Teologia Persembahen Persepuluhen

“TEOLOGI PERSEMBAHEN PERSEPULUHEN”

(Labo Guna I Perdebatken Tapi Guna I dalanken)

Ngerana kerna persembahen persepuluhen tetap jadi hal simenarik i cakapken terlebih ibas kegeluhen gerejanta. Sebab lit rusur turah penungkunen kerna persembahen Persepuluhen, umpamana : wajip nge igalari persembahen persepuluhen ras adi wajib apakah harus 1/10 si harus si isehken ku gereja ?. Lit ka pe anggapen persepuluhen e sebage perintah si harus igalari, emaka adi lit kalak si la nggalari persepuluhenna ikataken muat bagin sekerajangen Dibata, payo nge pemahamen si bage rupana ?. Ibas pemahamen sideban, lit anggapen maka adi ibereken pe persepuluhen tapi adi la 1/10 asa penghasilen si idat si  ipersembahken, ikataken kalak sibage nipu ia alu persembahenna ntah la jujur man Dibata, rsd. Pengakap ras Pemahamen sienda me si mekatep ikembangken ras ijadiken alasen guna la nehken persembahen persepuluhen, ntah gia mawen sie pe hanya sebage alasen saja.

Ibas kurangna keseragamen pemahamen kerna persepuluhen, lit ka piga – piga gereja erbahan kebijaken mengganti istilah persepuluhen alu gelar “bagin perpuluhen”, tanpa  isadari maka penggantian ras perubahen gelar e situhuna enggo menggser makna ras pengertin persepuluhen e sendiri. Adi si gar – gari mbue denga banci si idah contoh – contoh kasus kerna pemahamen persembahen persepuluhen si kurang pas ibas praktek ras pelaksananna i gereja. Guna banci lebih jelasna man banta kerna pemahamen “Teologi Persembahen Persepuluhen” terlebih gelah banci simaknai alu payo ibas kegeluhenta selaku kalak si erkiniteken. Piga – piga hal si banci isehken man banta guna banci si pahami kerna “Teologi Persembahen Persepuluhen” eme :

• Dunia kuno iluar agama Jahudi ras naduh ope denga kekristenen enggo memahamai litna persembahen persepuluhen si imengerti sebage sepersepuluh (1/10) ibas kerina hasil si idat sekalak jelma, jabu ntah kelompok. Sepersepuluh e i hitung ibas kerina hasil juma, ternak ntah pe keuntungen dagang. Janah umumna ibas dunia kuno, sepersepuluh arah hasil juma, ternak ntah keuntungen dagang, ipersembahken man pemerintah duniawi sebage “upeti” ras pe si persembahken guna keagamaan dingen ibas pelaksananna sekalak si atena sinehken persepuluhenna (upeti) arus isehkenna alu sikap simehuli ras teratur.

• Ibas kitab PL pelaksanaan kerna persembahen persepuluhen sipemena isingetken ilakoken Abraham eme tupung Abraham naluken Kedorlaomer ibas atena mulahi Lot ibas tabanen kalak Sodom, dingen kenca kemenangenna, Abraham mereken sepersepuluh ibas hasil kemenangen man Melkisedek (Kej 14 : 17 – 24). Bagepe ituriken enggo ilakoken Jakup, eme tupung ia erpadan man Dibata, maka isehkenna me persembahen persepuluhen ibas kerina hasil si enggo ibereken Dibata man bana (Kej 28 : 22).

• Ibas kegeluhen bangsa Israel penetapen persembahen persepuluhen i lakoken menaken ibas zaman Musa (Bil 18 : 24) dingen persembahen e ibereken secara khusus man kaum Lewi si la ndatken bagin taneh ibas taneh perpadanen Dibata, erkiteken kalak Lewi i khususken guna melayani ibas bidang keagamaan (Ibr 9 : 7).

Umumna kalak Israel patuh kel nandangi hukum persepuluhen, bagepe kerna kualitas persembahen si isehken eme arus simehulina. Engkai maka Israel patuh kel ibas nehken persembahen persepuluhen ? piga – piga hal si mendasari kalak e nehken persembahen eme erkiteken :

• Ibas pemahamen spiritual kalak Israel, nehken persembahen persepuluhen eme hal si wajib ilakoken erkiteken man kalak Israel, persembahen e isehken sebage salah bentuk pengataken bujur man Dibata ras sebage kesaksian pribadi nandangi kalak sideban (Im 27 : 30 ; Mal 3 : 10).

• Sebage kalak si ersembah kempak Dibata. Maka adi lit kalak Israel si la nehken persembahen persepuluhen, maka kalak e ianggap sebage kalak si la meteh ngataken bujur kempak Dibata. Ertina secara secara spiritual kalak Israel tuhu enggejapken, adi Dibata enggo mereken pasu – pasuNa, maka sie arus ijawab alu nehken pengataken bujur (Bd. Im. 27 : 30 – 34 ; Ul 8 : 10 – 20 ; Mal 3 : 8 – 10. Am 3 : 8 – 10 ; bd.Mat 23 : 23 ; Rom 4 : 12 ; Ibr 7 : 6 – 10 ; I Kor 9 : 7 – 14 ; I Tim 6 : 17 – 18).

