkin erkiteken hubungen emotionalna ntah kalak si idahi kita kalak erpangkat, bayak ras mehaga tapi kubas sada ingan mekatep ka kita la mengayak erkiteken la siakap lit ngaruhna banta bicara sidahi. La kita sadar maka cara sibage meruntuhken kerina persadan si lit.

Melala denga kel sibanci sidaftarken adi ateta kita ngerana kai nge si menghambat kiniersadannta seh maka banci pecah ras adi sidaftarken banci jadi ribuan hasilna dingen sie kerina terjadi erkiteken gegehna biak dosa singerajai ija biak iblis gegehen asangken biak – biak anak – anak Tuhan. Tapi kenca Penata layanenta ibas ari si pe 7 ken enda tentu terjadi me perubahen man banta ras tek kita maka turah dingen erbuah me me biak – biak anak Tuhan ibas persadaanta si teraplikasiken ibas kita radu menerima, menghargai, engkelengi amin lit perbedaan tapi perbedaan e la jadi penghalang erkiteken kita enggo ipersadaken ibas keleng ate Kristus dingen enda me siarapken Tuhan jadi ibas kerina kiniersadanta. “Selamat memberikan rasa simehuli si erpalasken keleng ate Tuhan ibas kerina persadaanta”.

Amin.
Pekanbaru 24 Jan 2015.