• Lit pe penggunaan persembahen persepuluhen ibas kegeluhen kalak Israel eme i pakeken guna kepentingen : kalak Lewi (Bil 18 : 21 – 24, 26 ; Neh 10 : 37 ; 12 : 44), guna nampati kegeluhen kalak musil, kalak pertandang, janda – janda ras anak yatim bagepe guna pendanaan rumah pertoton (Ul 14 : 21 – 27 ; Mal 3 : 10).

• Persembahen si isehken pe arus memenuhi kwalitas (simehulina) sebab arah kwalitas persembahen e teridah me sikap pusuh si nehken persembahen e. Ertina lit penggejapen ibas kalak Israel Dibata pe memang ngenehen sikap pusuh kalak sinehken persembahenna (Bdk. Persembahen Kain ras habil ; persembahen Kain i tolak Dibata erkiteken sikap pusuhna ibas nehken persembahen e la mehuli tapi persembahen Habil ialkoken Dibata erkiteken sikap pusuhna memang kin tuhu – tuhu mehuli ibas ia nehken persembahenna. Kej 4 : 3 – 10).

• Alu bage maka nehken persembahen persepuluhen merupaken hukum kegeluhen agama kalak Israel si arus ilakoken alu dem kiniteken ras sebage lambang kepatuhen nandangi kerina perentah – perentah Tuhan (bd. Mat 23 : 23, 10 : 10 ; Luk 11 : 42. 16 : 16 ; Mat 5 : 20 ; Luk 18 : 11 – 12).

Gerejanta GBKP ibas Sidang Sinode si pe 33 tgl 10 – 17 April 2005 i Suka Makmur, enggo memutusken persembahen persepuluhen merupaken salah sada kekuaten utama ibas ngelitken sumber dana gerejanta, ertina ; keputusen guna mengembangken persembahen persepuluhen e, labo hanya sekedar gelah erkiteken ikut – ikuten ngidah keberhasilen gereja – gereja sideban, tapi keputusen e ibahan erkiteken gerejanta pe memahami, nehken persembahen persepuluhen merupaken sada bentuk persembahen si sangat Alkitabiah dingen la menyalahi secara teologis, sebab adi si nen pe kubas kontek kegeluhen Yesus, maka Yesus ras ajar – ajarNa pe nggalari persembahen persepuluhenna bagi umumna kalak Jahudi nehken persepuluhenna ku rumah pertoton. Bagepe ibas zaman kekristenen mula – mula, nehken persepuluhen  jadi tradisi ibas kegeluhen kekristenen (I Kor 9 : 7 – 14 ; II Kor 8 : 1 – 15 ; Gal 6 : 6 ; I Tim 5 : 17 – 1 : 8 ; Ibr 7). Memang Yesus pernah mandang kalak Farisi sinehken persembahen persepuluhenna erkiteken tupung e kakak Farisi nehken persembahenna alu kemunafiken, lebih mementingken aturen persembahen persepuluhen tapi mengesampingken kegeluhen ibas ndalanken keadilen ras kebujuren, alu la mpraktekken kegeluhen erkeleng ate (bd. Luk 11 : 24 ; 18 : 12).

Ibas kedewasaan kinitekenta sebage kalak kristen, tentu kita pe enggo memahami, nehken persembahen persepuluhen enggo jadi sada kearusenta man Dibata alu penggejapen Tuhan enggo masu – masu geluhta. Banci jadi memang lit pergumulenta ibas nehken persembahen persepuluhen e, umpamana :  Katawari nge si isehken persembahen perpuluhen e ? arah setiap hasil penghasilenta nge kerina ?, wajibkah sepersepuluh i persembahken, rsd. Situhuna sie kerina lanai jadi penungkunenta erkiteken kedewasaan kinitekenta. Ibas bentuk ras waktu pe lanai perlu si persoalken. Kalak Israel nehken persembahen persepuluhenna secara tahunen, erkiteken kalak Israel memang mayoritas perjuma ras ndatken penghasilenna secara tahunen ras eme maka persembahen e isehken ibas setiap tahun sebage bukti dirina kalak si erkiniteken man Dibata ras nggejapken kai pe si lit erkiteken pasu – pasu Dibata. Persembahen e sifatna sekaligus jadi kesaksin ibas kegeluhen erkiniteken. Ibas praktek kegeluhen gerejanta genduari persembahen persepuluhen e, i sehken alu bulanen erkiteken memang kin hasil pendapatennta lanai sekali setahun ngenca tapi pe enggo sialoken alu bulanen ntah tiap paksa, emaka labo salah adi persembahen persepuluhenta ibas tiap bulanna ntah setiap minggu ras labo situhuna lit salahna adi kin setahun sekali maka sisehken, saja si pentingna ibas sie kerina sehkenlah alu pusuh si dem pengataken bujur man Dibata alu penggejapen Ia kap simada kerina sinasa lit ras simasu – masu kegeluhenta.

Pekanbaru 08 Maret 2016.